IITOODA 35 - Bibliyeeda Ghaydit

Mujiinajeega siitaw fuga Lawi

¹ Ng'ata gwayeesha NG'UTAMIIDA Musa aba moohajeega Moabu neekeewa eenda Yordani mida Yeriko,

² “Rukusiina fuga Israeli, gideaba oatawa fuga Lawi heeda oohearanyi iteang'wa was mujiinajeega ak ghwanyas heeda jea goobiida; ak ghoatawji fuga Lawi heeda haghweeda neaweesa mujiinajeega.

³ Mujiinajeega gayghoah gea nyaawa jea goobiida jeeda, was ng'eanyiida nyaawa bea haghweeda gaygaba dugwa nyaawa, ea nooga nyaawa ea aba haleanjeeda nyaawa sean.

⁴ Nea ng'eanyiida was haghweeda mida murdajeega mujiinajeega jea oatawa fuga Lawi, hawundaanyi iing'eada ghamarda mujiini gajea geeshan sagalama aba meadajeega sean.

⁵ Ak agooga gajooteena riteayda mujiini meatkweeda ghayeawa geeshan sagalamnyooji iyeenya, nea wiilooda ng'eanyiida biyeara gajea geeshan sagalamnyooji iyeenya, nea meatkweeda biyeara gajea geeshan sagalamnyooji iyeenya, nea meatkweeda gal wiilooda ng'eanyiida ghayeawa gajea geeshan sagalamnyooji iyeenya, nea gwanda mujiini bugusta. Nih heeda nyaawa was haghweeda aba mujiinajeega.

⁶ Nea mujiinajeega jea oatawa fuga Lawi, gajea mujiinaji lah simng'awiisa, was heechea eayiin siida bwar siida, ghoah heechea gamng'awsa; nea nih gajoatawa mujiinaji suuk haradam ea iyeenya.

⁷ Mujiinajeega sean jea oatawa fuga Lawi gajea mujiinaji haradam ea sis; gajoatawa mujiinajeesu aba heeda haghweadaanyi.

⁸ Nea aba mujiinajeega jea oatayda aba ng'eanyiida ambal fuga Israeli, aba jeeda fuga saang'a gajoatayda mujiinajeega saang'a; nea aba heeda fuga ng'ay gajoatayda mujiinajeega ng'ay; giliwas sih aba giteena hearaniischoadaanyi jea gwahearan, gayghoadaw fuga Lawi mujiinajeagaaschi.”

Mujiinajeega simng'awiisa

⁹ Ng'ata goobalool NG'UTAMIIDA Musa, ak gwayeesha,

¹⁰ “Abaloola fuga Israeli, ak giyeeshi, Iyoakghaawi eenda Yordani ak gooweayi jeeda ng'eanyiida Ganaani,

¹¹ abeeda gajasisiina geat mujiinajeega jea ghoah mujiinajeega jea amng'awiisiina agooga; ak abeeda siida iibwar siida, nea mabaysiina, abeeda gaygamng'awsa hoowa.

¹² Ak gayghoah mujiinajeesu aba heedeang'wa heeda jea amng'awiisiina, ak goomng'awi heeda siida gasa ghawalda mureandooda, ak abeeda ea meabwara siida bwar siida, bwak ea ghwahita madeeda girgweageeda eergweaksa.

¹³ Nea mujiinajeesu jea oatawaan gayghoah aba heedeang'wa mujiinaji lah jea eemng'awiisa.

¹⁴ Gajoatawa mujiinaji samwagu mida giigheawda niirja bea Yordani, ak gajoatawa mujiinaji samwagu aba ng'eanyiida Ganaani; mujiinajeesu gayghoah mujiinajeega jea eemng'awiisa.

¹⁵ Mujiinajeesu allahiin gayghoah mujiinajeega jea eemng'awiisa aba badahuuka fuga Israeli, ea aba badayda rabascheanda, ea aba badaydeaba rabascheanji mida jeenyaawa nea rabascheanda; ak abeeda siida bwar siida, nea mabaysiina abeeda gamng'awsa hoowa.

¹⁶ “Ama deepa ghabwara dabicheanda was gharinyeanda, ak ghami, abeeda ea siida reang'u; aba huumwa siida bwar siida eara niny gajeabwar ghami.

¹⁷ Ama deepa gafta lagheaneeda mida geatindaanyi, ak ghabwar siida gil, ak eara niny ghami, niny siida reang'u gil; siisi bwar siidean gajeabwar ghami.

¹⁸ Ama bwara bileangida mida geatindaanyi, ak iidu ghabwar siida gil, ak iidu ghami, siisi nireang'u; ak abeeda siisi gajeabwar ghami.

¹⁹ Ak siida jea ghawalda mureandooda foojeanda niny siida jea ghabwar siida nuus siida; asi iiroonyi sea niny, gayghabwar ghami.

²⁰ Nea siida iisit niirja, ak ghabwaay, ghana ghwaradaan ak gafta gida, ak ghami,

²¹ ghana ghwalasa geatindaanyi aba gideaba weajoocheanda gil, ak ghami; siidida bwariin eara niny gajeabwar ghami; aba gideaba niny nireang'u; siida walda mureandooda foojeanda gayghabwar siida reang'u, damanda roonyeewa sea niny.

²² “Nea iisham ak ghabwaay nea mwasida; ghana gafta gida wassean nea mwarada naweeda,

²³ ghana aba lagheaneeda wassean, ama sifta iidu ghami siida, ghana gwadeepa ea mwadaagha ak gafta gida ak ghami, nea mii weajoocheandaanyi gil, nea gwachi ea magasa gwasawan;

²⁴ abeeda gaygooheeli girgweageeda aba siida fut siida ea siida walda mureandooda foojeanda, aba gidabeada deaweedajeega;

²⁵ ak gayghoaghu girgweageeda siidida reang'uun aba geatinda siidida walda mureandooda foojeandean; ak gayghoadealda girgweageeda gabiikta jeeda mujiineadaanyi mang'awsa, was dea ghayi mang'awsa; ak gaygoobiida jeeda ea ghami ashoohoocheanda haw, was dea simwaar aba nagheeda ghaydit.

²⁶ Nea siida bwar siida iiweah damanda wassean ak ghwanaawa moonghoodeaba mujiineedida simng'awiisean, was dea mang'awsa;

²⁷ ak ghwadaah siida jea ghawalda mureandooda foojeanda, nea ninaawa moonghooda mujiineadaanyi mang'awsa, ak gwadeagu siida jea ghawalda mureandooda aba foojeanda siidida reang'uun, mayghwanyas giidiinyeanda aba foojeanda;

²⁸ aba gideaba gwachi niny gammiisa giibinda jeeda mujiineadaanyi mang'awsa ea ghwahita damanda miyeeda ashoohoocheanda haw; amadu nea ning'ata miyeeda ashoohoocheanda haw abeeda siisi reang'uun gaygabiikta ea gawa ng'eanyiidaanyi bea hearaniischooda.

²⁹ “Ng'asheesu gayghoah diigheanda ea deaweeda aba heedeang'wa, aba jeacheengeagwa sean aba giibindeang'wa sean.

³⁰ Nea siida wassean jea ghabwar siida, abeeda siisi bwar siidean gajeabwar ghami aba ghuusiga mushoodiga; ak siyagi was muushoocheanda ea moamu gamuuwu ng'asheega siida ak geenuus.

³¹ Ak ea adoawaldi leadeeda aba eaweega siida bwar siida, ak gwandeawa giidiinyeanda miyeeda; gajeenuus.

³² Ak ea adoawaldi leadeeda aba badayda siida mang'awsa mujiineadaanyi was dea mang'awiisa, ak abeeda gabiikta gicha goobiida ng'eanyiida, ea ghwahita miyeeda ashoohoocheanda haw.

³³ Ak abeeda ea moang'udani ririnnyeanda ng'eanyiida oopiiti; aba gideaba foojeanda gang'uta ng'eanyiida ririnnyeanda; ak ea manda haleanjeeda ghadooweeda jea ghwaahiit aba badayda ng'eanyiida, aba badayda foojeanda weayeesa jeeda, geaghus foojeandeaba siidida ahiidaan.

³⁴ Asi adoabwari ririnnyeanda ng'eanyiida oopiiti, was dea eabiiti jeeda eara aniini; aba gideaba aniini NG'UTAMIIDA geabiiti jeeda fuga Israeli.”