GHWASIILDEANGA 6 - Bibliyeeda Ghaydit

Miinda gheang'da nuut

¹ Orjeedeanyu iijea una badaydeaba siisi bea habeawoodean, ak ea nimwasi gideaba gajang'waanya geatindeaba rabascheanji.

² Asi sisachnyi aba ng'asheega ghuutaang'u, ak ea siing'waanyi aba ng'asheega ghuutaang'u.

³ Ak ghamneawa orjeedeanyu, sindunu ak giweadi geaw, aba gideaba niibisi geatinda gischeewoocheandaang'u, una ak giyaadi geaw ng'eanyi, ak gimusi gischeewoocheandaang'u.

⁴ Ang'wearni adaghwaaknyi ruweanga, nea ading'uti ghaat.

⁵ Weata geaw mayeanda, aba geatinda shageadoocheanda, ea darideanda aba geatinda siida bea ghuduumbwaada.

⁶ Ang'iing'eeda iibea ghaleehu, heapi, weesiina sing'arijeanda ak giiteemsheesi naweadingaaschi ak ginyasi weaghuumeeda.

⁷ Aba gideaba niny manda siida haw mida madeadaanyi, ghana dea ambaliischi.

⁸ Inyeesa geayda goodiiw hamitaanyi, nea damanda lajita booga iissa ghoawaam hamitaanyi.

⁹ Ea orjeeda siida ghaleehooda gaylila ea ghoah eeju? Gayng'eada eeju aba jeeda ruweangaagu?

¹⁰ Gajeena ea ghoah eeju gideaba ameasa dalil ak ghaaseali gilimwanang' ameasa damughut geatingeasu ghoang'waanyan ruweanga.

¹¹ Ak gaygoobisiindaneey barbaranda siida areedi fih haleanjeeda nea gidigasiidi haleanjeeda ghwahitaayda siida mideawa dabita.

¹² Siida marachi gil, muy seara, inyeesa gawa nea gabaloola ng'asheega munyas.

¹³ Inyeesa gwanuuksa ghaang' siida aba gheanyanga, nea goobalool buuneeda aba geeshanga, ak gaguursa buuneeda aba mooringaaschi.

¹⁴ Gurooroadaanyi gwanda roodaweega inyeesa gwanaba ng'asheega munyas galeagasean, nea inyeesa ghoang'eat jaliida.

¹⁵ Asi gaygoobisa habitkweeda aba geeshangiga, aba geeshangiga gaygagiishachi ak ea mayghahaap.

¹⁶ Gwanda haleanji lah sit NG'UTAMIIDA, asaha gwanda ispwa sit niny.

¹⁷ Gheanyanga mideawa ghwarjeeda, ea ng'ushapta baloola ng'uyeega, ea geatinga inyeesa ghoahiida foojeanda fuga mandeawana giidiinyeanda.

¹⁸ Guroorooda inyeesa gooteemsheesa ng'asheega munyas, geeshanga inyeesa gwasalsa ng'asheega munyas.

¹⁹ Muwshoocheanda ng'uyeega inyeesa gwarugu ng'asheega ng'uyeega, nea inyeesa ghang'uda foolayda buuneeda.

Reekusiinda aba hiseadayeanduumeeda

²⁰ Orjeedeanyu ang'waanya ng'asheega rukuneey gweanu, ak ea adinung'waadi deaweedeeda geamadu.

²¹ Rasiina ng'asheesu jeeda gurooroadaang'u galeagasean, nea girasi gheataang'u.

²² Heechea una sean gayghoadoabiiwnyi, iiwi ruweanga gaygafurnyi, nea inyas ging'eadi gaygoobaloolnyi.

²³ Aba gideaba diigheanji gheaboong'nyeanda gil, nea deaweedeeni nih weeshinda gil, nea reekusiinda sireekusa siida gwasin mureeda ea naweeda eaweega.

²⁴ Ak gaygafurnyi ea mwanyasnyi gatmooda muy, ea ng'ushapta bumbuni bea rabascheanda.

²⁵ Adaghabwariiy gurooroadaang'u leangaaschi, nea adumwasi ghaghasnyi aba jiiweega gheanyangaaschi.

²⁶ Aba gideaba hiseadayda inyeesa geataw banakcheanda mukaate, nea aba gatmooda siida gaygahuta siida eaweagaaschi.

²⁷ Heapi siida gayghwayiin beasta daghataanyi, ak ea mwaaga hang'weakaaschi beasta?

²⁸ Ghana siida ghoamu ghoala beasta rarayga ak ea mwaaga beasta geeshangaaschi?

²⁹ Asi ak gwasunu siida weah heeda gatmooda giischeewoocheandaanyi, ak gilinyoo ghwasat gatmooni bea siidean gajealas.

³⁰ Buuneeda maygafool mareanghweanda, iijagwadiischi aba gideaba gabearji jalooda.

³¹ Nea inyas geang'waay gajeawal niba ispwa, ak gayghoadayda haleanjeeda sean bea gheanyi.

³² Ng'eedeeda mealuul sea gatmooda siida mandeawana fughareeda earahay, gwasin ng'asheanda jea ealasa uhuuda.

³³ Gayghwanyas deaneadeeda, ak ea mwajeataw mureeda, ak gajeapwaaspwaas gidamaygoosha.

³⁴ Aba gideaba lachng'eanyiida gayghwanung' ghwanyareas siyeeda muuchi, inyas ghawalda mureandooda abeeda maygwandeawa eara baydeayda.

³⁵ Ak ea mayghamwas giighiista was sean, nea mayghamwas eara walooda haleanjeeda saang'a.