HOSEYA 13 - Bibliyeeda Ghaydit

Girgweageeda huuydean bea Israeli

¹ Damanda baloola Efraimu, ghaboadan buuneeda; ak ghoaghaambiit geaw aba Israeli; ng'ata gwasin ramaseanda aba badita Baali ak ghami.

² Ak ghamneawa ea nileakleakgh sinita riing'eeda, nea nisissa geat sanaamu, sanaamooda sina gearinda aba lapiyeeda nyaawa, nea sean geesina geatinga fuga geariri. Nea gwayeeniisa, abarsiina lukghumajeega. Ak headiga ghwanung' ghwasam gheatkweaka muhooga.

³ Hean gaygawuurji shamooghooda sakteayda ghana gawuurji rahooda inyeesa gabay goosha sakteayda, gawuurji ghuusiga booga dardaawa heeda silakiisa booga ghana aroosta riteawa seawadeeda.

⁴ Aniini geawooschi NG'UTAMIIDA was ASEATAANG'U gidang'eada ng'eanyiida Misri; agooga ea moanali ASEETA nuut geaghus aniini, nea manda lealnoocheanda nuut jea ghwanaawanaan.

⁵ Aniini ghayi ghaanaleay aba jeeda dareapcheeda, jeeda ng'eanyiida ghajaam.

⁶ Hean gweagiischi ea gwalang'u, hean gwalang'u, ak gagwareesa gurooruunatka nyaawa, ama ng'ata gwajaktanean.

⁷ Ak aba heeda nyaawa gaydawuurji ng'adiida, gaydawuurji mariirda darat gheata naweeda.

⁸ Ak gaydeabisa saawa gawuurji idarooda siireat dayeagaaschi, ak gaydaganyeadi banyeega daghanuunatka nyaawa, ak aba hoowa gaydaak banyeega nyaawa dawuurji ng'adiida, gawuurji diyeayda jarooda gayghabwaashaada saawa.

⁹ Gaydahuuydaneegwa, Ea Israeli; ak gayghaweadeagwa ng'eaha?

¹⁰ Gwanda yeenu ghamneawa sugoocheandeang'wa jea ghaweanyi; gwanda yeenu fugeagwa hees sean jea gafureegwa– gea ghayi ooyeenyi, “Goonean sugoocheanda ea fuga hees”?

¹¹ Aba nyarasta ea neagoonyeegwa sugoodiga, ak ea neageandi aba nyarasteanyu.

¹² Munyinda Efraimu sirat, nea riing'eadaanyi ea siitiiw aba jeeda gijigooda.

¹³ Ninyas sawanaduutka uurji dea gatmooda gasa jeata, niny orjeeda nyeah fughareeda gil; aba gideaba ghamneawa mooneekiisiina geaw naweeda jeata.

¹⁴ Ak gaydalealna saawa jeeda uurda gheeda miyeeda? Gaydalealna jeeda miyeeda? Ea gheeda maloonghajeega, gwanda yeenu bayiigaagu? Ea gheeda miyeeda, gwanda yeenu nyarjeawdaang'u? Baydeayda sifunya gheanyangeasu.

¹⁵ Hean eara ghoamu ghwaliindanda muudayeanda, jeameeda heeda ghayeawa, was jeameeda NG'UTAMIIDA, gayghwahidu, nea gang'eena jeeda dareapcheeda; ak gayghwajaam eenigaaschi, nea gheanyanga eenigaaschi gajeakghajaam; ak gayghaghas gheaseadaanyi mida haleanjeeda haw sheayeat.

¹⁶ Samariya gaygwasar giidiinyeandaanyi, aba gideaba nijakta ASEATAANYI; gaygahuuyda ng'utkeaka, nea diibiga nyaawa gajealajaada bugusuunatka, nea gadeemga nyaawa gweayiideadi gajeabwaashaada jeesinga nyaawa.