GIING'EETA 39 - Bibliyeeda Ghaydit

Yosefu sea gatmooda Botifa

¹ Iimuchu nea ghwaat fuga dooshta Shumwaheeli Yosefu ng'eanyiida Misri ghwashaayda aba heeda Botifa, was shirikarajeanda haw fur gheeda sugoocheanda siguura Farao.

² Ak gwandeayi NG'UTAMIIDA sea Yosefu, ak ghwanung' gamnyeeni; ak goobiida gheeda siidaanyi haw bea ng'eanyiida Misri,

³ hean ghwadaah siidaanyi haw gideaba gwanda badayda NG'UTAMIIDA, ak ghwanung' ghoahaada haleanjeeda sean sin aba geatingaaschi.

⁴ Iidu ghabwariiy Botifa Yosefu ak ghwanung' ghoah siidaanyi bea jih, ak ghwanung' ghoah siida haw bea gheanyi nea gafur haleanjeadaanyi sean mideawa.

⁵ Damanda nung' ghoaweewa siida haw fur gheanyi ea haleanjeeda sean mideawa ghoadaw NG'UTAMIIDA ghawooda gheeda siida Misri aba badayda Yosefu; ak ghwanyas ghawooda NG'UTAMIIDA ea haleanjeeda sean mideawa, aba ghoah ea madamnyeanda.

⁶ Ng'ata ghwayiin haleanjeeda sean mideawa geatinga Yosefu ghoahaaghwa; ak ea meadeagana geaw eara gil geaghus hamita ak. Abeeda Yosefu aamiy aba leanga ea ratooda.

⁷ Iimuchu nea ning'ata askwearjoojiga gang'ula gatmooda siida haw Yosefu, ak gwayeesha, “Nung' eeluudayeena.”

⁸ Ghaheawa Yosefu ak gwayeesha gatmooda siidaanyi haw, “Ng'ula, siideanyu haw meadeagana geaw gida wasean aba jeedeaba gheanyi, ak ghwayiin haleanjeadaanyi sean mideawa geatingeasu;

⁹ ak geandeawi gheambalmeeda uurji dea mideawa niny; ak ea miighaweadanaan gida wasean ea eaghusnyi, aba gideaba guwoosi gatmoadaanyi; abeeda gaydasindaan ng'asheanda muy sunu, was riing'eeda aba madeeda ASEETA?”

¹⁰ Earapeadi rukwiisa gatmooda ng'asheesu Yosefu giliwas eaweechean, ghanyea mealeeysiina iit, gideaba gaygwandeayi ghana gawa heeda.

¹¹ Eaweecha gawa Yosefu jeeda gheeda gwasin gadiyeadaanyi nea abeeda ea manda ng'eadaat ghoah,

¹² goong'ooyna hang'da, nea gwayeesha, “Eeluudayeena.” Ak gwanung'usa hang'daanyi geatindaanyi, ak ghafwach gwariteawa jeeda ghooriida.

¹³ Daah gideaba ninung'usa hang'daanyi geatindaanyi, ak ghafwach gwariteawa jeeda ghooriida,

¹⁴ gaguursa fuga gadiydooschi aba ghoah ak gwayeesha, “Ang'ula, siisi bea Ebraniya eadu siyeedeanyuun ghoabwaaspwaaseasa; ghwaan jeeda ghooriida ak gagasa ghabwaanyan, ak geaguul;

¹⁵ hean iiy gideaguuldi muuchi nea geayeawdi, ghwanung'wanaan hang'daanyi, ak ghafwach gwariteawa jeeda ghooriida.”

¹⁶ Gwandeawa hang'daanyi ea ghwahidu ghoah siyeadaanyi,

¹⁷ ak gwarukusa iitida, nea gwayeesha, “Siidaang'u was soomjeanda bea eemeeda Ebraniya ghayi iyeadu jeedeanya, ghwaan jeeda ghooriida ak gagasa ghabwaanyan;

¹⁸ iidu nea geaguuli, ghwanung'wanaan hang'daanyi, ak gwariteawa jeeda gheeda.”

¹⁹ Iiy siyeadaanyi ng'asheega rukusa gatmoadaanyi gideaba, “Nih gidasimanean soomjeandaang'u,” hean ghwanyareas muuchi.

²⁰ Ak gageanu siyeadaanyi ak ghwaat ghealooniga, heeda siratiisa fuga sugoocheanda, ak goobiida ghealooniga.

²¹ Hean goobiida NG'UTAMIIDA was ASEETA badayda Yosefu nea goohiimsa bariinyeega huumwa ak ghwanung' ghamiidu aba madeeda siida haw ambal heeda siratiisa buuneeda.

²² Ghwanung' siida ambal gheeda siratiisa buuneeda ghoah Yosefu siida haweewa buuneesean mida ghealooniga; ak ghwanung' ghoah siida ambala gilinyoo eesin aba ghealooniga;

²³ Iissa siida haw ambal gheeda siratiisa buuneeda ghanyea mayghoahaak ghaang' gida wasean ng'ula Yosefu, aba gideaba gwandeayi sea NG'UTAMIIDA was ASEETA ak gida wasean sin iissa ghwanung' NG'UTAMIIDA was ASEETA ghwadoabiiw.