ISAYA 10 - Bibliyeeda Ghaydit

¹ Dashageada fuga inyeesa gwasin deaweedajeega mwadoabiiwa, ea ng'oorshoodiga inyeesa ghang'oar deaweedeeda sawan fugeasu,

² Nea ghaheawa ghoadaw fuga barbari gitoobiiwsa saawa nea ghoareat fugeasu barbari haleanjeeda nyaawa doobiiwsa, nea ghoah masinung'weega rabadanga nyaawa, ak ghoah bananga meewa ghweaniga nyaawa shageata nyaawa.

³ Gajasina naaha eaweeda lasooda, eaweeda jea ghwahina roopta lagheanga leabu deasheagi? Gajasalsiina ng'eaha jea ghaweadeagwa, gajayiina yeenu meanang'oocheanduumeedeang'wa?

⁴ Gamiiseegwa gideaba gajamugutageat aba bugusta fuga mida ghealooniga ak goosheali sea fuga sibwar aba ng'ucheeda. Nea aba badaydeaba suh seaniin ea miighahawda nyarasta NG'UTAMIIDA gudughamiinda geatindaanyi.

Sugoocheanda Ashuru gawuurji dabicheanda ASEETA

⁵ Ashuru gawuurji bileangida nyarasteanyu, nea bileangida mida geatindaanyi ea nyarasteanyu gil.

⁶ Gaydeajeakta ghabwar eemeeda munyas seara, ak ghabwar fuga eanyareeksi, ak ghoareat haleanjeeda nea ghwanung' ghoah rabadanga, nea ghoalaapta ng'eanyi gawuurji sheang'weeda mida naweeda.

⁷ Ak gwachi ea mabata, aba gideaba fughareadaanyi mii durumwana; nea aba fughareadaanyi gabada nyarjeawda, ak ghabwar eemoojiga mii ng'ay;

⁸ aba gideaba gwayi: “Heapi shirikarajeegeasu hees sean mii sugoodigea?

⁹ Heapi mujiineeda Galno maydahinda gideahindi Garkemishi? Mujiineeda Hamati gawuurji Arpadi? Ak Samariya gawuurji Dameski?

¹⁰ Gaydaahaakta geatindeanyu ak ghaalaschi sugoodiga bada haleanjeeda mawoosa aseecheeka, haleanjeeda mawoosa aseecheeka ng'al gea Yerusalemu ea Samariya.

¹¹ Heapi gaydaraay dasima Yerusalemu ea sanaamajeagaaschi gawuurji gidaghayi easimi Samariya ea sanaamu?”

¹² Inyeessa ghoahiit Ng'utamiida gadiyoojigaaschi sean aba uhuuda Giijeeda Sayuni ea Yerusalemu abeeda sugoocheanda Ashuru, aba gideaba gaba weashweashta ea ghwarjeeda.

¹³ Aba gideaba gwayi sugoocheanda Ashuru: “Haleanjeeni geasinyi aba uurda geatindeanyu ea aba weaghuumeedeanyu, aba gideaba aniini geandeawi fughareeda; ak ea neageandi moonghooda mida dageascheeda eemoojiga; nea neageandi haleanjeeda nyaawa mida giidiiwda; nea gearareang'u gea mida hoorgajeega sugoocheanduumeeda gawuurji gidahiniida siida mwaay.

¹⁴ Geatindeanyu gageanda meanang'oocheanduumeeda eemoojiga gawuurji siida abuuta geadi jeeda ghooriida dariideanda ak gawuurji fuga bwatgeat burunga sinung'wa heeda ea gidoabwati geat ng'eanyiisean gil; nea ea manda siida wapta, ghana ghwajaat ghuuta ak goojuursean.”

¹⁵ Heapi joomooda gayghaghwar geaw aba badayda siida gadiiyeata? Ghana labalda gayghoamu ghaghwar geaw aba badayda siida gadiiyeata? Gwachi abeeda iisunu, bileangida gaygoodiing'u siida ang'waay, ghana bileangida gaygoodiing'da siida humng'eeda ninyeeda mawoosa geeta!

¹⁶ Asi Ng'utamiida, NG'UTAMIIDA lugweega gayghwanung' ghwahidu geeyooda jea gwarip fugaaschi niriisha, nea hoorgeeda giigheambiita gajeaghwarda aba beasta.

¹⁷ ASEETA weeshinda fuga Israeli gil ak gawuurji beasta, dea ghaydit bea Israeli gayghoah ng'ushapta beasta; nea aba jeemba eaweecheanjagi gayghwaak haleanjeeda sean eara ng'eamga ea halaghweenga aba jeemba askweareanagi.

¹⁸ Dimdaanyi ghaambiidaat ea madameagaaschi miyaas gayghaghwarda NG'UTAMIIDA sean gaygawuurji siida bwar geeyooda.

¹⁹ Ak geediga abit aba dimdaanyi gajea ng'ay muuchi eara baleanda gayghoamu gwayiida.

Gaygabiigu fiisu ng'ay

²⁰ Nea eaweecheanjagi boosteanga fuga Israeli, ea gea ghuh bea gheeh Yakobo, maygut ghaghus eemeeda ghayi bwar. Gayghaghus NG'UTAMIIDA ghaydit bea Israeli bea huumwa.

²¹ Ak boosteanga boos gaba gheeh Yakobo abeeda gaygabiiksa ASEETA hoauur.

²² Aba gideaba earapeadi fuga Israeli aasaang'a ea gawuurji iseaskweanda ghuuta basooda, gaygabiigu fiisu ng'ay. Aba gideaba gajealas uhuuda, nea gajeesin aba doobiiwnata.

²³ Aba gideaba NG'UTAMIIDA, was NG'UTAMIIDA lugweega gaygwasin lasooda uhuuda buuneeda aba gidamanyiida aba jeeda ng'eanyiisean.

Ng'utamiida gayghwalas uhuuda fuga Ashuru

²⁴ Asi gwayi Ng'utamiida, was NG'UTAMIIDA lugweega, “Ea fugeasu mida Sayuni, adoawali Ashuru, dea bwareagwa aba bileangida aba gideaba ghamiinda bayiiga nyaawa aba badaydeang'wa, gawuurji gidaghayi sin fuga Misri.

²⁵ Aba gideaba siipuut eawoojisu ng'ay ak ghwahit; abeeda gaygoosha nyarasteanyu, nyarasteanyu gaygagal heeda fuga Ashuru, ak gaydanung' goosha.

²⁶ Ak NG'UTAMIIDA bea lugweega gayghwaduup ghealooda badaydaanyi. Gawuurji gidaghayi bwarda fuga Midiyani aba murdeeda lagheaneeda Orebu, ak bileangidaanyi gaygwanda badayda basooda gawuurji gidaghayi sin aba Misri.

²⁷ Ak eaweedida gayghabeawa sareenda gheatkweakeagwa, gaydageanda eara yookeadaanyi gajeehirja aba gheatkweakeagwa.”

Weajoocheanda ghwaan ng'ucheeda

²⁸ Weajoocheanda nischeeng'na Rimoni ak ak ea nihidu mujiineeda Ayati nea gwasku Migroni ak sareandaanyi gwanung'usa Mikmashi.

²⁹ Niighaawa giigheawda, ak gaweay gwalil aba Geba; fuga Rama niboadan aba muuwda, nea gea mida Gibeya ea Sawli nimng'aw.

³⁰ Oochuura muuchi ea fuga Galimu! Oaleaydiit ea fuga Laisha! Ashaaha ea fuga Anatoti!

³¹ Fuga Madmena gamng'aw, nea fuga Gebimu gwasalda ghoaghu eaweega nyaawa.

³² Eanean weajoocheanda gaygawus aba mujiineeda Nobu, gaygooyuuk gundiidaanyi ea aba giijeeda Sayuni ea aba heayeeda Yerusalemu

³³ Ng'ula, Ng'utamiida, NG'UTAMIIDA lugweega gayghwalach damealga aba uurda gharbeeda; ak geediga geawi gajeabwaay, ak gea mida humng'eeda gajeapwaaspwaas.

³⁴ Gaygwalaksa ng'eanyi saawa geediga dimda aba joomooda, ak gayghoabeada Lebanoni aba geatinda dea mideawa uurda.