Golosaayi 2 - Bibliyeeda Ghaydit

¹ Geagasayi anala gideadeawiiti aba badahuukeagwa, ea badahuuka fuga mida ng'eanyiida Laodikiya, ea giika miighwadaahaniin,

² abeeda geemajeek gurooruunatka nyaawa, nea gaguuyi aba bariinyeega, ak ghwanyas meanang'oocheanduumeeda sean bea huumwa, ak ghwanal makcheameedida bea ASEETA was Gristohiin,

³ nea jeadaanyi ea sifuysa gheaseeda bareaynata uhuuda ea fughareenga.

⁴ Gearugu nih aba gideaba adiidu ghoamwaschi gwareenganeegwa siida aba ng'asheega ng'uyeega.

⁵ Earapeadi eawooschi sheagi aba heedeang'wean, geendeayi aba guroorooda, ak geahoosanyi muuchi aba gideaba neajeeng'u gidamiyda giibindeang'wa ea gidamajeekta masaweegeagwa aba badayda Gristo.

Giibinda hidaat aba jeeda Gristo

⁶ Asi agooga ghayi ghoadeapti Gristo Yesu was Ng'utamiida, asi oopiidana jeadaanyi,

⁷ nea goongooreadi hawungeagwa ak geemajeegeegwa aba jeadaanyi ak gamajeegiit masaweegeagwa, ak gawuurji gidaghayi siinaaldaneegwa, nea goobadiisacheesi.

⁸ Asi ashageada adaghaghaseagwa siida ak gahutaneegwa aba fughareadaanyi bea mwadaagha aba searoojigiga bea buuneedean, aba haleanjeedeaba garayi bea meangeenda mida jeeda ng'eanyiida nea mii dea Gristohi.

⁹ Aba gideaba headaanyi gwanda hidooda sean bea ASEETA nea goobiida badaydaanyi.

¹⁰ Ak agooga ea noanyaschi eaweega hidaat aba badaydeaba niny, nea niny eahaweewa fuga ahaaghwa ng'eanyiida ea gea ambaliischi.

¹¹ Nea aba badaydeaba niny eara agooga siyaadeagwa ghasmeahooda aba ghasmeahooda meesinana geatinga, nea ghoanung'waadi ng'asheega saseeda aba ghasmeahooda Gristo,

¹² nea geepunyeegwa sea niny aba giibaatiisanda, amadu geetuuneegwa sea niny aba masaweega aba gadiyeeda ASEETA, ghayi aduuna niny jeeda miyeeda.

¹³ Hean agooga, goomeewayi aba riing'eegeagwa ea aba sasanuukeagwa meayaada ghasmeahooda, iidu ghoadaw ASEETA eaweega sea niny, ak ea nisamseasa riing'eegaasa sean,

¹⁴ iidu nea niibuus ng'ooruutka mida badahuukaasa jea goorgweakseasaan, gageanu ak ghwasach ak goongoorsa uhuuda beehiida.

¹⁵ Ak ghoareat fuga mideawa uurda gheambalmeeda dabita ng'ucheeda ak geanu ghoah gichea eahiimda aba eeshpwara aba saawa, ak gahoosan aba badahuuka nyaawa.

¹⁶ Asi adagoorgweakseegwa siida aba giinyeashteayda gichea eayaak ghana gichea eali ghana badayda ghweelmeeda ghana aba ng'ushiinda sheeda ghana Sabaato,

¹⁷ suh jirooneeda ng'asheega jea ghwahidu; nea gida huumwa ea Gristo gil.

¹⁸ Asi adaghaweadaneegwa sih gil, aba giimajeekta eateaba geaw bea ng'eanyi ea ghadoowanda malaykajeega, nea ghamiinaada aba giidaheachteaba geaw, nea ghaghwar geaw mwadaagha aba fughareadaanyi bea saseeda,

¹⁹ ak ea mwanoasa geat sea uhuuda, nea aba niny ghoang'waay geat saseesean aba roobuutka ea mayiishka, ak gwaheedu aba heenooda leabu heeda ASEETA.

Miyeeda ak geendeay Gristo

²⁰ Ama iinoomeewuudayeewi Gristo aba haleanjeeda ng'eanyiida was meangeenda, ghwasaan anda goopiideati gili duu abeaha ng'eanyiida? Ghwasaan inyas ghoamwaschi huumeanyeeka nyaawa,

²¹ “Adoang'waanyi, ak ea adoosamu, nea adoasachi.”

²² (Ak ghoahiimu haleanjeeda jea goosha iisigadiyeata), aba giduurji giinealshooda buuneeda ea gissirukuteayda?

²³ Suh seaniin aba huumwa gawuurji gwadeagooda mideawa weaghuumeeda ak ghoang'eat ghadooweeda aba eateaba geat bea ng'eanyi aba gidahang'waay gasa saseeda, ak ea marachi gil ak moamu ghoadeal gidida gasa saseedean.