Golosaayi 1 - Bibliyeeda Ghaydit

¹ Bawlo was giijasoocheanda Gristo Yesu aba gidagasiida ASEETA, ea Dimoteo orjeeda iya.

² Heeda ASEETA fuga ghaydidi doobiiweadi was orjoogiyya aba jeeda Gristo Yesu mida Golosayi: Gagasa anyasa dagheerjeanduumeeda ea hoyyoo jea gwaleabu heeda ASEETA was Ghweandeanya.

Mooshta ghawooda bea badiischooda

³ Inyeessa galeagasean geabadiischeesi ASEETA was ghweanda Ng'utamiideanya Yesu Gristo, iisimwaashchi ASEETA aba badahuukeagwa

⁴ aba gideaba siyiinyi iita masaweegeagwa aba badayda Gristo Yesu ea gidoabwariiydi fuga sean ghaydidi,

⁵ aba gideaba gidoararji jea eegooneegwa aba hoowa bea humng'eedean. Aba ng'asheanda noobay ayiinya aba mwadi aba jeeda giijasta miy bea huumwaan,

⁶ nea nihidu heedeang'wa, ea gidaguuleata ng'eanyiisean gil, ak gwaji haghweega ak gwaheedu gawuurji gidaheeteayda aba heedeang'wa, ghang'eada damanda ghayi oayiinyi ak ghoanali dagheerjeanduumeeda ASEETA bea huumwa,

⁷ gawuurji gida anaaldaneegwa Epafra was soomjeanda sibwariinyi. Niny ea doabiiwaat nea gagadiiyeesa Gristo aba badahuukeagwa

⁸ ak ea ninung' eanala bariinyeegeagwa aba guroorooda.

⁹ Ak aba sareani dea ghayi siyiinyi ng'asheesu ea miyeenung'waada mooshta ghawooda aba badahuukeagwa, gideaba gagooneegwa ASEETA fughareeda huumwa bea gidagasiida niny ak gagooneegwa weaghuumeeda ea nalooda aba jeesingeagwa,

¹⁰ ak abeeda gajoomuusa oopiideata gidagasiida Ng'utamiida nea goosinyi gichea goohoosan, ak giibindeang'wa gaygwaji haghweega aba gadiyoojiga miyaasiin nea gooheetu aba fughareeda ASEETA.

¹¹ Gagasa gagooneegwa giimuusta sean bea uurdaanyi ghaambiidaat, jea oamuusa nea ghoamuughu haleanjeeda sean nea goobeayi hooseaneega,

¹² nea goobadiischeesi Bwaabeeda nung' eamuusa eanyasa gheata hearaniischooda sea fugaaschi ghaydidi aba jeeda weeshinda.

¹³ Ak niny gwalealnaneasa jeeda uurda misanuumeeda ak goobaleegeasa ea ghwadeasa jeeda sugoocheanduumeeda Orjeedaanyi bwariiy,

¹⁴ nea aba niny geendeawi lealeanooda nea ea samsiinda riing'eeda.

Gristo ea gadiyeadaanyi

¹⁵ Nea niny geegala ASEETA miidaachi ak ea duweacheeda gil aba haleanjeeda sean;

¹⁶ aba gideaba haleanjeeda sean geesin aba badaydeaba niny, gea mida humng'eeda ea gea mida ng'eanyiida, gea daachi ea gea mii daachi, ea hoorgajeega sugoodiga gil, ghanea sugoocheanduumeeda ghanea gea ambaliischi ghanea gheambalmeeda suh seaniin gwasin niny nea gwasin aba badaydaanyi.

¹⁷ Niny ghayi gabay gwanda madeeda haleanjeeda sean, nea aba niny ghwanoas geat haleanjeeda sean.

¹⁸ Nea niny ea uhuuda saseeda gil, nea dea Ganiisa, nea niny ea giing'eeta, ak ea duweacheeda leabu miyeeda, ak abeeda ghoah siichea goosheedeawa haleanjeeda sean.

¹⁹ Aba niny gammiisa goobiida headaanyi haleanjeeda hidaat bea ASEETA,

²⁰ nea aba niny gooduupchi geaw haleanjeeda sean gea mida ng'eanyi ghana gea mida humng'eeda, ak gwasin hoyyoo aba foojeanda weay aba badayda beehiidaanyi.

²¹ Nea aba mwadi agooga ea siiheeleweegwa nea goowooschi munyas fughareani, nea goosinyi sinaweega munyas,

²² ak ea niduupchi aba saseadaanyi niny aba miyeadaanyi, ak abeeda ghwanung' ahuwa fuga ghaydidi meerukunana badahuuka ng'asheega munyas aba madeadaanyi.

²³ Asi iyoopiidi jeeda masaweega, ak ghoamiinaadi nea noahang'waanyiichi, nea meayameegwa aba heeda giijasta miy oayiinyi, ghayi sirukwiisa haleanjeeda sean mida hiing'eadayda humng'eeda, nea aniini Bawlo geawooschi siidaanyi bea gadiyeeda.

Bawlo soomjeanda gadiyeeda ganiisa

²⁴ Ak ghamneawa geang'weelayi aba sawanadeeda aanyaschi aba badahuukeagwa, nea aba saseedeanyu ghaahiichi giika shoodaan aba sawanadeeda Gristo aba badayda saseadaanyi, nea ea ganiisa,

²⁵ ak aniini ea sinung' doaw siideaba gadiyeani, gawuurji siida siiteaga gadiyeeda ASEETA sigoonan aba badahuukeagwa, ak geasinyi gadiyeeda ASEETA ak geanal,

²⁶ nea Makcheameeni ghayi sifuyiin ghang'eada gweanyeeka ghayi bea garayiin ea jeacheenga ak ghamneawa ea siiteajiisa fugaaschi ghaydidi.

²⁷ Aba jeenyaawa ghwaloat ASEETA ak ghwanung' ghwanal Eemoojiga giteena hawunda meanang'oocheanduumeeda ea makcheameeda gheambalmeadaanyi was Gristoyda mida jeedeang'wa, was rarooda giigheambiita.

²⁸ Niny geerugu aseasa, nea geereekusi giliwas sih nea geanaalji giliwas sih aba weaghuumeeda sean, ak geeyeadu giliwas sih nihissa heeda aba jeeda Gristo.

²⁹ Nea geasawanyi geaw aba nih, nea geamajeekchi aba uurda sinoodeaba gadiyeeni iin jeedeanyuun.