Giidaheechta 1 - Bibliyeeda Ghaydit

¹ Nih giidaheachta Yesu Gristo gil, ghayi adaw ASEETA niny goohiimsa soomjoagaaschi ng'asheega jea gabay ghwahidu; ak ghwanung' eanal aba giijeakteayda malaykajeandaanyi gaweesa soomjeandaanyi was Yohana,

² amadu gamuuwu Yohana iita ng'asheanda ASEETA ea muuwuunooda iita Yesu Gristo, ea iita haleanjeeda sean ghayi dea.

³ Ghang'wana siida asoamwa aba ghuuta haw ng'asheega was ramoorangeasu, ak ghang'wana fugiga iiyiin, ea dea ang'waay ng'asheega sing'oorsa jeedean; aba gideaba damanda nineekiit.

Giighacheeka weesa ganiisajeega asispwa

⁴ Yohana heeda ganiisajeega asispwa mida Asiya: Gagasa anyasa dagheerjeanduumeeda ea hoyyooyda leabu heeda dea mida ea dea bean gwanda dea jea ghwahidu, leabu heeda gurooruunat ispwa mida madeeda hoorgeadaanyi bea sugoocheanduumeeda,

⁵ biissa gwaleabu heeda Yesu Gristoyda was muushoocheanda doabiiwaat, was duweacheeda fuga nimeewa, ak goombal sugoodiga mida ng'eanyiida. Heedeaba ninyeeda bwariinyeasa ak gootineasa eeheelleewana riing'eegaasa aba foojeandaanyi

⁶ ak gagoaneasa sugoocheanduumeeda, ak geahuuyi ashoohoodiga aba heeda ASEATAANYI ea Ghweanda, giigheambiita daanyi ea sugoocheanduumeeda ea ghoah damanda manda muudeanooda. Amin.

⁷ Ng'ula, ghwaan nea goodeana shamooghuutka, ak gayghwadaah niny giliwas gheang'da, ea giliwas sih ghayi ng'ut niny; ea eemoojiga sean bea ng'eanyiida gaygagutu heareagaaschi. Asaha. Amin.

⁸ “Aniini geawooschi Alfa ea Omega,” dea madeeda ea dea huuydean, aba ginyah Ng'utamiida was ASEETA, dea mida ea dea bean gwanda ea dea jea ghwahidu, was ASEETA mideawa uurda.

⁹ Aniini geawooschi Yohana, orjeeda giyeang'wa deaghayi oopareanyeewi sawanadeeda ea sugoocheanduumeeda ea milikghteayda nea ghoahang'waanyi, nea gwanda ng'eanyiida neaweesa beega siguura Batmo aba badayda ng'asheanda ASEETA ea muuwuunooda ng'asheega Yesu.

¹⁰ Muchu geandi jeeda Guroorooda eaweeda Ng'utamiida, hean ghayiinyi nyeashta haw aba badaydeanya, nyaashta giiguuleanda nea gwayi,

¹¹ “Ng'oorsiina haleanjeeda idaahi jeeda gitaabu ak giyeasi ganiisajeega asispwa, dea Efeso ea Smirna ea Bergamo ea Diyatira, ea Sardi ea Filadelfiya ea Laodikiya.”

¹² Hean ghaayamnyi geaw dadaah nyeashtida abaloolaniin, hean ghaadaayi gheaboonyan ispwa meeng'meeng'i mida deageaw,

¹³ ak ghaadaayi aba dang'adigeaba hoorgajeegiga siida uurji orjeeda siida, nea nishuup hang'da gulng'eanyi, ak ea nirassa daghataanyi inyeashta sisna dahaabu;

¹⁴ uhuudaanyi ea buudeagaaschi ea eashish ea ghawaar gea gisilleanda eesh, ea eashish ea ghawaar gapkeanda; nea gheanyangaaschi ghawaar ng'ushapta beasta,

¹⁵ ak geeshangaaschi gawuurji gharinyeanda mur sisiy muuchi ea gawuurji gilisiihuuna duwayda beasta, nea fuydaanyi ghwanyaashta dea beega saang'a;

¹⁶ ak ghoang'waanya miin ispwa aba geatindaanyi bea dugwa, ak gwarina ghuutaanyi ng'uta shidaat meadajeega sean, ak gheamamdaanyi gawuurji aseeta dagu muuchi.

¹⁷ Iidu nea ghaadaayi niny, geabeedeaysi geeshangaaschi ea dawuurji siida nimi. Hean ghwayiin geatindaanyi bea dugwa uhuudeanyu nea gwayi, “Adibeali, Aniini geawooschi dea madeeda ea dea huuydean ea dea majeek;

¹⁸ ghayi ghaameayi, ak ging'ulayi geawooschi majeek; ghayi ghaameayi, asi ng'ula geawooschi majeek damanda manda muudeanooda, ak geandeawi gisiitina gidaghuuta Miyeeda ea Gheeda maloonghajeega.

¹⁹ Asi ng'oara haleanjeeni idaahiin, ea gea ghamneawa mida, ea gea iidu jea gabassa iing'ata suh.

²⁰ Makcheameedeaba miingiga as ispwa ideaksi geatindeanyu bea dugwean, ea hoorgajeegiga as ispwa meeng'meeng'iin, miingiga as ispwaan, malaykajeega ganiisajeegiga as ispwaan ak eara hoorgajeegiga as ispwa meeng'meeng'iin ea ganiisajeegiga asispwaan gil.