GHWASIILDEANGA 26 - Bibliyeeda Ghaydit

¹ Gawuurji gapkeanda damanda daknooda ea roopta damanda lajita booga, hean eara mureeda mamiisiina siida dasha.

² Ak gawuurji dariideanda ghana udabwaraada iing'eata ak ea mwaapta, ak eara mooshteayda mamiisiina siida mayghwanyas.

³ Faraasi gammiisa ghealooda, nea digeeda gammiisa gideaba earat ghuuta, ak badayda siida bearji leendeeda gammiisa bileangida.

⁴ Adishaahi ghuuta siida dasha, gawuurji giduurji leendeadaanyi, gajiidu guwuurjeewi niny.

⁵ Shaaha ghuuta siida dasha, aba giduurji leendeadaanyi, gajiidu gwadeaksa geaw gideaba gwandeawa weaghuumeeda muuchi.

⁶ Siida iyajeakta siida dasha, gawuurji siida lach geeshangaaschi, ak ghwaak lugooda

⁷ Ghwasiildeanga aba ghuuta siida dasha, gawuurji geeshanga siida badeeda iibwardaghaat.

⁸ Siida adaw mureeda siida dasha, gawuurji siida rassa lagheaneeda jeeda makeamooda.

⁹ Gawuurji halaghweeneeda iing'ut geatinda leeyeanda, ea giduurji ghwasiildeanga gil aba ghuuta siida dasha.

¹⁰ Siida adaw gadiyeeda siida dasha, ghana leeyeanda, gawuurji siida jakta geacheeda ak gwasawan gilinyoo ea sih gil.

¹¹ Gidabiiksiinda gudeeda geeseagaaschi, eara siida dasha gabiiksa leendeadaanyi.

¹² Heapi gidaahi siida hinda geaw gili weaghoot nea gabwageaw, ghang'wana gighusi siida dasha, mwasamwa niny.

¹³ Siida ghaleehooda iissa gwayi, “Gwanda ng'adiida jeeda naweeda, gwanda ng'adiida jeeda naweeda bareanda.”

¹⁴ Aba gidaneaweesiinda gidaghuuta gharinyeandida siradaan, ea giduurji siida ghaleehooda gil aba badayda bulaliidaanyi.

¹⁵ Siida ghaleehooda iissa ghwayiin geatindaanyi jeeda gweeriida hamita, ak ghwaraay gagatkat ea ghwahita ghuutaanyi.

¹⁶ Siida ghaleehooda aba gitaakta geaw gwandeawa weaghuumeeda, ea ghang'al fih ispwa ammu ghwasha ng'asheega aba fughareeda.

¹⁷ Siida abiita jeeda jaliida mii danyi gil, gawuurji siida ang'waay iidiga gudeeda.

¹⁸ Gawuurji siida geeska rughusta gheaboonyanga ea geatka miyeeda.

¹⁹ Ea giduurji siida reengani giischeewoocheandaanyi gil, nea gwayi, “Gida budeayda gil.”

²⁰ Beasta gayghami ii manda ghweenga, ak ii manda siida ang'uuchi buuneeda ea maygwanda jaliida.

²¹ Gawuurji gidagwarsiinda ghuurga ghana ghweenga beasta, ea gidagwarsiinda siida jaleaday jaliida.

²² Ng'asheega siida aga badahuuka buuneeda gawuurji daghwarda, iissa ghoabita ea gawa jih muuchi.

²³ Ghuuta siida amiitu geaw ea guroorooda muy gawuurji dahuuda sidukuteawa ririnnyeanda lapiya.

²⁴ Siida mideawa sicheeda iissa ghafuy sicheadaanyi aba ng'asheega miyaas, nea iissa gwandeawa ng'asheega munyas aba jeadaanyi.

²⁵ Eara gabaloola ng'asheega miyaasiin adumwasi, aba gideaba gurooroadaanyi gwanda sicheadin ispwa.

²⁶ Gwadeepa ghafuy sicheadaanyi, nea munyindaanyi gayghwadaajiit aba madeeda fuga bwat geat.

²⁷ Siida iighurghur shoomanda gayghoabita niny, nea dea arakghraakghta lagheaneeda gaygabiiksa niny.

²⁸ Siida ruku ng'uyeega gwasin giika sawaniin, nea dea sapsap gaygweadu nyariida.