GHWASIILDEANGA 29 - Bibliyeeda Ghaydit

¹ Siida iisimiin gheang'da nyaamoana ak ghoahang'waay uhuudaanyi, gaygagiishachi nibwagi ak ea maygut ghahaap.

² Fuga doobiiweadi iyambaliischi gahoosan buuneeda, nea iyambaliischi fuga munyas searooji gwasawana buuneeda.

³ Siida bwariiy weaghuumeeda gaygoohoosan ghwaan, nea dea bareanyi sea gadeemga hiseada gayghoadabwaarda haleanjeeda.

⁴ Sugoocheanda iigadiiy aba doobiiwnata, gayghwanung' gamajeegiit ng'eanyiida, nea iibwariiy seawshooda gayghwanung' ghwanyar eemeeda.

⁵ Siida amiitu geaw aba heeda giischeewoocheandaanyi gwasin gheareedaneeda jea ghaghasa geeshtaanyi.

⁶ Siida muy gajeang'waay aba giidiinyeandaanyi, nea siida doabiiwaat gwasarman nea gahoosan.

⁷ Siida doabiiwaat ghwanal gitoobiiwsa siida bwarbwar, nea siida muy ea mwanala fughareeda jea ghwanala.

⁸ Fuga foola fih iissa ghang'uda beasta mujiini, nea fuga mideawa weaghuumeeda iissa ghwanung' ghwasiinda nyarasta.

⁹ Weaghoocheanda iisheang'nyi sea siida dasha, gayghwanyareas siida dasha ak ghwaak reari ak ea mayghwasiinda.

¹⁰ Fuga ahiideayi foojeanda ghwasit siida doabiiwaat, nea fuga doobiiweadi gang'ula saseadaanyi.

¹¹ Siida dasha iissa ghoahiimu nyarastaanyi sean, nea weaghoocheanda iissa ghoadeal ak ghwanung' ghwasiinda.

¹² Siida ambaliischi iyaleeysiit ng'uyeega, abeeda fugaaschi hees sean gaygamunyasiidi.

¹³ Siida bwarbwar ea siida ghabwas buuneeda, gilagi gil aba ng'asheanjagi, duwaawi gayghoadaw NG'UTAMIIDA gheanyanga.

¹⁴ Sugoocheanda argweaksa siida barbari aba doobiiwnata, gheambalmeadaanyi gaygamajeegiit damanda manda muudeanooda.

¹⁵ Bileangida ea miinda gheang'da gaygwanyagu weaghuumeeda, nea baleanda sinung' goobal geaw gayghoabwaaspwaas ghaamwat.

¹⁶ Inyas goombaliischi fuga munyas seara, abeeda gayghoahaada giidiinyeanyeeka, nea fuga doobiiweadi gang'ula gichea ghoabeadaayda.

¹⁷ Anaala orjeedang'u mureeda, ak gayghwanung' fuufa, asaha, ak gaygoohoosanyi.

¹⁸ Iimanda ramooranga aba jeeda buuneeda ea maygwandeawa mureeda, ghang'wana siidida aat geeshta deaweedean.

¹⁹ Madeayi gideaba siida gadiyeeda geamiin gheang'da aba ng'asheega, earapeadi nal mayghamwas.

²⁰ Heapi? Nidaahi siida iissa gwalamachsa ng'asheagaaschi, ghang'wana gighusi siida dasha, mwasamwa niny.

²¹ Siida meermeerani siidaanyi bea gadiyeeda ghang'eada jeepcheanduumeeda, huuydeanda gaygwahearaniischi.

²² Siida mideawa nyarasta gaygagwarsa jaliida, nea siida mideawa nyarasta gayghaheawa muuchi.

²³ Siida mideawa ghwarjeeda gaygoorareang'u niny, nea dea aat geaw ng'eanyi gajeataw mureeda.

²⁴ Siida bareanyi sea mareanghweanda gaygwasawan geaw nea gabwageaw, ak gayghwayiiy mooshteayda siida sighabwas ak ea maygwargu ng'ashaan.

²⁵ Gheawalmeeda buuneeda gaygweadu ghasooda, nea siida ghus NG'UTAMIIDA gaygaba seayu.

²⁶ Fuga saang'a gagasa gideaba gaygoomiitu geat aba heeda siida haw, nea giliwas sih girgweageadaanyi gaygwaleabu heeda NG'UTAMIIDA.

²⁷ Dararoocheanda sicheeda gil aba heeda fuga doobiiweadi, nea siida doabiiwaat ea sicheeda gil aba heeda fuga munyas searooji.