HOSEYA 11 - Bibliyeeda Ghaydit

Bariinyeega ASEETA aba heeda fuga heawa ng'asheagaaschi

¹ Damanda waseewa Israeli baleanda, ghaabwariiny niny, ak geaguursi orjeedeanyu gwarina Misri.

² Nea Iinyo daguuriisa saawa, hean ghang'amwa madeedeanyu aba uurda; ng'ata ghoadaw Baali haleanjeeda sisabwa geadi sigwariida, ak ghaghwarda lukghumajeega ghoadaw sanaamu.

³ Nea ea aniini gil siida aanaalji Efraimu beata, ak ghaasareani geatingeasu; nea saawa ea mwanala gideaba ghaahaapchi.

⁴ Ak geasheedeawi saawa aba ghealooniga baydeayda, ea ghealooniga bariinyeega, ak aba heeda nyaawa ghaahuuyi siichea gootin yookajeega mida gheatkweaka nyaawa, ng'ata geahing'si geaw saawa ak ghaang'aati.

⁵ Gaygabiikta ng'eanyiida Misri, ak Ashuru gayghoah sugoocheanda nyaawa, aba gideaba niheawa gwayamsean geat.

⁶ Nea gaygoobisa ng'uta jeeda mujiinajeega nyaawa, ak gwaduudu gida sirata ghuusiga gealga nyaawa, ak gaygahuuyda sean aba jeeda ghamarda nyaawa.

⁷ Nea fugeasu ea nihiiy geat aba nung'usiindeanyu bea heeda; ak ea sirasa yookajeega, nea ea manda siichea gootina gheatkweaka nyaawa.

⁸ Gaydaamuustaan dajaktaneey, Ea Efraimu! Gaydaamuustaan danung'waadaneey, Ea Israeli! Gaydaamuustaan danung' uurjeewana Adma! Gaydaamuustaan dasimaneey gideasimi Seboimu! Gurooroodeanyu niyam geaw aba jeedeanyu, baydeaydeanyu niyeat muuchi aba headaang'u.

⁹ Maygudu dagadiyeata ng'weaninda nyarasteanyu, maygudu dabiikta dahuuyda Efraimu; aba gideaba aniini geawooschi ASEETA nea meawoosi siida, ea agi siida ghaydit aba bugusteang'wa, nea ea maygudu doan dahuuyda.

¹⁰ Gaygaweay gagaseada NG'UTAMIIDA, ak gayghoamuumda ng'adiida; ea, gayghwanya ghuuta, ak diibigaaschi gayghapkaana heeda biyeara nea ghaboadanaan;

¹¹ gayghapka nea ghaboadananda dariidaka leabu Misri, ea ghariibajeega leabu ng'eanyiida Ashuru, ak gaydanung' gabiikta gealga nyaawa, gwarugu NG'UTAMIIDA.

Israeli ea Yuda geenyareeksa

¹² Efraimu nineaweesean aba ng'uyeega, ea gheeh Israeli aba reengaweega; nea Yuda ea gudu ghwanal ASEETA, nea doabiiwaat aba heeda siida asagi ghaydit.