HEAREEGA 2 - Bibliyeeda Ghaydit

Ng'utamiida ghwalas Yerusalemu

¹ Gawuurjiin Ng'utamiida aba jeeda nyarastaanyi niyiin mujiineeda Sayuni hing'eadayda shamooghooda! Ak gwajakna alooheeda Israeli humng'eeda ea ghwahidu ng'eanyiida ak ea miighoapkaat gheanyi sibata ASEETA aba eaweeda nyarastaanyi.

² Ng'utamiida ninyarja giibinda sean bea Yakobo nea mabwayda; aba nyarastaanyi ninyarja hoorgeeda majeek bea hudeaba Yuda; ak gweadu ea ghoahiita ng'eanyi badayda sigeeda aba nyoota mureeda aba heeda sugoocheanda sea fugaaschi ambaliischi.

³ Nilach uurda sean bea fuga Israeli aba nyarastaanyi ng'waan; niidealda bwadaw geatindaanyi bea dugwa aba madeeda weajoodiga; ak ea ninung' gooshealda Yakobo beasta yeat, ak meadajeega sean

⁴ Nirateayda ghuweang'daanyi dea weajoocheanda, nea geatindaanyi bea dugwa gawuurji weajoocheanda, ak ea ninuus sean gea bwariiy gheanyangaasa aba jeeda maheemajeanda hudeaba Sayuni; niidalealu nyarastaanyi ng'waan uurji beasta.

⁵ Ng'utamiida niwuurji weajoocheanda, ak ea ninung' goosha fuga Israeli; ak ea ninung' goosha gealga sean bea sugoodiga, nea gwanyarja heeda giibindaanyi; ak ea niiheasa hudeaba Yuda giinyahuushooda ea gutuunooda heareega.

⁶ Ak ea ninyarja gheanyi gawuurji diita bea boostaaniin, nea gwanyarja heeda ghweelmoojigaaschi; NG'UTAMIIDA nihuta eaweeda haw bea ghweelmeeda ea sabaato aba Sayuni, nea aba nyarastaanyi ng'waan ea nifool sugoocheanda ea ashoohoocheanda.

⁷ Ng'utamiida niheawa headaanyi bea wagiida, ak ea nisit eara headaanyi ghaydit; ak ea niyiin geatinda weajoocheanda ea ghamarda ghoorajeagaaschi; nea niijuur aba jeeda gheeda NG'UTAMIIDA nea gawuurji sea dea eaweeda siloata bea ghweelmeeda.

⁸ NG'UTAMIIDA nimanya gideaba gaygwanyarja ghamarda hudeaba Sayuni; ak ea niiroor aba moonghooda; ak ea mwaadeala geatindaanyi aba nyarjeawda; ak ea ninung' gagutu heareega hilgweanda ea ghamarda, nea ghwajaam sean duwaawi.

⁹ Dooshingaaschi niibita jeeda sigeeda; ak ea ninyarja nea gwahirjeaweada darearjeagaaschi; sugoocheandaanyi ea fugaaschi hees gwanda bugusta eemoojiga; ea mudugwanda deaweeda, ak sibangaaschi ea manda gisiihiimsa aba heeda NG'UTAMIIDA.

¹⁰ Gweargwa huda Sayuni inyeessa goopteada aba ng'eanyi nea ghwasiinda; ak geejaksa birjeanda iheenga nyaawa nea gwarasa mananuunatka nyaawa hang'weaka guniyajeega; haweega Yerusalemu gakula iheenga nyaawa ng'eanyi.

¹¹ Gheanyangeasu nibur aba dabeaka; jeedeanyu nideawiit; gurooroodeanyu geayamsi badayda ng'eanyiida aba sawanadeeda aba gideaba bayiiga huda fugeasu, aba gideaba diibiga manang'i ea gea reer goohiili aba dang'adga mujiini.

¹² Gooyeawda aba badahuuka gheamadiga nyaawa “Gwanda yeenu mukaate ea difaayi?” siida sisawan aba dang'adiga mujiini, damanda ahiidaawa eaweega nyaawa aba daghanuunatka gheamadiga nyaawa.

¹³ Ghamneawa gaydayeeshiineeyiin, ak gaydagalaneey naaha, Ea huda Yerusalemu? Ak gaydanung' uurjeewana naaha ak geageandeawaneey salgheang'da, Ea huda miyeasat bea Sayuni? Aba gideaba nyariidaang'u gwadeena basooda; gayghoamu ng'eaha gooduuneey?

¹⁴ Sibangaagu nidaah gisiihiimsa aba badaydaang'u bea ng'uyeega ea gea mwadaagha; ak ea miyeetaajiit ng'asheagaagu munyas ak geeteelnaneey ghealoonigaagu, ak geadaah ng'asheega munyas bea ng'uyeega jea gahuteawi buuneeda.

¹⁵ Fuga sean ng'ata ghabwar baneaguuka nyaawa aba badaydaang'u; inyeessa goodiindiil iheenga nyaawa nea geemachiida hudeaba Yerusalemu; “Nih mujiineeda siguura dea hidaat miyi was hooseaneega ng'eanyiisean?”

¹⁶ Weajoodigaagu sean gwanda badaydaang'u; iissa geeshka, nea goowiiri geeshatka nyaawa, geeyeawda: “Gaydanung' goosha niny! Asi nih eaweeda ghayi sigasayi gil; asi ghamneawa sinyaschi; ak ea sidaayi!”

¹⁷ NG'UTAMIIDA nisin gida ghayi bean gagasiida sinooda bea madeeda, ak gwanyarja nea mabwayda; ak ghwanung' gahoosan weajoodiga aba badaydaang'u, ak niidiing'u uurda weajoodigaagu.

¹⁸ Ayeawusiina muuchi Ng'utamiida! Ea hudeaba Sayuni! Nung' gaklu dabeaka gawuurji eenda askweari ea eawa! Ak ea mayfuufa, nea mwahawda gheanyangaagu!

¹⁹ Ng'eada, eawa ak giiyeawdi, aba giing'eeta ghuuta giing'weernooda! Ahiida gurooroadaang'u gawuurji beega aba madeeda Ng'utamiida! Ak gimiindi geatingaagu ageala headaanyi aba eaweega diibigaagu, ahiili aba jalooda aba iheenga naweedinga.

²⁰ Ng'ula, Ea NG'UTAMIIDA, ak gidaahi! Ng'asheesu gisisi ng'eaha? Heapi gadeemga gayghwaak diibiga nyaawa, diibiga nyaawa reeri? Heapi ashoohoocheanda ea sibaneeda gajeenuuksa heeda ghaydit bea Ng'utamiida?

²¹ Aba ng'eanyi gwalil musta orjeeda ea gweargweeda aba naweadinga mujiini; haweegeasu ea orjoogeasu niibeedeayi aba ng'uta; aba eaweeda nyarastaang'u ak ginuusi saawa, nuuseadayda manda baydeayda.

²² Ak ea niguursi gawuurji eaweeda sing'oora ghweelmeeda muuwdeanyu gwanda meadajeega sean; aba eaweeda nyarasta NG'UTAMIIDA ak ea manda dea wapa ghana ghaghu; suh aasareanyi ak ghaarearjiin nilas uhuuda weajoocheandeanyu.