HAGAYI 2 - Bibliyeeda Ghaydit

Alooheeda Gheeda Eesh Sibata ASEETA

¹ Aba gweaydeaba iyeenya bea gheambalmeeda sugoocheanda siyi Dariyo, hita sheedeaba ispwa, eaweeteaba diktam ea agi bea sheeda, ghwahidu ng'asheanda NG'UTAMIIDA heeda Hagayi was ashoohoocheanda,

² “Asi ghamneawa abaloola Serubabeli orjeeda Shealtieli, was sugoocheanda haw bea ng'eanyiida Yuda, ea Yoshuwa orjeeda Yehosadaki, was ashoohoocheanda haw sea buuneesean was boosteanga, ak giyeeshi,

³ ‘Ng'eaha gil siida ghuh aba jeedeang'wa ghayi nidaah gheawi ghayi aba mwadi nea gaba alooheadaanyi? Gawuurjiin ghamneawa? Neada ea mawuurji gidamwadaagha aba madeeda gheanyangeagwa?

⁴ Asi ghamneawa adaghami gurooroadaang'u, Ea Serubabeli, gwarugu NG'UTAMIIDA; adaghami gurooroadaang'u Ea Yoshuwa, orjeeda Yehosadaki, was ashoohoocheanda haw; adagameewa gurooruunatkeagwa ea buuneesean bea ng'eanyiida, gwarugu NG'UTAMIIDA; agadiyeena, aba gideaba aniini geendeayi sea agooga, gwarugu NG'UTAMIIDA bea lugweega,

⁵ gawuurji gideaheeleesiindi sea agooga damanda oorini ng'eanyiida Misri. Gurooroodeanyu gwanda jeedeang'wa; adoabeali.

⁶ Ak gwayi NG'UTAMIIDA bea lugweega: Asi gaydabiikta gicha nea maygageawiit, gaydeaduumduum humng'eeda ea ng'eanyiida ea basooda ea ng'eanyiida ghajaam;

⁷ ak gaydeaduumduum eemoojiga sean, ak abeeda haleanjeeda adiiw eemoojiga sean gayghapka hiji, ak gaydaanyiit gheawi gharbeeda, gwarugu NG'UTAMIIDA bea lugweega.

⁸ Lapiya geasu, ea dahaabu ea geasu, gwarugu NG'UTAMIIDA bea lugweega.

⁹ Abeeda giigheambiita jea gabassa bea gheawi gajeahaweewa dea ghayi bea mwadi, gwarugu NG'UTAMIIDA bea lugweega; ak aba hiji gaydagu miyeenooda, gwarugu NG'UTAMIIDA bea lugweega.’”

Sibaneeda Goobalool Ashoohoodiga

¹⁰ Iihita eaweeteaba diktam ea ang'wan bea sheedeaba shageash, iihita gweaydeaba iyeenya bea gheambalmeeda Dariyo, ghwahidu ng'asheanda NG'UTAMIIDA aba ghuuta ashoohoocheanda siguura Hagayi,

¹¹ “Asi gwayi NG'UTAMIIDA bea lugweega: Anyaasha ashoohoodiga aba gichea gwarugu aba badaydeaba ng'asheanji,

¹² ‘Nea siida iigeanda saruuta biyeeyda ghaydit nea sishiit lukghumeeda ak ghafuy aba weeleeda hang'daanyi, ak ghawaasa hang'daanyi mukaate, ghana nyeanyiida, ghana difaayi, ghana nagheeda, ghana hamita wassean, abeeda gili gajea ghaydidi?’” Ghwasha ashoohoodiga nea gwayeesha, “Manda.”

¹³ Ghwalamda Hagayi ak gwayeesha, “Nea siida iibea ririnnyaan aba gideaba nuwaas gidameah iiwaas gida wassean aba jeedeaba haleanjeeni, abeeda gaygaba ririnnyaani?” Gwayeesha ashoohoodiga Hagayi, “Gaygaba ririnnyaan.”

¹⁴ Hean gwayeesha Hagayi, “Asi gwasunu eara aba fiisu, ea aba heedeaba eemeeni mida madeedeanyuun, gwarugu NG'UTAMIIDA; ak gwasunu eara gadiyoojiga geatinga nyaawa; nea haleanjeeda adayda aba hoowa gaba ririnnyaan.

Ng'utamiida gwaheeleesa giidaydeayda ghawoadaanyi

¹⁵ Ghamneawa amwaasha ASEETA, asi ang'ula gichea ghwahidu ghang'eada askweareani ea ghoah galanya. Heeda miyeayiina lagheaneeda uhuumba nuut aba deesta gheeda sibata ASEETA bea NG'UTAMIIDA,

¹⁶ abeeda agooga goowuurjeewiin? Damanda hitaawa siida heeda booga ayang'da dulgwajeanda hita geatin diktam, nea aba hoowa ea damanamughuush; nea iiwea siida heeda siitiiwa difaayi gwaramu ghadeat haradam ea damanamughuush, ghwahita nea diktam.

¹⁷ Hean ghaalascheegwa aba geejeeda ea dung'usta ea roopta lagheanga sea gadiyeedeang'wa sean bea geatingeagwa; ak ea mii abiiksean, gwarugu NG'UTAMIIDA.

¹⁸ Oapkaada gidang'eada askweareani ak gagal mwadi, ng'eada eaweeteaba diktam ea ang'wan bea sheedeaba shageash. Ghang'eada eaweeda sisna sindeeta gheeda sibata ASEETA bea NG'UTAMIIDA, eapkaada ng'asheesu:

¹⁹ Heapi gudugwanda mbeeyooda jeeda gijigooda? Ghana geeta sabiibu, ghana shaboogheecheanda, ea goomamaanga, ea geeta saytuunajeanda mudu gwajiila gil? Ghang'eada askweareani gaydagooneegwa ghawooda.”

Heeleesiinda NG'UTAMIIDA sea Serubabeli

²⁰ Gabiikta ghwahidu ng'asheanda NG'UTAMIIDA deaba iyeenya heeda Hagayi aba eaweeteaba diktam ea ang'wan bea sheeda,

²¹ “Eeshiina Serubabeli was siida haw ambal Yuda, ak giyeeshi, niriikghta deaduumduum humng'eeda ea ng'eanyiida,

²² ak geabiimbiinyi hoorgajeega darooraka; ak ea niriikghta dahuuyda uurjeenga darooraka eemoojiga, ak geabiimbiineadi mutukwajeega ea fuga mwanmwan; nea faraasajeega ea fuga mida badahuuka gaygoobeedeayi, giliwas sih aba ng'uta buweacheandaanyi.

²³ Nea aba eaweedida, aba gidarugu NG'UTAMIIDA bea lugweega, gaydageandaneey Ea Serubabeli siideanyu bea gadiyeeda, was orjeeda Shealtieli, gwarugu NG'UTAMIIDA, ak geasinyeey uurjeewana ghuniida mideawa giirooraneeda; aba gideaba naaloacheey, gwarugu NG'UTAMIIDA bea lugweega.”