GIING'EETA 32 - Bibliyeeda Ghaydit

Yakobo goodiing'diing'da aba roonyeeda Esawu

¹ Ghang'eat Yakobo gawa ak gwaroonyi sea malaykajeega ASEETA;

² hean nea ghwadaah Yakobo malaykajeegiga gwayi, “Suh lugooda ASEETA!” Ak gaguura gheawungeaba ng'eanyiita Mahanaimu.

³ Ak goojeakta Yakobo giijasoodiga goosheeda gaweay heeda Esawu was orjeeda ghaamwat aba ng'eanyiida Seyiri, was ng'eanyiida Edomu.

⁴ Ak ghoanaal gideaba, “Asi ayeeshiina ng'utamiideanyu was Esawu: Gwayi soomjeandaang'u was Yakobo, ‘Neandeawi Labani nea geawooschi rabascheanda ea ghoah ghamneawa;

⁵ ak geandeawi heewga, ea digeeniga, ea gisilga, ea nooga, ea soomjooga was headiga, ea gadeemga was soomjooga, ak geajeakti gwarukusa ng'utamiideanyu iita, ak abeeda ghaanyaschi alooheeda aba madeadaang'u.’”

⁶ Hit gabiigu fuga siicheakta heeda Yakobo ak gwayeesha, “Geeleabu heeda orjeeda geamadu was Esawu, nea ghwaan roonyeadaang'u, nea goodeana fih bughalaji ang'wan.”

⁷ Hean ghabeal Yakobo muuchi nea gagiisan; ak gageanu ghwalach bugusta fuga mideawa niba iyeenya ea hawanda, ea dugwa ea ngamiyajeega, nea gwayi,

⁸ “Iihidu Esawu ak ghabwar geeda madeeda, abeeda geeda abit gaygamng'aw.”

⁹ Ak gwayi Yakobo, “Ea ASEETA bwaabwa was Abrahamu ea ASEETA bwaabwa was Isaka, Ea NG'UTAMIIDA eeshiinean, ‘Biikta ng'eang'deang'wa ea heeda buweadeagaagu, ak gaydasineey gidamiy’,

¹⁰ Mamiisean eara gilimwanang' aba alooheeda isinnean aniineeda was soomjeandaang'u, aba gideaba aniini ghaaghaawi Yordani nea ghaaghuschi bileangida; ak ghamneawa ea naang'achi niba iyeenya.

¹¹ Geamuscheey lealnean ang'iing'i, aba geatinda orjeediyya, aba geatinda Esawu, aba gideaba aniini ghaawali niny aba gideaba gajiidu ghwahidu ak ghabwareasa eesa sean, gheamadiga ea diibiga.

¹² Amadu giyeeni, ‘Gaydasin ng'asheega miyaas, ak ghaanung' gwadeena jeacheangaagu iseaskweanda basooda, mwoamu eeyiida aba seang'ayda.’”

¹³ Hean gwalla hoowa eaweedida, ak ghwaat gidamideawa jea ghoadaw orjeeda ghaamwat was Esawu ghoah haleanjeeda guskuseega,

¹⁴ nooga seaweadi bughalaji iyeenya ea ghwaray diktam, gisilga seaweadi bughalaji iyeenya ea lagweendi diktam,

¹⁵ ngamiyajeega eanooga diktam ea damanamughuush ea dayeega nyaawa, dugwa seaweadi haradam ea jiiru damanamughuush, digeeniga seaweadi diktam ea jiiru damanamughuush bea digeeniga.

¹⁶ Ghwayiin haleanjeeni seaniin geatinga soomjoagaaschi, ak gaba hawanyeanji bwaageaw, ak gwayeesha soomjoagaaschi, “Oosheedeawanean ak goosinyi dageascheeda gooheeli hawaniga.”

¹⁷ Ak gwarukusa siida haweewa soomjooga gideaba, “Iihidu orjeeda giyeanya was Esawu roonyeedeang'wa, ak ghoanyaasheagwa gideaba, ‘Goobeayiing'a? Googali yeenu? Ak gaba ng'eaha haleanjeeni oondeawiin?’

¹⁸ Abeeda gooyeeshi, ‘Gaba soomjeandaang'u was Yakobo; suh gaba guskuseega siyaat heeda ng'utamiideanya was Esawu; nea niny ghwaan gweadu geeshteanya.’”

¹⁹ Ak gwarukusa siideaba iyeenya ea deaba samwagu ea fuga sean adeayi hawaniga, “Gajarukusiina ng'asheandida Esawu iyooroonyeewi,

²⁰ ak gajayeeshiina, ‘Ak eara soomjeandaang'u was Yakobo ghwaan gweadu geeshteanya.’” Aba gideaba ghaghay gili jea “ghahawda nyarasta aba haleanjeeda guskuseega mida madeedeanyu, ak abeeda ghaadaayi gheanyangaaschi; gwadeepa abeeda ghamwasan.”

²¹ Hean ghwaat haleanjeeda guskuseega; ak gwalla eaweedida jeeda maheemajeanda.

Yakobo gabeanyi aba Benueli

²² Eaweedida ghang'eat ak ghwaat gadeamgaaschi asiyeenya, ea haweagaaschi asiyeenya was gwealajeega sea diibigaaschi attamwanagi, ak ghoaghaawa eenda Yaboki.

²³ Ghwaat sean ea ghoaghaawa ghealooda, sea haleanjeeda sean mideawa.

²⁴ Ak geanung'wa heeda Yakobo nea gaba geaw; sea siida beanyi sea niny ea ghwariikghta gaweeshiit.

²⁵ Daah siidida gideaba moamu ghwajoar Yakobo ghawaas dughulumda; hean ghwaliy geeshta Yakobo damanda beanyeewa sea niny.

²⁶ Ak gwayeesha, “Nung' dawa, aba gideaba niweeshiit.” Ghwalamda Yakobo ak gwayeesha, “Maydanung' una, ea eaghus goonean ghawooda.”

²⁷ Ng'ata gwayeesha niny, “Gheawungaagu ng'eaha?” Gwayeesha, “Geeguureewanean Yakobo.”

²⁸ Hean gwayeesha, “Gheawungaagu maygudu eeguureewaneey Yakobo, gajeeguureewaneey Israeli, aba gideaba ning'alealeewi ASEETA ea buuneeda, ak ea nijooriischi.”

²⁹ Ng'ata ghoanyaash Yakobo niny nea gwayeesha, “Geamuscheey rukunean gheawungaagu.” Gwayeesha niny, “Ghwasaan anda giinyaashti gheawungeasu?” Ng'ata ghoadaw ghawooda Yakobo.

³⁰ Iimuchu gaguura Yakobo gheawungeaba ng'eanyiita Benueli, nea gwayi, “Naadaayi ASEETA aba gheanyangeasu, ak ea nukwa gutanda.”

³¹ Goorearu aseeta damanda beawa Yakobo Benueli, nea gwajikta aba gideaba ghwaak gibeesta.

³² Ak eara ghamneawa fuga Israeli mayghwaak biyeeyda jeeda riirda, aba gideaba ghwasat gibeesta Yakobo nooschi sea mananda.