HEAREEGA 3 - Bibliyeeda Ghaydit

Lasooda, Duukuunooda, ea Rarooda

¹ Aniini geawooschi siida nidaah hang'weanidooda aba bileangida nyarastaanyi;

² ghamwanmwanan ak gweanean jeeda misaneeda nea manda weeshinda;

³ aba huumwa ghwayam geatindaanyi aba badaydeanyu gicha gicha askwearda sean.

⁴ Niibwara saseedeanyu ea mughoowoodeanyu darari, ak gwahirja geakeasu;

⁵ nineaweesean ak gookwealan ng'weaninda ea sawanadeeda;

⁶ Ninung' deabiida jeeda misaneeda gawuurji muscheekeaba garayi.

⁷ Nineaweesa meatkwajeegeasu sean ghamarda ak ea maydaamu darita; ak ghwayiin munyaloalajeega durumani badaydeanyu;

⁸ earapeadi eaguurdi nea geayeawdi aba gasooda weeta, ea mooleeysiina iit mooshteanyu bea ghawooda;

⁹ nidukuta naweadingeasu aba lagheanga sisin, ak ea nighwana naweadingeasu.

¹⁰ Niny aba heedeanyu gawuurji idamooda mida radiida, ak gawuurji ng'adiida fuy geaw;

¹¹ nisach naweedeanyu ak ghabwaashaadanaan; nea ghwanung' ghang'udan salgheang'da;

¹² nighasa ghuweang'daanyi ak ghwanung' deaw shagoorda geacheadaanyi.

¹³ Nifut gurooroodeanyu aba geatka mida jeeda rookghtaanyi;

¹⁴ naahuuyi gisibara reari aba heeda buuneesean, nea gwashateewean sarmoojiga nyaawa askwearda sean.

¹⁵ Ak ea nirghan aba ng'weaninda, ak ea ninung' danukghuta gidang'waan.

¹⁶ Ning'aala geeshatkeasu lagheanga manang'i ak gagiishachi, ak ghwanung' dala jeeda deareeda;

¹⁷ nisheagiida gurooroodeanyu hoyyoo, ak ea niroosean hooseaneega;

¹⁸ hean geayeenyi, “Nuwa giigheambiiteanyu, ea gidaararji aba heeda NG'UTAMIIDA.”

¹⁹ Apkaada sawanadeedeanyu ea hang'weanidoodeanyu, ng'asheega ng'weani aanyaschi uurji udamayiischeanda!

²⁰ Jeedeanyu gutghoapkaat ng'asheesu ak ea nihiiy geaw aba jeedeanyu.

²¹ Geaguursi aba fughareedeanyu, iidu geandeawi rarooda:

²² Bariinyeega huumwa bea NG'UTAMIIDA meashealana, baydeaydaanyi manda muudeanooda;

²³ iissa gili nyooh ea sakteayda gil ea eesh; doobiiwnataanyi aahaw.

²⁴ “NG'UTAMIIDA gharmucheandeanyu gil,” gwarugu jeedeanyu, “asi geandeawi rarooda aba niny.”

²⁵ NG'UTAMIIDA aamiy aba gea amuughu niny, aba jeeda gasa niny.

²⁶ Aamiy gideaba siida gayghoamuughu lealeanooda NG'UTAMIIDA nea ghwasiinda.

²⁷ Aamiy gideaba siida ghwasar yooki aba gheareemaneanduumeadaanyi.

²⁸ Asi deapteada nea gabwa geaw ak ghwasiinda aba gideaba siyiin suh badaydaanyi;

²⁹ ak dayiina ghuutaanyi birjeanda– ak abeeda ghoah gichea gayghwasar;

³⁰ daadawa madeang'daanyi siida jea ghwalas, ak gajeelang'u aba giing'weaka.

³¹ Aba gideaba NG'UTAMIIDA may gwajaktaneasa ea ghoah damanda manda muudeanooda,

³² earapeadi ninung' ghang'ut gurmeahiida, gayghabwayda aba giteena seang'ayda bariinyeagaaschi;

³³ aba gideaba niny magasa gwasawan buuneeda ghana ghang'uda gurmeahiida orjooga buuneeda.

³⁴ Ak gaygooleapsa ng'eanyi fuga sean mida ghealooniga bea badayda ng'eanyiida,

³⁵ ak ghwasach gitoobiiwsa siida aba madeeda ASEETA haw bea humng'eeda,

³⁶ ama sisach gidadoobiiwsa siida, ea magasa Ng'utamiida.

³⁷ Ghoamu gwarugu ng'eaha ng'asheanda ak gwasa, meakghusa ghamwas Ng'utamiida?

³⁸ Neada ghuuta ASEETA haw bea humng'eeda maygwaleabu gea miyaasiin ea gea munyasi?

³⁹ Ghwasaan anda ghoaniikgh siida majeek, aba badayda riing'eagaaschi iisilas?

⁴⁰ Eesawsiina naweadingaasa ak, geebiiksi NG'UTAMIIDA!

⁴¹ Eamiinda gurooruunatkaasa ea geatingaasa nea geekeali heeda ASEETA mida humng'eeda:

⁴² “Aseasa siitiinyi nea geaheawaneey, ak ang'iing'i ea mii samseasa.

⁴³ “Ang'iing'i nidukuti geaw aba nyarasta nea giyeadu geeshteanya, ginuusi nea mibwaydani;

⁴⁴ nidukuti geaw aba shamooghooda ak mooshteanya bea ghawooda ea manda heechea gwasik.

⁴⁵ Ninung' eewuurjeewana ghweashayda ea haleanjeeda mwadaagha aba bugusta buuneeda.

⁴⁶ “Weajoodigaasa sean nijuukeasa;

⁴⁷ nihiseasa muuwda ea shoomanda siipita aba badahuukaasa, ak ghwadataseasa nea gwanyarjaneasa;

⁴⁸ gheanyangeasu gooreemna eeniga dabeaka aba nyariida huda fugeasu.

⁴⁹ “Gheanyangeasu gaygagulda dabeaka moosha, nea mwang'ada,

⁵⁰ bwak ea goong'weersa NG'UTAMIIDA humng'eeda ng'eanyi ak ghwadaa;

⁵¹ gheanyangeasu ghang'udanaan gurmeahiida aba ng'asheega haweega sean bea mujiineedeanyu.

⁵² “Aniini geayaaganaan shageata dawuurji dariideanda aba gisin weajoodigeasu nea mwanung'waada;

⁵³ saawa gwajaksean jeeda shoomanda nea gutawoos majeek ak geefuteewean lagheanga;

⁵⁴ gwasik beega saang'a uhuudeanyu; ak geayeenyi, ‘Aniini naaroachi.’

⁵⁵ “Ak geaguursi gheawungaagu, Ea NG'UTAMIIDA, aba jeedeaba shoomandida sheagi jihiin;

⁵⁶ giyiinyi ghuuteanyu, ‘Ak ea midukutani iitaang'u aba shookeasu eagasayi weeta!’

⁵⁷ Gihidu murdeedeanyu damanda eaguurnaneey; ak giyeeni, ‘Adibeali!’

⁵⁸ “Ea NG'UTAMIIDA, niweachaan aba sawanadeedeanyu, nea giighuuhi eaweegeasu.

⁵⁹ Nidaahi ng'asheega munyas sisimaneani, Ea NG'UTAMIIDA; argweaksiinanean ng'asheandeanyu.

⁶⁰ Ang'iing'i nidaahi mureandooda nyaawa sean, ea ng'asheega nyaawa sin aba badaydeanyu.

⁶¹ “Ea NG'UTAMIIDA, niyiinyi giing'weaka nyaawa, ea ng'asheega nyaawa sean sin aba badaydeanyu.

⁶² Ghuusiga nyaawa ea fughareeda siida gasa ghabwaran gwanda badaydeanyu askwearda sean.

⁶³ Ng'ula giipteadayda nyaawa ea gidang'eata; sarmeeda nyaawa aniini.

⁶⁴ “Gaylasa saawa, Ea NG'UTAMIIDA, aba giduurji gadiyeeda geatinga nyaawa.

⁶⁵ Gajadawa saawa meaynata guroorooda; habeawoadaang'u gaygwanda badahuuka nyaawa.

⁶⁶ Gajaada geeshta aba nyarasta ak gaynung' goosha saawa aba badayda ng'eanyiida, Ea NG'UTAMIIDA.”