GIING'EETA 11 - Bibliyeeda Ghaydit

Gidingeanda Babeli

¹ Abeeda buuneesean mida ng'eanyiida gabaloola iidagi ak ea ng'ay ng'asheega nyaawa.

² Iimuchu nea gabalakna buuneeda heeda ghayeawa, ghwanyas mooheeda aba ng'eanyiida Shinari ak goobiida.

³ Ak gaba siisi eesha niirja, “Beeni eesna matafwaari, ak geaghwardi muuchi.” Hean ghoaghiisa hoorgeeda lagheanga matafwaari, ak ghoaghiisa hideeda roonghooda.

⁴ Ng'ata gwayeesha geat, “Eesisiina geat mujiini, ea gidingeanda hita humng'eeda, ak abeeda geedeegu gheawungaasa, ak ea meedarsiini muunda ng'eanyiisean.”

⁵ Iimuchu ghwararang'aan NG'UTAMIIDA ghwadaah mujiini ea gheeda geaw, sin buuneeda.

⁶ Ng'ata gwayi NG'UTAMIIDA, “Ng'ula, fiisu ea agi, ak gabaloola iidagi; ak ghamneawa nih ea giing'eeta gichea gwasin galanya; ak ea manda gichea gagasa gwasin ak ghwaraay.

⁷ Asi apkaani, eararang'aada, ak geabwari darari iita nyaawa, ak ea mwayiinya iiteaba geat.”

⁸ Hean ghoadaarda NG'UTAMIIDA damandida ak gaweay ng'eanyiisean, ak ghwanung'waada deesta mujiini.

⁹ Ak geeng'assa mujiineedida gheawunga ak geeguura Babeli, aba gideaba heeda bwara darari NG'UTAMIIDA iita fuga muunda ng'eanyiisean; ghang'eada damandida ghoadaarda NG'UTAMIIDA gaweay muunda ng'eanyiisean.

Jeacheenga Shemu

¹⁰ Suh jeacheenga Shemu. Ghayi nea gaba Shemu gweanyeew bughala, gwaji Arpakshadi iing'ata gweanyeew iyeenya asheala guldeayda haw;

¹¹ Goobiida Shemu ng'eanyiida iing'ata jeata jih Arpakshadi gweanyeew bughalaji muut, ak gwaji orju suuk ea haweega.

¹² Gwayi bwak aba bea Arpakshadi ng'eanyiida gweanyeew diktam ea damanamuut, gwaji Shela;

¹³ hean goobiida Arpakshadi ng'eanyiida iing'ata jeata jih Shela gweanyeew bughalaji ang'wan ea samwagu, ak gwaji orju suuk ea haweega.

¹⁴ Gwayi bwak aba bea Shela gweanyeew diktam ea damanamughuush, gwaji Eberi;

¹⁵ goobiida Shela ng'eanyiida iing'ata jeata jih Eberi gweanyeew bughalaji ang'wan ea samwagu, ak gwaji orju suuk ea haweega.

¹⁶ Gwayi bwak aba bea Eberi gweanyeew diktam ea damanang'wan, gwaji Belegi;

¹⁷ ak goobiida ng'eanyiida Eberi iing'ata jeata jih Belegi gweanyeew bughalaji ang'wan ea diktam ea damanamughuush, ak gwaji orju suuk ea haweega.

¹⁸ Gwayi bwak aba bea Belegi gweanyeew diktam ea damanamughuush, gwaji Rewu;

¹⁹ goobiida Belegi ng'eanyiida iing'ata jeata jih Rewu gweanyeew bughalaji iyeenya ea shageash, ak gwaji orju suuk ea haweega.

²⁰ Gwayi bwak ama bea Reu gweanyeew diktam ea damaniyeenya, gwaji Serugi;

²¹ goobiida ng'eanyiida Rewu iing'ata jeata jih Serugi gweanyeew bughalaji iyeenya ea ispwa, ak gwaji orju suuk ea haweega.

²² Gwayi bwak aba bea Serugi ng'eanyiida gweanyeew diktam ea damanamughuush, gwaji Nahori;

²³ ak goobiida ng'eanyiida Serugi iing'ata jeata jih Nahori gweanyeew bughalaji iyeenya, ak gwaji orju suuk ea haweega.

²⁴ Gwayi bwak aba bea Nahori gweanyeew diktam ea shageash, gwaji Dera;

²⁵ goobiida Nahori ng'eanyiida iing'ata jeata jih Dera gweanyeew bughala ea damashageash, ak gwaji orju suuk ea haweega.

²⁶ Gwayi bwak aba bea Dera gweanyeew laadam ea damanamughuush, gwaji Abramu, ea Nahori ea Harani.

Jeacheenga Dera

²⁷ Suh jeacheenga Dera gil. Dera gwaji Abramu ea Nahori ea Harani; nea Harani ea ghweanda Lutuhi.

²⁸ Harani goosheedeawa ghweandaanyi was Dera miyeeda aba ng'eang'da nyaawa sijiilsa, was Uru mida ng'eanyiida Galdayo.

²⁹ Muchu gageeshi Abramu ea Nahori; gheawunga gatmooda Abramu geeguura Sarayi nea gheawunga gatmooda Nahori geeguura Milka, was hudeaba Harani was ghweanda Milka sea Iska.

³⁰ Abeeda Sarayi soonooda gil; miighwanyas baleanda.

³¹ Hean ghwaat Dera orjeedaanyi was Abramu ea Lutu ea Sarayiheeda was gatmooda orjeedaanyi, ea gatmooda orjeedaanyi was Abramu, ak goodeayi ghabeawa ng'eanyiida Uru mida ng'eanyiida Galdayo ak gaweay ng'eanyiida Ganaani; muchu nea ghwahita ng'eanyiida Harani, goobiida.

³² Gweanyeeka Dera ea bughalaji iyeenya ea muut; ak gameewsa Dera ng'eanyiida Harani.