GIING'EETA 19 - Bibliyeeda Ghaydit

Riing'eeda Sodoma

¹ Muchu ghwahidu malaykaji iyeenya ng'eanyiida Sodoma nea niiw shing'ada; nea Lutu abeeda goopteada aba gidaghuuta Sodoma. Hean nea ghwadaah ghang'eat ak ghwadeapta fugiga, ak gwatkuy,

² ak gwayeesha, “Ng'utamoojigeasu, geamuscheegwa ayamwa geat, ak gooweayi gheeda soomjeandeang'wa ak goolili eaweani, ak goohuunyi geeshangeagwa; ak abeeda goobay ang'eatng'eada ak gooweayi heechea aweayeena.” Ak gwayeesha saawa, “Manda; gajeemuuchuuna eaweani aba ghuuta naweeda mujiini.”

³ Hean goomajeeksa gideaba ashinya; ng'ata ghwayam geat ak gaweay jeedeaba gheanyi; ak gwasissa ghweelmeeda, ak ghoawu mukaateeyda meamwatawiida, ak ghwaak.

⁴ Iidu damanda miigwala, gwaneaweesa fuga mujiineeda Sodoma gheeda, fuga sean was gheareemanga ea gweargwa ea gagul siida huuydean;

⁵ hit gaguursa Lutu, “Gwanda yeenu fuga ghoosa hidu gwalla gheang'u? Aruuni fiisu jarooda ghapka heedeanya eendeawana.”

⁶ Gwarita Lutu jarooda heeda buuneeda ak ghwarat gidaghuuta,

⁷ ak gwayeesha, “Geamuscheegwa orjoogiyya, adoosinyi ng'asheega munyas.

⁸ Ang'ula geandeawi hawi iyeenya miyeasat; oomeasa daguursa ghapka heedeang'wa, ak goosimi gidoogasayi agooga; ak ea adoosimi gil fiisu, aba gideaba nupka jeedeaba gheenyu.”

⁹ Ng'ata gwayeesha saawa, “Ng'amwana heedeanya!” Ak gwayeesha, “Siisi rabascheanda gil, guwoosi ng'eaha inyas girukuneasa ng'asheesu! Asi gajeesimaneey ng'asheanda muy adaraam dea jea eesimana saawa.” Hean geasach Lutu aba uurda, ak gwaneekiisa gidaghuuta nea gagasa gwanyarja.

¹⁰ Ng'ata ghoahaakta geadi fugiga ak ghoang'waay Lutu ak ghwaat jeeda gheeda, ak ghwarat gidaghuuta.

¹¹ Hean ghwalasa fugiga ng'oowunda fugiga miinaada aba gidaghuuta gheedean, buuneesean manang'i ea gea hees, ak gagasa gidaghuuta ak ea mwanyasa.

Lutu ghabeawa Sodoma

¹² Iidu gwayeesha buuneeda Lutu, “Aba hiji gindeawi fih suugi? Siyeenatka haweega, ea orjooga, ea haweega, ghanea siida wassean indeawi aba jeeda mujiini, asi eani ak giing'aami hiji;

¹³ aba gideaba niriikghta eenyarja Sodoma, aba gideaba shooka aba badahuukeaba fiisu niheedu aba madeeda NG'UTAMIIDA, ak aseasa goojeakneasa NG'UTAMIIDA eenyarja.”

¹⁴ Iimuchu ghang'eat Lutu ak gwayeesha siyeenatka haweagaaschi, jea numuji ghaghi haweagaaschi, “Ang'eatng'eada ang'amwana hiji; aba gideaba niriikghta gwanyarja NG'UTAMIIDA mujiineani.” Nea aba heeda siyeenatka haweagaaschi gawuurji shikooda.

¹⁵ Iimuchu nea ghaghar gayeew, gwayeesha malaykajeega Lutu lamwaja, “Ng'eada ak gigeandi gatmoadaang'u ea haweagaagu asiyeenya mida hiji, adaghwanyaseagwa miyeedeaba mujiineani.”

¹⁶ Hean ea mwalamwajaada Lutu; ak ghoang'waay buuneeda geatindaanyi ea dea gatmoadaanyi sea gea haweagaaschi asiyeenya, iidu ghabwayda NG'UTAMIIDA niny, ak gweadu ak gooruuteawa jeeda mujiini.

¹⁷ Iidu nea niiruudu, gwayeesha, “Amng'eawa eaweagaagu; adisachsi ghaat bwadaw ghana miinaada aba heeda wassean aba mooheeda; mang'awsiina heayeeniga, ea mimeawi.”

¹⁸ Ak gwayeesha Lutu fugiga, “Uuw, manda, ng'utamoojigeasu;

¹⁹ ng'ula, soomjeandaang'u ninyas ghuhooda aba madeadaang'u, ak ea niihiimnaan baydeayda ak giighuuhi eaweegeasu; ak ea maydamng'awsa heayeeniga, aba gideaba gaygwaranean nyariida, ak gaydami nea mii dahita hoowa.

²⁰ Asi ng'ula, mujiineedida mwanang'iin eaneeki muuchi gaydamng'awsa, ak gabiisa aamwanang'. Ghang'wana geamng'awsi hoowa neada ea mii mwanang'i? Abeeda gayghaghu eaweegeasu!”

²¹ Gwayeesha niny, “Ng'ula, gaydabwaydaneey, ak ea maydanyarja mujiineeda irugu.

²² Asi lamwaja, mang'awsiina hoowa; aba gideaba maydasin gil ea hita hoowa.” Ak geeguura gheawungeaba mujiineedida Seari.

Nyarjeawda Sodoma ea Gomora

²³ Abeeda goorearu aseeta damanda hitaawa Lutu Seari.

²⁴ Hean ghwanung' NG'UTAMIIDA ghwaroabwan roopta ea lagheanga beasta abina humng'eeda heeda NG'UTAMIIDA ak gwaroobassa Sodoma ea Gomora;

²⁵ amang'ata gwanyarjeaweada mujiinajeegiga, ea mooheeda sea fuga sean bea mujiinajeega ea haleanjeeda sean rituuna badayda ng'eanyiida.

²⁶ Iidu ghwasach ghaat gatmooda Lutu aba bwadaw ak ghoang'wearda, ak ghoah daraneeda balang'da.

²⁷ Iimuchu ghang'eat Abrahamu sakteayda duw ea ghwahita heeda ghayi miinaadawa aba madeeda NG'UTAMIIDA;

²⁸ ak ghwahiing'da gheanyangaaschi gang'ula Sodoma ea Gomora ea ng'eanyiisean bea mooheeda, ak ging'ulayi, aroosta ng'eanyiida nea gagal humng'eeda nea gawuurji aroosta duwayda.

²⁹ Ak gwasa, damanda nyarjeawa ASEETA mujiinajeega mida mooheeda, ak ghoapkaat ASEETA Abrahamu, amang'ata goomng'eawa Lutu mujiinajeega sinyarja damanda nyarjeawa mujiinajeega abiita Lutu.

Heeda rinna fuga Moabu ea fuga Amoni

³⁰ Muchu ghabeawa Lutu Seari, ak goobiida ng'eanyiida heayeeniga sea haweesu ikaaschi iyeenya, aba gideaba ghoawal giibinda Seari; hean goobiida jeeda gwaleeda sea haweagaaschi asiyeenya.

³¹ Gwayeesha huda haw dea mwanang', “Bwaabwa niwaasiit, ak ea mandana ng'eedeeda jea ghoan heedeanya gawuurji gidasiniida buuneeda aba ng'eanyiida.

³² Beeni, eesina difaayi ak geanung' ghwali bwaabwa, ak abeeda geeluudayeewi, ak abeeda geanyaschi diibiga aba bwaabwa.”

³³ Hean ghwanung' ghwali ghwaan difaayi eaweedida; ng'ata gawa huda haw gah, ak gwaluudayi ghwaan; ak ea mwanala gidasin hudaanyi ghana gidabeada.

³⁴ Iimuchu eaweeda bassa, gwayeesha huda haw dea mwanang', “Ng'ula, ghoosa nealuudayeewi bwaabwa; eara eaweani eenung' ghwali gicha difaayi; ak abeeda guwi gah ak giluudayeewi, ak abeeda geenyaksi bwaabwa diibiga.”

³⁵ Ng'ata ghwanung' gabiikta ghwali ghwaan difaayi eaweeda niirja; ak ghang'eat huda mwanang', ak gwaluudayi; ak ea mwanala gidasin hudaanyi ghana gidabeada.

³⁶ Iimuchu ghwanyasa haweega Lutu diibiga ghwaan.

³⁷ Gwaji huda was duweacheeda baleanda, ak gaguura gheawungaaschi Moabu; ak ghoah ghweanda eemeeda siguura Moabu ea ghoah ghamneawa.

³⁸ Ak eara huda mwanang' gwaji baleanda, ak gaguura gheawungaaschi Benami; ak ghoah ghweanda eemeeda Amoni ea ghoah ghamneawa.