GHWASIILDEANGA 8 - Bibliyeeda Ghaydit

Guurnooda weaghuumeeda

¹ Oaleaydiit weaghuumeeda gaguuru, nea bareaynata uhuuda goojuur.

² Heetiyeada was gudung'unyeanda, neekeewa ghuuta naweeda, ghamiinaada aba gheata naweeda

³ Heeda neekeewa gidaghuuta mujiini, goojuur aba gidaghuuta heeda sik buuneeda.

⁴ “Ea buuneeda, geaguurneegwa, nea aniini ghuuteanyu gaguursa buuneeda.

⁵ Ea rageananga oanaala geat fughareeda oaleaydiit muuchi fuga dasheahi.

⁶ Oaleaydiit aba gideaba gaydargu gea miyaas, ak ghuuteanyu gaygwarina ng'asheega doobiiweadi.

⁷ Aba gideaba ghuuteanyu gaygwarina huumeanda, ak ghuuteanyu ghwasit ng'asheega munyas.

⁸ Ng'asheega sean bea ghuuteanyu ea doobiiweadi, manda eara ng'asheanji ramwasaat, ghana hang'ooynata uhuuda.

⁹ Aba heeda siida nal haleanjeeda, haleanjeeda sean aadaach, nea dea mideawa fughareeda haleanjeeda sean ghoadoabiiw.

¹⁰ Ang'waanya giinealshoodeanyu nea mii lapiya gil, ea fughareeda ak gawa hoorgeeda dahaabooda miyaas.

¹¹ Aba gideaba weaghuumeeda ghang'al lagheanga sheayeeda haw, nea eara haleanjeeda sean sibwariiy ea majeegala.

¹² Aniini weaghoocheanda naanung' ghoah milmilanda giibindeanyu, gaydageanda fughareeda ea bareaynata uhuuda.

¹³ Gheawalmeeda NG'UTAMIIDA sidooda ng'asheega munyas gil, ghaasichi hang'ooynata uhuuda, ea ghwarjeeda, ea giibinda muy, ak ghaasichi baloolda muy.

¹⁴ Ghaamuuschi deabalool buuneeda, ak geandeawi weaghuumeeda, geandeawi fughareeda ak geandeawi uurda.

¹⁵ Ghaanung' ghoang'waay ng'eanyiida sugoodiga, nea fuga ambaliischi gwasin girgweageeda doabiiwaat.

¹⁶ Ghaanung' goombaliischi fuga hees, asaha fuga ambaliischi ea gea laja girgweaguutka bea badayda ng'eanyiida.

¹⁷ Ghaabwariinyi giika bwariinyaniin, nea eara giika sin badiida gagaseaniin gayghwadaahan.

¹⁸ Meanang'oocheanduumeeda ea mureeda gwanda heedeanyu, asaha, meanang'oocheanduumeeda giibinda geaw ea doobiiwnata.

¹⁹ Haghweegeasu ghang'al dahaabu, asaha, dahaabooda miyaas, ak nyageadaydeanyu ghang'al lapiyeeda siloat.

²⁰ Geaneayeewi jeeda giibinda doabiiwaat, bugusta naweeda doabiiwaat.

²¹ Ak ghaadawji hearaniischooda giika bwariinyaniin, nea ghaanyiichi haleanjeeda nyaawa adiiw.

²² NG'UTAMIIDA gwasinan doaw siida madeeda aba jeeda haleanjeeda sean, aba jeeda gadiyoojigaaschi bea madeeda ghayi bea garayi.

²³ Aniini ghayi geebean eesinaan aba mwadi, nea miyeeng'eat sinooda ng'eanyiida.

²⁴ Geejiilan nea miigwardu baskweega, nea eara gheanyanga eeniga ea mandana.

²⁵ Geejiilan nea miyeesin giijeega, nea eara heayeeniga ea miyeemiinda aba heeda mida.

²⁶ Damanda miighabwada ASEETA ng'eanyiida ea madameagaaschi, ghana birjeanda madeeda bea ng'eanyiida.

²⁷ Damanda bwada humng'eeda abeeda geandi, eara damanda ng'oara badayda basooda.

²⁸ Damanda amajeega shamooghuutka humng'eeda, nea goomajeek gheanyanga eeniga bea basooda.

²⁹ Damanda iina heechea gabiikteawa basooda, gideaba adaghwanaawa beega diigheandaanyi, damanda deasa sindeeta ng'eanyiida.

³⁰ Abeeda geendeayi nea gawuurji gearnoocheanda gadiyeeda, nea geahoosanyi niny galeagasean nea geahoosanyi galeagasean aba madeadaanyi.

³¹ Geahoosasi ng'eanyiida abiita buuneeda, ak gahaguuw gideaba geandeayi sea buuneeda.

³² Asi ooleeysean iit orjoogeasu, ghang'wana gea ang'waay naweadingeasu.

³³ Ooleeysiiniit giinealshooda ak ghoanyaschi weaghuumeeda ak ea adoaheawi.

³⁴ Ghang'wana siida aleeysean iit, nea goomuuku galeagasean aba dooshinga, nea goomuuku aba murdeeda gidaghuudajeegeasu.

³⁵ Aba gideaba siida daahan ghwadaah eaweega, ak gayghwanyas masita aba heeda NG'UTAMIIDA.

³⁶ Nea siida mwanyasaan gaygwasawan geaw, nea gea sidan ghabwariiy miyeeda.”