GIING'EETA 3 - Bibliyeeda Ghaydit

Giidiinyeanda Siida

¹ Asi abeeda ichibooda ea milmil ea ghang'al diyeanga sean mida dareabeeta ghayi sin NG'UTAMIIDA was ASEETA. Gwayeesha gatmooda, “Heapi ASEETA gwayi, ‘Adoayaaji geeta wassean mida jeeda boostaani’?”

² Ak gwayeesha gatmooda ichibooda, “Geemuuschi eayaaga haghweega geediga mida jeeda boostaani,

³ amadu gwayi ASEETA, ‘Adiidu ghoayaaji haghweega geeta mida bugusta boostaani, ghana asada, abeeda gajameewa.’”

⁴ Ng'ata gwayeesha ichibooda gatmooda, “Majameewa.

⁵ Aba gideaba ASEETA ghwanal gideaba inyas ghoayaaji geedi gayghwajaada gheanyangeagwa, ak gajuurjeewana ASEETA, ak ghoanali ng'asheega miyaasiin ea gea munyas.”

⁶ Iidu nea ghwadaah gatmooda gideaba geetida aamiy aba agita, ea gideaba aamiy aba gheanyanga, ea gideaba geeta iissa ghwaseach fih ak gwanyagu bareaynata uhuuda gageanu haghweagaaschi ak ghwaak; amang'ata ghoadaw mwaatkwa siyeadaanyi, ak ghwaak.

⁷ Hean iidu ghwajaada gheanyanga nyaawa, ak ghwadaah gideaba saawa ea dawiiri; ng'ata ghwanap seenga shaboogheecheanda ak gwasissa geat ak gwaradiischeewa.

⁸ Iidu ghwayiiy ghuuta NG'UTAMIIDA was ASEETA nea gwaneayi aba jeeda boostaani nea niiw shing'ada, ng'ata ghafuy geaw siida sea gatmoadaanyi aba madeeda gheanyanga NG'UTAMIIDA was ASEETA aba dageascheeda geediga mida jeeda boostaani.

⁹ Ng'ata gaguursa NG'UTAMIIDA was ASEETA siida, ak gwayeesha, “Gindi yeenu?”

¹⁰ Ak gwayeesha siida, “Aniini ghayiinyi ghuutaang'u aba jeeda boostaani, ak ghaabeali, aba gideaba geawooschi dawiish; ak ghaafunyi geaw.”

¹¹ Ak gwayeesha ASEETA niny, “Gwayeeshiineey ng'eaha gideaba guwoosi dawiish? Neada ea noayaaji haghweegeaba geetida eayeeshiineegwa adoayaagiin?”

¹² Ghwalamda siida ak gwayeesha, “Gagoonan gatmooda ghayi igooniin haghweega geeta ak ghaayaaji.”

¹³ Ng'ata gwayeesha NG'UTAMIIDA was ASEETA gatmooda, “Ang'iing'i nisini naaha?” Gwayeesha gatmooda, “Gwareenganean ichibooda ak ghaayaaji.”

ASEETA gwarugu girgweaksiinda

¹⁴ Ghwalamda NG'UTAMIIDA was ASEETA ak gwayeesha ichibooda, “Asi ghamneawa iinisini ng'asheanji, ea simwaashtaneey aba jeeda diyeanga sean, ea aba jeeda diyeanga sean bea ghoah ea gea dareabeeta; ak gaybadiineena jeadaang'u, ak gajaga birjeanda aba jeeda eaweagaagu sean.

¹⁵ Ak gaydayiin furjeeda dageascheadaang'u ea dea gatmooda, ea dageascheeda jeataang'u ea jeataanyi; gayghwalas uhuudaang'u; ak gayghanyaada diding'daanyi.”

¹⁶ Ng'ata gwayeesha gatmooda, “Gaydaahaat lajoadaang'u damanda jea jiilana, aba sawanadeeda gayjiila diibiga, nea seechmeadaang'u gaygagal siyeadaang'u, ak gaygoombalnyi.”

¹⁷ Ng'ata gwayeesha ASEETA Adamu, “Asi ghamneawa iiniileeysiit ghuuta gatmoadaang'u, ak giyaagi haghweega geeta eayeeshiineey, ‘Adiyaagi,’ simwaashta ng'eanyiida aba badaydaang'u; gaygadiyeena aba uurda ak giyeagiischi aba jeeda eaweagaagu sean;

¹⁸ halaghweenga ea ng'oobeeshta gaygwardu aba badaydaang'u; ak gajaga seenga madamnyeanda.

¹⁹ Aba gheawoocheanda gheamamdaang'u gajaga hamita ea eaghus ea nibiikti jeeda sigeeda, aba gideaba heeda ghayi ileabu; guwoosi sigeeda, ak gaybiikta jeeda sigeeda.”

²⁰ Gang'asa ng'eedeeda gatmoadaanyi gheawunga siguura Efa, aba gideaba niny gheamata buuneesean mida ng'eanyiida.

²¹ Iidu gwasissa NG'UTAMIIDA was ASEETA Adamu ea gatmoadaanyi eagweega ea hang'weaka muuchka, ak gookwealsa.

Adamu ea Eefa geeruuteawa jeeda boostaani

²² Hit gwayi NG'UTAMIIDA was ASEETA, “Ng'ula siida biissa niwuurjeaweasa, ak ea ninal gidamiy ea gidamuy; ak ghamneawa ea adiidu ghoahaakta geadi ak gageanu haghweega geeta eaweega, ak ghwaak, ak goobiida ng'eanyiida damanda manda muudeanooda”

²³ iidu gageanu NG'UTAMIIDA was ASEETA ak gooruuteawa niny jeeda boostaaneeda Edeeni, ak ghabwar ng'eanyiida ghayi sisna.

²⁴ Hean ghahoan siida; ak ghwayiin gayeewda boostaaneeda Edeeni geeruubajeega, ea ng'uta beasta yamwa geaw aba meadajeega sean, nea gafur naweeda gal geeta eaweega.