HOSEYA 1 - Bibliyeeda Ghaydit

¹ Ng'asheanda NG'UTAMIIDA ghayi hidu heeda Hoseya orjeeda Beri, damanda Usiya, ea Yotam, ea Ahasi, ea Hesekiya, was sugoodiga Yuda, ea damanda Yeroboamooda was orjeeda Yoashi, was sugoocheanda Israeli.

Gatmooda ea diibiga Hoseya

² Iimuchu nea ghoang'eat NG'UTAMIIDA baloolda aba ghuuta Hoseya, hean gwayeesha NG'UTAMIIDA Hoseya, “Una gheana gatmooda hiseada, ak goojiili diibiga hiseadayeanduumeeda, aba gideaba fugeaba ng'eang'i gwasin hiseadayeanduumeeda haw aba gideaba ghwanung'waada NG'UTAMIIDA.”

³ Ng'ata ghang'eat gawa, ak ghaghi Gomeri, huda Diblaimu. Ng'ata gagweayiit Gomeri ak gwajiilsa niny baleanda.

⁴ Ng'ata gwayeesha NG'UTAMIIDA, “Ng'assiina gheawunga jeebi ak giguuri ‘Yesreeli,’ aba gideaba siipuut gheadi mwanang' ak ghaalaschi gheeh Yehu aba bayiiga ghayi sin aba mooheeda Yesreeli. Ak gaydahuta sugoocheanduumeeda aba jeeda eemeeda Israeli.

⁵ Nea eaweedida gaydahirja ghuweanga Israeli aba mooheeda Yesreeli.”

⁶ Gabiikta gagweayiit gicha, ak gwaji huda. Ng'ata gwayeesha NG'UTAMIIDA, “Guureewana gheawungaaschi ‘Meebwayda’, aba gideaba maygudu dabwariiy Israeli gicha nea ak ea maydasamsa earahay.

⁷ Ak gaydabwayda fuga Yuda ak gaydalealu, Aniini NG'UTAMIIDA, was ASEETA nyaawa, gaydalealu, nea ea maygaba uurjeenga shirikara, ghana ghuweang'da, ghana ng'uta, ghana faraasi, ghana fuga ding'iida faraasajeega.”

⁸ Hean ghoashuukghu “Nea meesamsiina”, gagweayiit gicha, ak gwaji baleanda.

⁹ Ng'ata gwayeesha NG'UTAMIIDA, “Guureewana gheawungaaschi ‘Mii fugeasu’ aba gideaba agooga mudu awasa fugeasu, nea eara aniini ea mutawoos ASEETEANG'WA.”

Fuga Israeli gajeanung' gafuuf

¹⁰ Ak mooneeda fuga Israeli gayghwasaang'ayiita iseaskweanda ghuuta basooda, nea ea mwoamu eeroor ghana eeyiida. Aba heeda ghayi eeshiina ASEETA, “Agooga moowoosi fugeasu,” ak nea ghamneawa gwayeesha, “Agooga goowooschi diibiga ASEETA mideawa eaweega.”

¹¹ Ng'ata gaygaguuyi fuga Yuda sea gea Israeli ak ghwaloat siyagi ghoah sugoocheanda nyaawa; aba ng'ata gaygabaruuri aba ng'eanyiida nyaawa. Nea abeeda gayghoah eaweeda ghaambiidaat bea Yesreeli.