GIING'EETA 41 - Bibliyeeda Ghaydit

Yosefu gwaroopiida giirgweatka sugoocheanda

¹ Iimuchu nea ning'ata gweanyeew iyeenya, goorgweadi Farao ak ghwadaah nea ghamiinaada aba murdeeda eenda Nayli,

² ak ging'ulayi, ghapka duu ispwa miyaasiin ak ea riisheadi siyeeng'na eenda Nayli, ak ghwaak sharahiida.

³ Ak ging'ulayi, duu ispwa suuk, munyas ribeadi, ak gwascheeng'na eenda Nayli nea gweadu geeshteaba giika, ak ghamiinaada aba murdeeda dugwa suurja aba mareeta Nayli.

⁴ Ak ghwaak dugwa munyas ribeadi dugwa miyaasiin riisheadi. Ak ghang'eat Farao.

⁵ Iidu gabiikta gicha gwalil deabiyeenya ak goorgweadi; ak ging'ulayi, muschoon ispwa bea booga, nyiideadi miyaas, nea gwarina uhuumba mushearajeanjagi.

⁶ Ging'ulayi, gwarina muschoon suuk ispwa bea booga, manang'i siseadi was gurmeayeeka ak gagajeamiidi aba jeameeda leabu heeda ghayeawa.

⁷ Ak ghwanukghuta muschoonga manang'i muschoonga nyiideadi miyaas. Ak ghang'eat Farao, ak ging'ulayi, gwajeeng'u gideaba goorgweadi.

⁸ Iimuchu gwasawana jeadaanyi; ak ghwanung' eeguursa meanga sean bea ng'eanyiida Misri sea fuga sean bareahi iheeni; ak gwarukusa Farao giirgweatkaaschi, ak ea manda siida ammu gwaroopsa Farao gidawas.

⁹ Hean gwayeesha siida haw fura difaayi Farao, “Eanean naapkaachi giidiinyeanyeekeasu.

¹⁰ Damanda nyareeksiina Farao fugaaschi bea gadiyeeda, ak gwajaksean ghealooniga sea siida haw sina mukaatajeega aba jeeda gheeda shirikarajeanda haw,

¹¹ geergweadayi eaweedida, niny ea aniini, ak gaba siisi argweadi ak ea meateayi giirgweatkaasa.

¹² Abeeda geendeawi gheareemaneemba eemeeda Ebraniya, was soomjeanda shirikarajeanda haw furiischi; iidu nea geerukusi niny, gwaroopneasa ginyah giirgweatkaasa, ak gaba siisi roopsa ginyah giirgweatkaaschi.

¹³ Damanda roopuunaneasaan, ghoawata ginyaashta; ak geeteelsean gadiyeedeanyu, nea siida sina mukaatajeega gearata.”

¹⁴ Hean goojeakta Farao eeguursa Yosefu, ak gealamwach eeguursa aba ghealooniga; iidu nea nireakghu buudeega nea ghwayam hang'weakaaschi, ghwahidu ak ghamiinaada aba madeeda Farao.

¹⁵ Ghwalamda Farao ak gwayeesha Yosefu, “Aniini geargweadayi, ak ea manda siida ammu gwaroobu; ak ea sirukunean iitaang'u gideaba iiyiinyi giirgweatka giimuusi roopni.”

¹⁶ Gwayeesha Yosefu Farao, “Mii aniini; gayghoadaw ASEETA Farao gitoabiiw nyaah giirgweatka.”

¹⁷ Hean gwayeesha Farao Yosefu, “Ng'ula, aba jeeda giirgweatkeasu ghaamiinaadi aba mareecheeka eenda Nayli;

¹⁸ gwascheeng'na duu ispwa riisheadi miyaasiin ak ghwaak nyeega;

¹⁹ ak gweadu geeshta duu suuk ispwa, munyas was geaka. Dusu ea munyas ea ghwaraanya aba gea naadaayi sean aba jeeda ng'eanyiida Misri.

²⁰ Ak ghapka dugwa ribeadi was geaka ak ghwaak dugwa asispwa riisheadi bea madeeda,

²¹ iing'ata nea niyaak ea manda siida nal gideaba niyaak, aba gideaba gudea munyasta gidaghayi. Ak ghaang'eachi.

²² Ak ghaadaayi gicha aba jeeda giirgweatkeasu muschoon ispwa rinna uhuumba mushearajeanjagi, nea ghwanyiit ak ea miyaas;

²³ ea muschoon ispwa, siseadi ak ea ribeadi, ak ghaghajaamiit aba jeameeda leabu heeda ghayeawa,

²⁴ ak ghwanukghuta muschoonga ribeadi muschoonga miyaasiin asispwa. Ak gearukusi meanga, ak ea manda siida ammu gwarukunean ginyah.”

²⁵ Hean gwayeesha Yosefu Farao, “Giirgweatka Farao gwarugu gilagi; goohiimsa ASEETA Farao gichea ghwahidu.

²⁶ Dugwa miyaasiin asispwa gweanyeew ispwa, ak muschoonga miyaasiin asispwa ea gweanyeew ispwa; ak gwarugu gilagi.

²⁷ Nea dugwa was geaka ribeadi eadu geeshta ea gweanyeew ispwa, nea muschoonga manda booga ghuuta jeameeda leabu heeda ghayeawa earaga ea gweanyeew ispwa bea geejeeda.

²⁸ Nih gidearukusiindi Faraohi, ASEETA goohiimsa Farao gichea gwasin.

²⁹ Gayghwahidu gweanyeew ispwa bea miyeenooda haw aba ng'eanyiisean bea Misri,

³⁰ ng'ata gweanyeeksu gayghwahidu gweanyeew ispwa bea geejeeda, ak gaygwaroosa fih miyeenooda sean bea ng'eanyiida Misri; aba gideaba aahaw geejeeda aba jeeda ng'eanyiida,

³¹ ak miyeenoodida ea maygudu eapkaat aba jeeda ng'eanyiida aba ng'asheega geejeeda jea gamaseaw, aba gideaba gajeang'waan.

³² Nea giirgweatka duwaawi bea Farao gwarugu gideaba ng'asheesu gaygwasin ASEETA, ak gayghwanung' ASEETA gabay ghwahidu nea mayghwashing'da.

³³ Asi ghamneawa gagasa ghwaloat Farao siida fughareeda bwaraawu, ak ghwanung' goombal ng'eanyiida Misri.

³⁴ Ak gidabal ghwaloat Farao fuga jea ghoah sugoodiga jea ghoahaaghwa ng'eanyiida, ak ghoawaam booga damanda gweanyeeka asispwa bea miyeenooda.

³⁵ Ak ginung' ghoawaam hamichoojiga sean bea gweanyeeksu miyaasiin jea ghwahiduun, ak ghwayiin booga geatinga Farao aba mujiinajeega ak ghwanung' eefur.

³⁶ Hamidi gajeetiiw ak ghaweat ng'eanyiida aba gweanyeew ispwa bea geejeeda jea ghwahidu jeeda ng'eanyiida Misri, ak abeeda ea mwanyara ng'eanyiida aba geejeeda.”

Yosefu geanung' ghoah sugoocheanda Misreeda sean

³⁷ Hean ghwadaah Farao sea sugoodigaaschi sean gideaba ng'asheanji aamiy.

³⁸ Ng'ata gwayeesha Farao sugoodigaaschi, “Geamuuschi eanyasa siida sunu mideawa Guroorooda ASEETA?”

³⁹ Iidu gwayeesha Farao Yosefu, “Iinukwa niihiimneey ASEETA ng'asheesu seaniin, ghanyea manda siida doabiiwaat bwaraawu uurjeeweey;

⁴⁰ gaydanung' ambala gheenyu, ak gaygwasin fugeasu sean gidirukusi; ak gaywoosa mwanang'eawaan aba gideaba aniini geawooschi sugoocheanda haw.”

⁴¹ Ghwalamda Farao ak gwayeesha Yosefu, “Ng'ula, naaloacheey heeni aba jeeda ng'eanyiisean bea Misri.”

⁴² Ng'ata gafagu Farao ghuniida ahiimu gheambalmeeda aba mooneadaanyi ak gooshuup mooneeda Yosefu, ak gooshuup hang'weaka miyaasiin bumbuni, ak gooshuup gheata surumnyeanda sisna dahaabu;

⁴³ ak ghwanung' gwading'da mutukwajeandaanyi bea iyeenya; ak goojuur aba madeadaanyi nea gwayi, “Asi atkunya!” Ak ghwaloat goombal ng'eanyiisean bea Misri.

⁴⁴ Gabiikta Farao gwayeesha Yosefu, “Aniini geawooschi Farao, ak ea manda siida jea gagatkat geatinda ghana geeshta aba ng'eanyiisean bea Misri nea mimwasi.”

⁴⁵ Ak gang'asa Farao Yosefu gheawunga siyi Safenati-baneya; ak gageesa gatmooda siguura Asenati was hudeaba Botifera was ashoohoocheanda mujiineeda Oni. Ak gageawiit gheawunga Yosefu aba jeeda ng'eanyiida Misri.

⁴⁶ Abeeda Yosefu gaba gweanyeew diktam ea damanamughuush damanda huweewa siida gadiyeeda Farao was sugoocheanda Misri. Ak ghabeawa Yosefu madeeda Farao, ak gwaneayeewa jeeda ng'eanyiisean bea Misri.

⁴⁷ Damanda gweanyeew ispwa bea miyeenooda ghwaheas ng'eanyiida booga saang'a,

⁴⁸ ak ghoawaam booga sean bea gweanyeew ispwa damanda miyeenooda aba ng'eanyiida Misri, ak goodiiw booga aba mujiinajeega; ghwayiin hamita giliwas mujiini booga leabu madameega neaweesa.

⁴⁹ Muchu ghoawaam Yosefu booga saang'a, deena iseaskweanda basooda, ea ghwanung'waada iitooda, aba gideaba mwoamu eeyiida.

⁵⁰ Heeda miighwahina gweayda geejeeda, abeeda Yosefu niji orju iyeenya, jiilsa Asenati, was hudeaba Botifera was ashoohoocheanda Oni.

⁵¹ Ak gaguura Yosefu gheawunga duweacheadaanyi Manase, “Aba gideaba” gwayi, “Ninung' ASEETA gwaroosean sawanaduutkeasu sean ea fuga ghaheanya sean.”

⁵² Gaguura gheawunga orjeedaanyi bea iyeenya Efraimu, “Aba gideaba nigoonan ASEETA jeata aba ng'eanyiida sawanadeeda.”

⁵³ Ak gamuudean gweanyeew ispwa bea miyeenooda aba ng'eanyiida Misri;

⁵⁴ ak ghwahidu gweanyeew ispwa bea geejeeda, ghayi rugu Yosefu. Ak ghwahidu geejeeda jeeda darooraka sean; nea jeeda ng'eanyiisean bea Misri gwanda hamita.

⁵⁵ Iimuchu nea ghwahidu jalooda jeeda ng'eanyiisean bea Misri, gooyeawusa buuneeda Farao nea gagasa hamita; hean gwayeesha Farao fuga ng'eanyiida Misri, “Aweayeena heeda Yosefu; ak goosinyi girukuneegwa.”

⁵⁶ Hean iimuchu nea nighayda geejeeda aba jeeda ng'eanyiisean, gootin Yosefu ghoorajeega sean mida booga, ak ghwanung' ghwasha fuga Misri, aba gideaba ning'waaniit geejeeda aba jeeda ng'eanyiida Misri.

⁵⁷ Ng'ata ghapka fuga leabu muunda ng'eanyiisean heeda Yosefu ghwasha booga, aba gideaba ning'waaniit geejeeda aba muunda ng'eanyiisean.