HEAREEGA 4 - Bibliyeeda Ghaydit

Yerusalemu iing'ata giibeedeaydaanyi

¹ Neada iijea gwatuudu dahaabu, iijea ghwayamwa dahaabooda miyaas! Sihista lagheanga heeda ghaydit uhuuda gilinyoo ea naweadinga mujiini gil.

² Orjooga miyaasiin bea Sayuni, gala geat sea dahaabooda miyaas, geaghay gideaba dabita sisna sigeeda gil, was gadiyeeda geatinga siida!

³ Eara fureayooda inyeessa gooruudu ginneadaanyi ak gooreer dayeandaanyi, ak hudeaba fugeasu ea ning'waaniit shageerooda mida dareapcheeda.

⁴ Ng'ushapta baleanda reer nighajaamiit aba muwooshta; diibiga gamus hamita, ak ea manda siida adaw.

⁵ Giika ak haleanjeeda miyeenoodean sinung'wa heeda aba jeeda naweadinga mujiini; nea gabwa geat giika akwa hang'weaka oomng'iin iissa gwalil aba ghuusiga deareeda siimughuush.

⁶ Aba gideaba riing'eeda huda fugeasu aahaw, ea ghang'al lasooda Sodoma, ghayi sinung' goosha aba geeshangiga, ak ea manda geatinda siyiin uhuuda.

⁷ Fugaaschi hees aamiyaas ea ghang'al gapkeanda, ea eashish ea ghang'al eanooga; saseenuuka nyaawa ea areeri ea ghang'al oomnata, nea alooheeda sasanuuka nyaawa gameaji ea oomu.

⁸ Nea gheamamda nyaawa ea duwas ea ghwalaabwa hoowa ghuurga, ea meanala aba naweadinga; mughooka nyaawa ghwanoas geat sea geaka nyaawa, nea ghaghajaamiit ea gawuurji geeta.

⁹ Ghang'wana fugiga sibwara ng'utean mwasamwa giika bwar jaloodean, aba gideaba suh gajeabaseadi aba gideaba mwanyasa haghweega madamnyeanda.

¹⁰ Geatinga gadeemga mideawa baydeayda nilalach saawa diibiga nyaawa; ak ghoah hamita nyaawa aba gida sinung' gooshealda mujiineeda fugeasu.

¹¹ NG'UTAMIIDA niihiimu ng'weanindaanyi, nea goobuugu nyarastaanyi ng'waan; ak ea niyeat beasta aba Sayuni, nung' goosha sindeetaanyi.

¹² Sugoodiga ng'eanyiida mamwasa, ghana fuga mida badayda ng'eanyiida sean, gideaba weajoocheanda gaygawa ghuuta dooshta Yerusalemu.

¹³ Nih gwasin riing'eega sibangaaschi ea giidiinyeanyeeka ashoohoodigaaschi, ghayi ahiida foojeanda fuga doobiiweadi aba bugustaanyi.

¹⁴ Gwaneaydooschi aba naweadinga gawuurji siida ng'oaw, sibwara ririnnyeanda foojeanda ak ea manda siida jea ghwasat hang'weaka nyaawa.

¹⁵ “Goojuursa buuneeda saawa nea gwayeesha, Ang'aamwana hiji! Ririnyeanda!” “Ang'aamwana hiji! Ang'aamwana hiji! Adoasachi!” Hean gaweay ghoah fuga weelweel neaydooschi; ak gwayi buuneeda aba bugusta eemoojiga, “Maygudeendeayeena aba hiji giligeaw.”

¹⁶ Nisach saawa nyarasta NG'UTAMIIDA, ak niny ea maygudu goong'weersa saawa; mutgwaduupa gil ashoohoodiga, eara gweargwa mutgamanya gil.

¹⁷ Gheanyangaasa nibur aba giing'weernooda gasooda weeta; aba giimuukghunoodeanya geamuughu eemeeda maygwalealu fih.

¹⁸ Buuneeda gwadagu geeshteanya ak ea mwajeayaada naweadingaasa; mudeanoodeanya nineekiit; eawoojigaasa sinal mooneeda; aba gideaba nihidu mudeanoodeanya.

¹⁹ Fuga eadu geeshteanya ea asasi ea ghang'al murgheata mida humng'eeda; gweadu geeshteanya aba iheenga giijeega, ak geegwalgwaleeseasa aba dareapcheeda.

²⁰ Jeameeda sareenuukaasa nimwaar NG'UTAMIIDA, ak geeyeana jeesinga shoomeanga nyaawa, ninyeeda was dea ayi, “Aba jirooneadaanyi gaygoobiida bugusta eemoojiga.”

²¹ Ng'weela nea gihoosani, Ea hudeaba Edomu, iibiiti ng'eanyiida Usi; eara aba headaang'u gayghang'ata gharajeanda; gayboogida ea jakta hang'da dawshiida.

²² Lasoodeang'wa bea munyasnacheekeagwa nihita damanda, Ea hudeaba Sayuni, maygudeayaanyi ghealooniga; duuku munyasnacheakaagu, Ea hudeaba Edomu, gajealasnyi, ak gajeajaat riing'eagaagu.