Golosaayi 4 - Bibliyeeda Ghaydit

¹ Fuga hees asisiina giing'oonyangeagwa ng'asheega miyaasiin doobiiweadi, ak ghoanali gideaba eara agooga goondeawi Siida haw aba humng'eeda.

Gichea eabeada

² Oopiidana muuchi jeeda mooshta ASEETA, nea ghoang'wearu aba ng'asheanji nea goobadiischeesi;

³ ak ghoamwaschi ASEETA aba badahuukaasa, ak gootineasa ASEETA gidaghuuta aba ng'asheanda, ak geerukuti gidida funyaat bea Gristo ghayi siyiisean ghealoonigean,

⁴ Ak abeeda ghaadaajiichi, aba gida eagasiidi rukunooda.

⁵ Abeawana weaghuumeeda aba madeeda fuga mamwasa, nea googadiyeati muuchi damanda sigooneegwa.

⁶ Asi ng'asheegeagwa gagasa gwandeawa dagheerjeanduumeeda galeagasean, nea gwasamu balang'da, ak abeeda ghoanali gichea ashaayda ng'asheega buuneesean.

Giighata huuydean

⁷ Iiteanyu sean gaygwarukuneegwa Dikiko; niny orjeediyya aabwariinyi was siida gadiyeeda doabiiwaat, ak ea soomjeanda eandeawi bea Ng'utamiida.

⁸ Ak ea neajeagu niny heedeang'wa aba badaydeaba ng'asheanji, ak abeeda ghoanali gidasiwuurjeewi ea gideaba gaygoomajeek jeesingeagwa,

⁹ niny gaygoodeana Onesmo, orjeediyya doabiiwaat aabwariinyi, nea niny gaba jeedeang'wa. Ak gaygwarukuneegwa ng'asheega sean sisin aba hiji.

¹⁰ Ghoaghadeegwa Aristarkoyda eandeayeesi ghealooniga sea Marko, was orjeeda hudagheamata Barnaba, (iitaanyi noanyaschi gideaba iihidu heedeang'wa ghoadeapchi),

¹¹ Yesuheeda siguura Yusto. Nea fiisu ea fuga ghasmeahooda gil aba jeeda fuga eandeayeesi gadiyeeda sugoocheanduumeeda ASEETA, ea niiw fuga geandeawanean salgheang'da.

¹² Epafraheeda was siida jeedeang'wa was soomjeanda Gristo Yesu, ghoaghadeagwa nea goopkeateegwa galeagasean nea gwasin badiida aba moashtaanyi bea ASEETA, ak ghoamiinaadi nea simwaseagwa aba haleanjeedida gasa ASEETEAN.

¹³ Aniini geawooschi muushoocheanda aba gideaba ghaadaayi gida deawiita aba badahuukeagwa ea giika mida Laodokiyean ea giika mida Hierapoliin.

¹⁴ Lukaheeda was meang'nyeanda biissa dabwariiyiin ea Dema ghoaghadeagwa.

¹⁵ Oakghada orjoogiyya mida Laodikiya ea gea mida Nimfa ea fuga ganiiseeda gheanyi.

¹⁶ Barawajeanji iisiisoamwa aba heedeang'wa, ghoanung' easoamwa eara aba Ganiisa mida Laodikiya, ama diita sing'oorsa Laodokiyahiin ghoasoami agooga.

¹⁷ Arukusiina Arkipa, gideaba “Ng'ula muuchi gadiyeedida goonyi Ng'utamiidean sina nea giihiidi.”

¹⁸ Giighadi ghaang'waarji aniini Bawlo aba geatindeanyu. Oapkaada gideaba siratean. Gagasa anyasa dagheerjeanduumeeda.