HOSEYA 5 - Bibliyeeda Ghaydit

¹ Oaleaydiit, Ea ashoohoodiga! Ayiing'sheena, Ea gheeh Israeli! Oaleaydiit, ea gheeda sugoocheanda. Aba gideaba girgweaksiinda gabeaheegwa agooga; agooga noowooschi gadageeda aba Mispa, ea ghaseeda siwiilsa badayda ng'eanyiida Dabori.

² Nea ea nighurghur shoomanda sheagi jih aba Shitimu; ak aniini gaydaaga ghoorjooda sean.

³ Aniini ghaanali Efraimu, nea Israeli ea meafunyanaani; ak ghamneawa, Efraimu, ea nihiseadi, ak Israeli ea sibwara ririnnyeanda.

Hoseya gwareekusa hiseadayeanduumeeda

⁴ Gadiyoojiga nyaawa mwanung' ghwanyas biiksiinda ASEETA. Aba gideaba gwanda jeesinga nyaawa guroorooda hiseadayeanduumeeda, nea ea mudu ghwanal NG'UTAMIIDA.

⁵ Nea ghwarjeeda Israeli iissa geedeaksa gheamamuunatka nyaawa; Efraimu gayghoabeada aba ramaseandaanyi; Yuda eara niny gayghoabeada sea saawa.

⁶ Gaygaweay saawa sea hawaniga nyaawa bea nooga ea dugwa gagaseada NG'UTAMIIDA, ak ea mayghwanyas heeda mida niny; aba gideaba ning'amwa heeda nyaawa.

⁷ Nidatas masaweega nyaawa aba heeda NG'UTAMIIDA; aba gideaba niji diibiga jarooda. Ak ghamneawa sheeda sing'usha gaygahuuyda saawa ea madameega nyaawa.

Ng'ucheeda Yuda sea Israeli

⁸ Aghuuda durumbeati aba ng'eanyiida Gibea, ea durumbeati aba Rama. Anung' ghwanya nyeashta aba Bet-afeni; aboadana, ea Benjamini!

⁹ Efraimu gajeanung'wa heeda eaweeda girgweaksiinda, aba jeeda eemoojiga Israeli gearugu gichea ghoah huumeanda.

¹⁰ Sugoodiga Yuda niwuurji fuga geaniida hilooga moonghajeega; ak gaydahisa nyarasteanyu gawuurji beega.

¹¹ Efraimu simwanmwan, sijakta aba jeeda girgweageeda, aba gideaba ghamwas ghwaat geeshta ng'asheega marachi gil.

¹² Ak ea neawuurjeewi muguyga aba heeda Efraimu, ak nea ea neawuurjeewi munyinda aba gheeh Yuda.

¹³ Iidu nea ghwadaah Efraimu geayoadaanyi, nea Yuda ghwadaah deaneadeadaanyi, hean ghang'eat Efraimu gawa ng'eanyiida Ashuru, goojeaksa heeda sugoocheanda haw. Ak ghwaraay ghoahaabeagwa ghana ghoahaap deaneaduutkeagwa.

¹⁴ Aba gideaba aniini gaydawuurji ng'adiida aba heeda Efraimu, nea gaydawuurji dayeenda ng'adiida aba gheeh Yuda. Ak, hean, aniini gaydabwaashaada ak gaweay, hean gaydasar ak ghaayaachi, nea ea manda siichea ghaweat.

¹⁵ Gaydabiikta gicha heeda eabiiti, bwak ea gwaduukuunana ramaseanda nyaawa ak gagaseadaneani, aba jeeda sawanaduutka nyaawa gaygagaseadaneani, nea gwayeena.