HAGAYI 1 - Bibliyeeda Ghaydit

Ng'utamiida gwarugu biiksiinda deesta gheeda sibata ASEETA

¹ Aba gweaydeaba iyeenya bea sugoocheanduumeeda Dariyo, ak aba sheedeaba lah, eaweeda madeeda bea sheeda, ghwahidu ng'asheanda NG'UTAMIIDA heeda Hagayi was sibaneeda eassa Serubabeli was orjeeda Shealtieli, was sugoocheanda haw bea ng'eanyiida Yuda, ea heeda Yoshuwaheeda was orjeeda Yehosadaki, was ashoohoocheanda haw,

² “Asi gwayi NG'UTAMIIDA bea lugweega: Fiisu gwayeena mii ghwahidu damanda jea eadeasa gheeda NG'UTAMIIDA.”

³ Hean ghwahidu ng'asheanda NG'UTAMIIDA leabu heeda Hagayeeda was ashoohoocheanda.

⁴ “Nih damanda hit aba heedeang'wa gil gideaba gajoopiidana jeesinga gealga miyaas, nea gheeda sibateewean ea nyaraadi?

⁵ Asi ghamneawa gwayi NG'UTAMIIDA bea lugweega: Asi ang'ula gideabeadi.

⁶ Goohisti booga saang'a, ak ghoalaji gea ng'ay; ak gooyeagiischi, ak ghanyea moolang'uudi; ak gooleeshi, ak ea meahiideagwa; ak gookwealshi, ak ea manda siida nyas shang'shang'anda; nea siida siitaw gidageatinda geataw gidageatinda ak ghwayiin jeeda shageeda mideawa seawuutka.

⁷ “Asi gwayi NG'UTAMIIDA bea lugweega: Asi ang'ula gideabeadi.

⁸ Siyeang'da una uhuuda heayeeniga ak giyeadu geediga ak gideasi gheeda jea eegadoowaniisean, ak geahoosanyi aba jeeda ak abeeda ghoahiimu giigheambiiteanyu, aba girugu NG'UTAMIIDA.

⁹ Aba gideaba ghoaghanyi gilijea anyasa haleanjeeda saang'a, amadu hean ghoanyaschi gea ng'ay; iidu nea gooyeadu ghoah, gabay goosha. Ghwasaan? Aba girugu NG'UTAMIIDA bea lugweega. Gwasin gideaba gheenyu ea nyaraat, nea agooga gaba siisi ng'ula ng'asheegeaba gheanyi.

¹⁰ Asi nih gidamwaroabwanana roopta ak ea manda gichea ghwaheas.

¹¹ Ak gayghwahidu badayda ng'eanyiida geejeeda ea iheenga heayeeniga, ea jeesinga madameega ea difaayeeda eashish, ea nagheeda, ea badahuuka haleanjeeda sean jiila ng'eanyiida, ea badahuuka buuneeda ea dugwa, ea badayda gadiyoojiga nyaawa sean.”

Buuneeda gwasissa mureeda ng'asheanda NG'UTAMIIDA

¹² Iimuchu Serubabeli was orjeeda Shealtieli, ea Yoshuwa was orjeeda Yehosadaki was ashoohoocheanda haw sea fuga sean abit, gwasissa mureeda ng'asheanda NG'UTAMIIDA was ASEETA nyaawa, sea ng'asheega Hagayeeda was ashoohoocheanda, was dea ghayi ajeagu NG'UTAMIIDA was ASEETA nyaawa; ak ghabeal buuneeda aba madeeda NG'UTAMIIDA.

¹³ Iidu Hagayi, was siida siicheakta bea NG'UTAMIIDA, goobaloola buuneeda giijasta NG'UTAMIIDA, “Aniini geendeayi sea agooga aba gidarugu NG'UTAMIIDA.”

¹⁴ Ng'ata ghwayiin NG'UTAMIIDA ng'asheanda jeeda guroorooda Serubabeli was orjeeda Shealtieli, was sugoocheanda haw bea ng'eanyiida Yuda, ea guroorooda Yoshuwa orjeeda Yehosadaki, was ashoohoocheanda haw, ea gurooruunatka fuga was boosteanga; ghapka ak ghwadeas gheeda NG'UTAMIIDA bea lugweega, was ASEETA nyaawa,

¹⁵ hita eaweeteaba diktam ea ang'wan bea sheedeaba lah.