GIING'EETA 43 - Bibliyeeda Ghaydit

Orjooga geenyea Yosefu gabiikta Misri nea goodeayi Benjamini

¹ Abeeda nea ning'waaniit geejeeda aba jeeda ng'eanyiida.

² Iimuchu nea niyaak booga ghayi eana ng'eanyiida Misri, ghwalamda ghwaan ak gwayeesha orjoagaaschi, “Abiikta gicha ak goosheayneasa boosu ng'ay.”

³ Hean gwayeesha Yuda niny, “Siida ghamiin gheang'deanya nea gwayi, ‘Mwajadaaha gheanyangeasu, ea eaghus andeawana orjeeda geamadu.’

⁴ Iijea nung' eeteayeewana orjeeda giyeanya, abeeda gajeeweaya ak geesheayneey booga;

⁵ ama maynung' eeteayeewana, ea majeeweaya, aba gideaba gwayeeshiineasa siida, ‘Mwajadaahaan ea eaghus andeawana orjeeda giyeang'wa.’”

⁶ Ghwalamda Israeli ak gwayeesha, “Ghwasaan anda googoonyean sawanadeeda aba gideaba gooyeeshi siida geendeawi orjeediyya nuut?”

⁷ Ghwasha saawa nea gwayeesha, “Siida ghoanyaashtaneasa muuchi aseasa sea buweadeagaasa nea gwayi, ‘Ghweandeang'wa gudugwanda? Agooga goondeawi orjeeda giyeang'wa nuudi?’ Ak ng'asheega sirukusi geashaahi ng'asheesu anyaashtaan; nea aseasa geanali gideaba gaygwayi, ‘Ayeani orjeeda giyeang'wa’?”

⁸ Ng'ata gwayeesha Yuda ghwaan was Israeli, “Goona orjeeda deadeayi aniini, ak gajeeng'eatng'eada eeweaya, ak abeeda geaghuyi ea meemeewi, eesa sean aseasa ea ang'iing'i ea diibigaasa manang'i.

⁹ Gaydaghashta eaweegeasu aba badaydaanyi; ak gaygasa orjeeda aba geatingeasu. Iimeadeelni headaang'u ak ghaayiinyi madeadaang'u, abeeda ginung' dasar munyinda damanda manda muudeanooda;

¹⁰ aba gideaba inyeeda ea mii sishing'di, gwachi gajea sibiikti nibiyeenya.”

¹¹ Ng'ata ghwalamda ghweanda nyaawa was Israeli ak gwayeesha saawa, “Ng'asheanji iijea gwasunu, abeeda goosindunu: ageani haghweega miyaasiin bea ng'eanyiida ak ghoayiinyi jeesinga mushoodakeagwa, ak gooyeasi siidida ghoah haleanjeeda guskuseega, nagheeni mwanang' ea maleeni mwanang' ea mughoondooda ea geediga ng'andit, ea geediga ng'andidi.

¹² Ayaadana geadi lapiyeeda deayeat; oakghuumda lapiyeeda biigu aba ghuusiga mushoodakeagwa; aba gideaba gwadeepa gwaroosa.

¹³ Ayaada eara orjeeda geamadu, ak ghoalamwajaadi aweayeena heeda siida;

¹⁴ gagasa ghwanung' ASEETA haw ghabwaydaneegwa siida, ak gagooneegwa orjeeda giyeang'wa niirja sea Benjamini. Ama jea gwarooda diibigeasu, gaygwarooda.”

¹⁵ Ng'ata ghwaat orjooga haleanjeeda guskuseega, ak ghwaat lapiyeeda deayeat, sea Benjamini; ak ghang'eatng'eat gaweay ng'eanyiida Misri, ea ghwahita madeeda Yosefu.

¹⁶ Iidu nea ghwadaah Yosefu Benjamini sea saawa, gwayeesha siida haweewa fuga gadiyeedeaba gheanyi, “Eani fiisu jeedeaba gheenyu, ak ginuusi mbooyda ak ghoawaali hamita, aba gideaba fiisu gaydeambuuchi askweari.”

¹⁷ Gwasinda siida ng'asheega gidarukusiinda Yosefu ak ghwaat buuneeda gheeh Yosefu.

¹⁸ Hean siyaat buuneeda jeeda gheeh Yosefu ghabeal nea gwayi, “Nih gwadeepa ea ng'asheega lapiyeeda siyiin jeesinga mushoodakaasa damanda ghayi bea madeeda, ak ghoah gisiyeaseasa jeeda gheeda, ak abeeda gang'adeeseasa ak ghabwareasa, ak ghwanung' eahuuwa giing'oonyanga ak ghoang'waay digeenigaasa.”

¹⁹ Gaweay heeda siida haweewa gadiyeeda aba gheeh Yosefu, ak goobalool aba gidaghuuta gheeda,

²⁰ ak gwayeesha, “Ea ng'utamiideanya, ghayi sipkaanyi eaweeda madeeda eashaaha booga;

²¹ iidu nea geehidu heeda jea eelana geetineadi mushoodakaasa, ak gwanda ghuutpa giliwas mushootpa sih lapiya, lapiyeedeanya sean; ak ghamneawa geapkaanyi nea geeyeadu,

²² ak geeyeani geatingaasa lapiya suuk jea eashaahana booga. Ak ea meanali siida iin lapiya jeesinga mushoodakaasa.”

²³ Ghwasha nea gwayeesha, “Adoabeali, adaghang'udeagwa muuwda; gwadeepa ghwayiin ASEETEANG'WA ea ASEETA ghweandeang'wa ghwayiin lapiya jeesinga mushoodakeagwa, lapiyeedeang'wa naanyaschi.” Ak gooruudu Simeoni jarooda heanyaawa.

²⁴ Ghwaat siida gadiyeeda buuneeda jeeda gheeh Yosefu, ak ghoadaw beega, ak goohuun geeshanga nyaawa, ak ghoadaw digeeniga nyaawa nyeega,

²⁵ hean gageanu haleanjeeda guskuseega jea ghoadaw Yosefu iihidu nea ghwadarasha aseeta, aba gideaba sirukusa gideaba gaygoombuuchi.

²⁶ Iidu nea ghwahidu Yosefu ghoah, gageanu haleanjeeda guskuseega ak ghwaat jeeda gheeda headaanyi ak gwatkuy ea ghwahita ng'eanyi aba madeadaanyi.

²⁷ Ng'ata ghoanyaash ea gaba seayu, ak gwayeesha, “Ghweandeang'wa waas oorukunean iita gaba seayu? Gudeamajeegi?”

²⁸ Gwayeesha saawa, “Siidaang'u was soomjeanda was ghweandeanya gaba seayu, ak ea gudeamajeek.” Ak gabuy iheenga nyaawa nea gwatkuy aba madeadaanyi.

²⁹ Ng'ata gagatkat gheanyangaaschi, ak ghwadaah orjeeda ghaamwat was Benjamini, ak gwayeesha, “Nih orjeeda giyeang'wa mwanang' oorukuneani? Gagasa gagoonyi ASEETA ghawooda, orjeedeanyu!”

³⁰ Hean ghwalamwach geaw Yosefu, aba gideaba gwasawana jeadaanyi aba orjeeda ghaamwat, ea gagasa gooyeawda. Ak gawa jeeda ghooriida heeda manda sih ak gooyeawda.

³¹ Ng'ata goohuun gheanyangaaschi ak gwardu jarooda; hean ghoahang'waay geaw ak gwayeesha, “Ayeani gichea eayaak.”

³² Hean geang'aata niny aba hichpa geaw, ak geang'aata saawa aba hichpa geat, nea fuga Misri ambuuchi sea niny gweagiischi aba hichpa geat, aba gideaba fuga Misri maygoombuuchi mukaate sea fuga Ebraniya, aba gideaba eamuy aba heeda fuga Misri.

³³ Ak goobiitpiit aba madeadaanyi, nea gwajipta geat gidaghayi buwaanda gweanyeeka nyaawa ghang'eada duweacheeda ea gagul dea mwanang'eawa sean; ak gang'ula geat nea ghahamng'eanyi.

³⁴ Nea hamita siitaw saawa geayaada madeeda Yosefu, nea dea Benjamini geeheedu niba muut ea gaburdeawa geaba suurja. Ak gwaleeshi nea gahoosan.