GHWASIILDEANGA 27 - Bibliyeeda Ghaydit

¹ Adighwari geaw aba badaydeaba numuji, aba gideaba minali gichea gapnu ghamneawa ea numuji.

² Gayghaghwarnyi sih nuut, mii ang'iing'i gil, nea gibwaageaw, siida was rabascheanda nea mii ang'iing'i gil aba ghuutaang'u.

³ Lagheaneeda ea durumwana ak eara iseaskweanda ea durumani, ak nyarasta siida mideawa leendeeda ea durumwana ea ghang'al suh asiyeenyean.

⁴ Nyarasta aang'waan ak nyarasta ea roopta haw gil, ak gayghoamu ng'eaha ghamiinaada aba madeeda lachng'eanyiida.

⁵ Ghang'wana siida reekuseey nea ghoadaajiit, mwasamwa diita fuy bariinyeegean.

⁶ Siida iduupcheewi iyawoowseey ghoadoabiiw, nea weajoocheanda eara ghwasam gheataang'u gwareenganeey.

⁷ Siida lang'uudeat eara maleeda maygagasa, nea siida bearji jalooda gida eara aang'waan ea inya.

⁸ Gidaneayeata dariideanda aba meadajeega sean ea gwasheagiideewa gheanyi, ea giduurji siida neay aba meadajeega sean ea gwasheagiideewa gheanyi.

⁹ Nagheeda ea geediga ng'andidi gayghwanung' gahoosan guroorooda, nea sawanadeeda gayghwanung' ghabwaasha guroorooda.

¹⁰ Adinung'wi heeda siidaang'u iduupcheewi, ghana siida duupchi gweanu, nea aduwi gheeda orjeeda ghaamwat damanda sawanadeadaang'u, ghang'wana giischeewoocheanda neeki mwasamwa orjeeda giyeang'wa sheagi.

¹¹ Orjeedeanyu woosa weaghoot ak ginung' gahoosan gurooroodeanyu, nea ghaashaayi ghuuta siida eateewean ghuut.

¹² Siida weaghoot iidaah ng'asheega munyas ghafuy geaw, nea fuga dasheahi gaweay mwadi ak gwasawana.

¹³ Siida iyaduugu geaw aba badayda rabascheanda aba madeadaang'u, abeeda gigeandi hang'daanyi ak ginung' gagu haleanjeeda alaach rabascheanda.

¹⁴ Siida ng'eat sakteayda duu ak badiischeesa giischeewoocheandaanyi nea goojuur, gajeaghay gideaba gawa ghamwaashta.

¹⁵ Gatmooda jaleaday galeagasean, gawuurji leapnooda gheeda damanda roopta

¹⁶ Asi iideali gawuurji gil iideali jeameeda, ghana uurji gili iing'waanyi nagheeda aba geatinda.

¹⁷ Gharinyeanda ghwashit gharinyeanda, ak eara siida ghwanal suurja.

¹⁸ Siida barsa shaboogheecheanda gayghwaak haghweagaaschi, nea dea gadiyeesa siidaanyi haw gajeataw mureeda.

¹⁹ Gididaakti gheamamdaang'u aba jeeda beega, ea gidinaldi geaw gil aba guroorooda.

²⁰ Gheeda maloonghajeega ea nyariida maygwalang'u, nea eara gheanyanga buuneeda ea maygwalang'u.

²¹ Alooheeda lapiya ghana dahaabu gajeegala beasta, ak eara siida gajeegala giigheambiitaanyi.

²² Siida dasha eara gula aba jeeda gunyooda sea booga, maygwaheeli sea leendeadaanyi.

²³ Sikteawana muuchi giduurji noagaagu, ak ging'ulayi muuchi dugwaagu.

²⁴ Aba gideaba meanang'oocheanduumeeda maba damanda manda muudeanooda, eara shiipka heapi gaygoobiida seaygoojiga seani?

²⁵ Inyas gilaji nyeega ak giidiiwi laja nyeega mida uhuuda heayeeniga, nea ghaftu nyeega.

²⁶ Dayeega gisilga gaygwanyakneey eaghwada, ak nooga gayshaayda ak gishaahi madamnyeanda.

²⁷ Ak gaygwanda eanooga deayeat bea nooga aba hamitaang'u, ea hamita fugeaba gheang'u, ea hamita haweagaagu bea gadiyeeda.