ISAYA 1 - Bibliyeeda Ghaydit

¹ Suh ng'asheega siihiimsa Isaya gil, was orjeeda Amosi, ghayi daah aba badayda Yuda ea Yerusalemu aba damanda sugoocheanduumeeda Usiya ea Yotam, Ahasi ea Hesekiya was sugoodiga Yuda.

ASEETA goowoowsa fugaaschi

² Ayiinya ea humng'eeda, ak giileaydiit ea ng'eanyiida, aba gideaba gwayi NG'UTAMIIDA: “Orjooga, aang'aati nea ghaarearji niheawanaan.

³ Deeda ghwanal seabwa, nea digeeda ghwanal siida bea gheeda, nea Israeli ea mwanala, ak fugeasu ea meateemshachi.”

⁴ Ashageada geat eemeeda riing'eega, fuga sar sareenda ng'asheega munyas jeata fuga sina ng'asheega munyas orjooga sina ng'asheega riing'eega! Ninung'wa heeda NG'UTAMIIDA, nea gafool dea ghaydit bea Israeli nifuurji ak gabiikta bwadaw

⁵ Ghwasaan anda googasayi eabwareagwa eara ghamneawa, ak ea gudu andana jeeda heeheeweega? Ghwaak uhuuda sean, nea gwasawana guroorooda sean.

⁶ Ghang'eada baneakta geeshta ea gagul uhuuda, manda eaweega jeadaanyi, geaghus ghururuutka ea deaneaduutka rinna foojeanda; ak ea miyearat nea miyeechiista ak ea miyeeyeash aba nagheeda.

⁷ Ng'eanyiideang'wa ning'ut salagheang'da, nea mujiinajeegeagwa ea sighwarda aba beasta; nea ng'eanyiideang'wa ea nigeanda rabasta aba madeedeang'wa; ak ea ning'ut salagheang'da, ak ea nilas uhuuda rabasta.

⁸ Nea hudeaba Sayuni ea sinung'wa heeda ak gawuurji ghooriida aba jeeda madamnyeanda sabiibu, ak gawuurji ghealooda aba jeeda madamnyeanda njooriida, ak gawuurji mujiineeda neaweesa lugooda.

⁹ Inyeeda NG'UTAMIIDA bea lugweega ea meabuuneasa boosteang'su ng'ay, gwachi gajeasamwa Sodoma, ak geewuurjeewi Gomora.

¹⁰ Ayiinya ng'asheanda NG'UTAMIIDA agooga fuga ambaliischi bea Sodoma, oaleaydiit ak ghoayiinyi deaweedeeda ASEETEANYA, ea fuga Gomora.

¹¹ “Seang'ayda lukghumajeegeagwa oogoonyi gayghwaloat naaha? Gwarugu NG'UTAMIIDA; geandeawi gea deayeat was haleanjeeda sisapa geadi sighwarda bea lagweendiga ea nagheeda haleanjeeda riisheadi; ak aniini ea meahoosani aba foojeanda heewga ghana dayeega gisilga ghana ghwarayga.

¹² “Damanda oapkaani aghadoawana gheawungeasu, gwarukuneegwa ng'eaha gideaba ayeanean haleanjeeni seaniin, gwarukuneegwa ng'eaha gideaba asina haleanjeeni seaniin aba jeedeaba gheanyu?

¹³ Adagudooyeadu haleanjeeda sisabwa geadi bea ghadooweeda was gidamaweeda; ak geediga ng'andidi ea meagassi. Ea ng'ushiinda sheeda ea sabaato, ea fuga bwat geat mwaash ASEETA– ea googuuyi ng'asheega munyas aniini meagassi.

¹⁴ Ghweelmoojigeagwa bea ng'ushiinda sheeda, ea ghweelmoojigeagwa sirukuneegwa, ghwasit gurooroodeanyu, niiw sareenda durumwana aba heedeanyu, ak ea niiburan sareenda.

¹⁵ Inyeessa ghoamiindi geatingeagwa ookeala humng'eeda nea ghoamwaashchi ASEETA, gaydafuy gheanyangeasu ea mwadaaheagwa; eara amwaasha ASEETA nea gookeawiichi maydealeeyseegwa iit; aba gideaba geatingeagwa ninyiit foojeanda.

¹⁶ Oohuuna geat; ak ghoamiidu geat; nea ghoanung'waadi ng'asheega munyas oosinayi aba madeedeanyu; anung'waada sinooda ng'asheega munyas.

¹⁷ Oanala geat sinooda ng'asheega miyaas; asina girgweageeda doabiiwaat, aweada fuga sighabwas; oatawa bananga haleanjeeda nyaawa doobiiwsa, aweada masiinung'weanda.

¹⁸ “Asi apkaana eebaloola, gwarugu NG'UTAMIIDA: Riing'eegeagwa eara ea nihareeriidi muuchi, gaygaweeriidi ea gawuurji gapkeanda, eara ea nihareeriidi ea ghawaar foojeanda, gaygaweeriidi ea gawuurji buudeega gisilleanda.

¹⁹ Inyas ghoamwaschi nea goosinyi mureeda, abeeda gajayaaga haleanjeeda miyaasiin bea ng'eanyiida.

²⁰ Ama inyas ghoaheawi ak ghoaschoardi, abeeda gajealas uhuudeang'wa aba ng'uta; aba gideaba nih ginyah NG'UTAMIIDA gil.”

Mujiineeda nyiit riing'eeda

²¹ Mujiineani ea doabiiwaat iijea ghoah hiseadayda, niny gwandeawa girgweageeda doabiiwaat! Ghayi gwanda jeadaanyi doobiiwnata, ghamneawa ea niiw siida bara buuneeda.

²² Lapiyeadaang'u marachi gil, difaayeadaang'u siikuuyi beega.

²³ Fugaagu hees nischoarda, fuga nyaawa duupchi ea mareanghooga gil. Ak gaba nih bwariiy seawshooda nea gagasa haleanjeeda guskuseega. Ak ea moadawa bananga gitoobiiwsa, nea eara girgweageeda masiinung'weanda ea meeyeasiina saawa.

²⁴ Asi gwayi NG'UTAMIIDA, was NG'UTAMIIDA bea lugweega, was dea asagi hoauur bea Israeli: “Ak gaydanyareeksa weajoodigeasu, nea ghaawaldi mureandooda aba heeda weajoodigeasu.

²⁵ Ak gaydeagealu geatindeanyu headaang'u nea geabuuschi haleanjeedeang'wa marachi gil mida headaang'u nea geageandi munyindaang'u sean.

²⁶ Ak gaydanung' gabiigu gicha fugaagu aheeldooschi buuneeda gawuurji gideaba ghayi bea mwadiin, ea weedangaagu gawuurji gideaba ghayi bea mwadi. Iing'ata nih abeeda gajeeguureewaneey mujiineeda doabiiwaat, mujiineeda miy.”

²⁷ Sayuni gajeetin aba girgweaksiinda ea doabiiwaat, nea fugaaschi duukuuna gajeetin aba doobiiwnata.

²⁸ Ak fuga ng'adeadi ea gea riing'eega, gajealas uhuuda aba gheadagi, nea gea nung'wa heeda NG'UTAMIIDA gajeenung' goosha.

²⁹ Aba gideaba gajeapwaaspwaaseegwa aba sabiida oabwachi; ak gajeapwaaspwaaseegwa aba boostaaneeda oaloachi.

³⁰ Aba gideaba gajawuurjeewana sawacheanda ghajaamiit seengaaschi, ak gajawuurjeewana boostaaneeda manda jeeda beega.

³¹ Ak siida gaygawuurji nyeega gajeami, ak gadiyeadaanyi gaygawuurji rarayga beasta, ak gaygwayeeduuday, nea manda siida jea gwanuus.