GIING'EETA 14 - Bibliyeeda Ghaydit

Abramu ghaweat Lutu

¹ Aba damanda Amrafeli was sugoocheanda Shinari, ea Ariyoki was sugoocheanda Elasa, ea Gedorlaomeri was sugoocheanda Elamu, ea Didali was sugoocheanda Goimu,

² iimuchu gang'uchi sugoodisu sea sugoocheanda Sodoma siguura Bera, nea sugoocheanda siguura Birsha bea ng'eanyiida Gomora, ea Shinabi bea ng'eanyiida Adma, ea Shemeba bea ng'eanyiida Seboimu, ea sugoocheanda Bela (was Seari).

³ Hean googuuyi sugoodisu shirikareeda nyaawa aba moangoachiyda Sidimu (nea, balang'da).

⁴ Goobiida jeeda gheambalmeeda Gedorlaoma gweanyeew damaniyeenya, hita gweaydeaba damasamwagu geaheawa eesisa mureeda.

⁵ Hita gweaydeaba damanang'wan ghwahidu Gedorlaoma sea maseawdaanyi ea lugweega nyaawa ak ghwajoar fuga Refayimu aba Ashterot-garnaimu, ea fuga Susi aba Hamu, ea fuga Emi aba Shawe-giryataimu,

⁶ ea fuga Hori aba giijeega Seiri ea ghwahita El-parani mida ghuuta dareapcheeda;

⁷ iidu gwayamu geat ea ghwahidu Enmishpati (nea Gadeshi), ak ghwajoar darooraka sean bea Maleki, ak eara fuga Amori abiita Hasason-tamari.

⁸ Ng'ata gageanda shirikareanyaawa sugoodiga Sodoma, ea dea Gomora, ea sugoocheanda Adma, ea sugoocheanda Seboimu, ea sugoocheanda Bela (nea Seari), hean gaweay eara saawa ng'ucheeda aba moangoachiyda Sidimu

⁹ ea Gedorlaoma gil was sugoocheanda Elamu, Didali was sugoocheanda Goimu, Amrafeli Elasa, sugoodi ang'wan ng'uchi muut.

¹⁰ Abeeda moangoachiyda Sidimu ghwanyiit shoomeanga hideeda; iimuchu nea nimng'aw sugoodiga Sodoma ea Gomora, gang'adeesa mwaatkwa shoomeanga, nea gamng'awsa suurja uhuuda giijeega.

¹¹ Hean ghwahidu lugooda ak gageanda haleanjeeda sean bea Sodoma ea Gomora, ea hamichoojiga nyaawa sean, ak gaweay heechea gaweay;

¹² iidu ghwaat eara Lutu was orjeeda geenyea Abramu, abiita ng'eanyiida Sodoma ea haleanjeadaanyi ak gawa.

¹³ Ng'ata ghwahidu siyagi heeta mang'aw, ak gwayeesha Abramu was siida Ebraniya, abiita murdeeda sabiida Mamre was siida Amori, was orjeeda geenyea Eshkoli ea dea Ana; fiisu suh bareanda Abramu.

¹⁴ Iimuchu nea ghwayiiy Abramu gideaba siing'waay buweacheandaanyi, hean goosheedeawa fugaaschi siikearniit muuchi, was fuga sijiilsa gheanyi, fih bughalaji samwagu ea sis, ak gaweay ghwaat geeshta ea ghwahita Dani.

¹⁵ Ng'ata ghabwaashaada geenga eawa ak ghwanung' gaweay gang'uchi nea goodeayi niny sea soomjoagaaschi, ak ghwajoar ak gamaseaw ea ghwahita Hoba, mida gayeewda Dameski.

¹⁶ Hit ghoaghuumu haleanjeeda sean, ak goodeelu eara buweacheandaanyi was Lutu ea haleanjeadaanyi, ea gadeemga ea fuga siing'waay.

Melkisedeki ghoadaw Abramu ghawooda

¹⁷ Iidu nea gabiikna joorda Gedorlaoma sea sugoodiga mideawa, gawa sugoocheanda Sodoma roonyeeda aba mooheeda Shawe (nea, Mooheeda sugoocheanda).

¹⁸ Ng'ata gweadu Melkisedeki was sugoocheanda Salemu mukaate ea difaayi; abeeda niny ashoohoocheanda ASEETA Hawi.

¹⁹ Ak ghoadaw ghawooda nea gwayeesha, “Gagasa ghoadaw ASEETA haw bea humng'eeda Abramu ghawooda, dea ghayi sin humng'eeda ea ng'eanyiida;

²⁰ gagasa eakghaambiit ASEETA haw bea humng'eeda, iin weajoodigaagu geatingaagu!” Ak ghoadaw Abramu niny gilagi aba gilatamanamughuush.

²¹ Ak gwayeesha sugoocheanda Sodoma Abramu, “Goonean buuneeda, ak gigeandi haleanjeeda ang'iing'i.”

²² Ng'ata gwayeesha Abramu sugoocheanda Sodoma, “Aniini neayeaksi habeawooda NG'UTAMIIDA was ASEETA haw bea humng'eeda, ghayi sin humng'eeda ea ng'eanyiida,

²³ gideaba maydageanda gulbeeda ghana deandooda geeweeda ghana gida wassean was daang'u, ak abeeda ea miyeeni, ‘Naanung' gabaruur Abramu’.

²⁴ Maydageanda gil geaghus haleanjeeda lach gheareemanga, ea gisiguuyeesi sea fuga eadeayeewi; gagasa ghwanyas bareandeanyu was Ana, ea Eshkoli, ea Mamre gidageatinda nyaawa.”