GIING'EETA 18 - Bibliyeeda Ghaydit

Abrahamu geeheeleesa gideaba gayghwanyas baleanda

¹ Iimuchu ghwahidu NG'UTAMIIDA headaanyi nea gwanda guumda saboojiga Mamre, nea goopteada aba ghuuta maheemajeandaanyi nea gwaju daknooda.

² Hean gagatkat gheanyangaaschi ak ghoang'wearda, ak ghwadaah fih samwagu nea ghamiinaada aba madeadaanyi. Hean nea ghwadaah fiisu, ghang'eat ak ghoang'eada ng'weega ghuuta maheemajeandaanyi ak ghwadeapta, ak gwatkuy ea ghwahita ng'eanyi,

³ ak gwayi, “Ea ng'utamiideanyu, iyoadaayi gideaba geawooschi doabiiwaat aba madeedeang'wa, ea adoasuuchi gheeda siidaang'u bea gadiyeeda,

⁴ anung' deaneegwa beesu ng'ay, ak goohuunyi geeshangeagwa, ak goofuufchi aba guumda geeta,

⁵ ak geayeaneegwa mukaateeheeni mwanang', ak abeeda ghoanyaschi uurda, ama ng'ata ghoamuuschi aweayeena nea noahidu gheeda soomjeandeang'wa.” Ak gwayeesha, “Sinda gida inyaashti.”

⁶ Deagheata ghwalamwajaada Abrahamu ak gawa jeeda maheemajeandaanyi heeda Sara, ak gwayeesha, “Lamwaja geani dearanga miyaasiin ak giinyiidi gweeraji samwagu, ak giiwaali mukaatajeega.”

⁷ Hean ghafwach Abrahamu ea ghwahita heetugwa ak gweadu meayda riishaat bea banyeega miyaas, ak ghoadaw soomjeanda ak ghwalamwach ghoawu.

⁸ Hit gageanu eanooga ea nagheedeesh, sea meayda gwachi siiwu, ak ghwayiin madeanyaawa; ak ghamiinaada aba guumda geeta nea gweagiischi saawa.

⁹ Ghwalamda saawa ak gwayeesha niny, “Gwandeenu Sarayiheeda was gatmoadaang'u?” Ak gwayeesha, “Gwanda jeeda maheemajeanda.”

¹⁰ Gwayeesha NG'UTAMIIDA, “Gaydabiigu headaang'u gweanyiin sheedeaba shageash, nea Sarayiheeda was gatmoadaang'u gajea niji baleanda.” Nea ghoaleaydiit Sara aba gidaghuuta maheemajeanda.

¹¹ Aba damani Abrahamu ea Sara ea niwoosiidi, niiw gweargwa; nea Sara abeeda ea ninaawa damanda gadeemga bea jeata.

¹² Hean ghwaak reari Sara nea gaba geaw nea gwayi, “Iinukwa naawaasiichi, ak eara siyeedeanyu ea niwaasiidi, gaygutaamu dandeawa?”

¹³ Ng'ata gwayeesha NG'UTAMIIDA Abrahamu, “Ghwasaan anda Sara ghwaak reari, nea gwayi, ‘Aba huumwa gaydaamu danyas baleanda nea nukwa naawaasiichi?’

¹⁴ Neada gwanda ng'asheanda hang'waay aba heeda NG'UTAMIIDA? Iihita damandida gaydabiigu headaang'u gweanyiin doomeelda, abeeda Sara gajea ninyas baleanda.”

¹⁵ Ghwashaang' Sara nea gwayi, “Aniini mwayaagi reari”; aba gideaba ghabeal. Gwayeesha niny, “Manda, niyaagi reari.”

Abrahamu gooyeawda Sodoma

¹⁶ Ng'ata ghang'eatng'eat fugiga ghabeawa hoowa, ak gang'ula Sodoma; ak goodeayi sea Abrahamu ak goohiimsa naweeda ak ghwanung'waada gaweay.

¹⁷ Hean gwayeesha NG'UTAMIIDA, “Maydafunya Abrahamu gida jea dasin,

¹⁸ jeacheangaaschi gayghwasaang'ayiit ak ghoah eemeeda mideawa uurda, nea aba niny gayghoadaw geat ghawooda eemoojiga sean bea muunda ng'eanyiida.

¹⁹ Manda, aba gideaba naaloachi niny, ak abeeda ghoamu gwareekusa diibigaaschi sea fugeaba gheanyi ghoang'waay ng'asheega NG'UTAMIIDA ak geasinyi ng'asheega doobiiweadi ea gea hit; ak abeeda ghoadaw NG'UTAMIIDA Abrahamu gidaheeleesa.”

²⁰ Ng'ata gwayi NG'UTAMIIDA, “Iinukwa shooka Sodoma ea Gomora aahaw nea riing'eega nyaawa ea munyas,

²¹ gaydararang'aada dadaa ea nisin gili siikuula ak ghwahidu heedeanyuun; aniini huumwa gil, gaydanal.”

²² Hean ghang'eatng'eat fugiga ak gaweay Sodoma; nea Abrahamu ghamiinaada aba heeda NG'UTAMIIDA.

²³ Ng'ata goosiipsa Abrahamu ak gwayeesha, “Ang'iing'i gigasayi lasa uhuuda fuga doobiiweadi ea gea munyasi?

²⁴ Ghamneawa iideepa gwanda fih haradam ea damanamughuush doobiiweadi jeeda mujiini; ang'iing'i gaynyarja mujiini ak ea miighuuhi aba badahuukeaba fugiga doobiiweadi aharadam ea damanamughuushiini?

²⁵ Gagasa nung' gwasheagiidaneey sinoodeaba ng'asheanji, nuusta siida doabiiwaat ak gawa hoorgeeda siida muy, abeeda gaygwasawana fuga doobiiweadi aba badahuuka fuga munyas! Gagasa gwasheagiidaneey ng'asheanji! Neada siida jea goorgweaksa ng'eanyiisean maygwasin gitoabiiwi?”

²⁶ Hean gwayeesha NG'UTAMIIDA, “Iyaanyaschi fih haradam ea damanamughuush doobiiweadi aba jeeda mujiineeda Sodoma, abeeda gaydaaghu ng'eanyiisean aba badahuuka nyaawa.”

²⁷ Ghwasha Abrahamu nea gwayeesha, “Ng'ula, samsean aba hang'ooynateanyu aba gideaba geabalooleey NG'UTAMIIDA, aniineeda was sigeeda ea deareeda.

²⁸ Amadeepa ghwashoada fih muut aba jeeda fuga aharadam ea damanamughuush doobiiweadi? Gaynyarja mujiineesean aba gideaba ghwashoada fih muudi?” Ak gwayeesha, “Maydanyarja iyaanyaschi fih haradam ea muut.”

²⁹ Gabiikta gicha ak gwayeesha niny, “Amadeepa gwanda hoowa fih haradam.” Ghwasha nea gwayeesha, “Aba badahuukeaba fiisu aharadamiin maydanyarja.”

³⁰ Ng'ata gwayeesha, “Ea NG'UTAMIIDA adiidu ginyareasi, ak gaydabiikta dabalool. Amadeepa gwanda hoowa fih diktam ea damanamughuush.” Ghwasha nea gwayeesha, “Abeeda maydanyarja, iyaanyasi hoowa fih diktam ea damanamughuush.”

³¹ Gwayeesha niny, “Ng'ula, samsean aba hang'ooynateanyu aba gideaba geabiikti deabalool Ng'utamiida. Amadeepa eanyasa hoowa fih diktam.” Ghwasha nea gwayeesha, “Aba badahuuka fuga atiktam abeeda maydanyarja.”

³² Ng'ata gwayeesha, “Ea NG'UTAMIIDA adiidu ginyareasi, ak gaydabiikta dabalool nibwagi. Amadeepa gwanda hoowa fih damanamughuush.” Ghwasha nea gwayeesha, “Aba badahuuka fuga atamanamughuush abeeda maydanyarja.”

³³ Ng'ata ghang'eat NG'UTAMIIDA gawa heechea gawa, iing'ata nea niihiit giibaloolda Abrahamu; iidu gabiikta Abrahamu ghoah.