GHWASIILDEANGA 24 - Bibliyeeda Ghaydit

Ng'asheandeaba damashageash

¹ Adishisi ghaang' fuga munyas searooji, nea adishisi ghaang' giibindeaba hijagi sea saawa.

² Aba gideaba gurooruunatka nyaawa gooteemsheesa giireeta haleanjeeda buuneeda, nea ghuusiga nyaawa gabaloola ng'asheega munyas.

Ng'asheandeaba diktam

³ Gheeda geadeasa weaghuumeeda, ak geemajeega nalooda.

⁴ Nea aba fughareeda ghoorajeagaaschi geanyiit haleanjeeda sean bea sheayeeda haw, ea gea miyaas.

Ng'asheandeaba diktam ea agi

⁵ Siida mideawa weaghuumeeda gwandeawa uurda ea ghang'al siida majeek, ak siida mideawa fughareeda ghang'al dea mideawa uurda.

⁶ Aba gideaba fuga gadiyeata weaghuumeeda aba ng'ucheeda gaygwajooriischi, nea aba girgweaksiinda fuga saang'a gaygwanda lealeanooda.

Ng'asheandeaba diktam ea iyeenya

⁷ Siida dasha mayghwanyas weaghuumeeda, nea mayghwajaat ghuutaanyi eara aba dooshta.

Ng'asheandeaba diktam ea samwagu

⁸ Siida iissa ghwadaawdaaw sinooda ng'asheega munyas gajeeguura siida sadaat.

⁹ Giiteemshooda siida dasha riing'eeda gil, nea siida machiida buuneeda gayghwanung' ghwanyareas buuneeda.

Ng'asheandeaba diktam ea ang'wan

¹⁰ Iibur guroorooda damanda sawanadeeda, abeeda ang'iing'i guwoosi ng'arng'ari muuchi.

Ng'asheandeaba diktam ea muut

¹¹ Weada siida siyaat eenuus mwadaagha, nea adibiikti bwadaw aba weeta siida sinuus nea mandeawana giidiinyeanda.

¹² Ak iidu ea adiyeeni, “Mii eanala,” aba gideaba ASEETA sikiideawa gurooruunatka buuneeda gang'ulu, gaygawalneey aba giteena gadiyoojigaagu.

Ng'asheandeaba diktam ea lah

¹³ Orjeedeanyu aga maleeda, aba gideaba ghwahit, bearga maleeda iisamu ea innya.

¹⁴ Ea giduurji weaghuumeeda gil aba saseadaang'u, inyas ginyasi, abeeda gaymideawana rarooda miy, ak gidigasayi ea maygaba mwadaagha.

Ng'asheandeaba diktam ea ispwa

¹⁵ Ea orjeeda siida muy seara adigwalgwaleesi heeda abiita siida doabiiwaat, nea adinyarji heeda jea gafuufa.

¹⁶ Aba gideaba siida doabiiwaat gayghoabeada niba ispwa ak ghang'eat gicha, nea fuga munyas searooji gaygwaruusa ng'asheega munyas.

Ng'asheandeaba diktam ea sis

¹⁷ Adihoosani iyabeada weajoocheandaang'u nea adagang'weela gurooroadaang'u iyabeada weajoocheandaang'u;

¹⁸ adiidu ghwadaah NG'UTAMIIDA ng'asheanji ak ghwanyareas ak iidu ghahawda nyarastaanyi.

Ng'asheandeaba diktam ea shageash

¹⁹ Adinyareasi aba badayda fuga sina ng'asheega munyas, nea adishisi ghaang' fuga munyas searooji.

²⁰ Aba gideaba siida muy numuji mayghwanyas ng'asheega miyaas, gheaboong'nyeanda siida muy seara gaygamis.

Ng'asheandeaba diktam ea damanamughuush

²¹ Orjeedeanyu awala gheang'da NG'UTAMIIDA ea sugoocheanda, nea adibareanyeewi fuga marachi gil.

²² Aba gideaba lasooda nyaawa bea uhuuda gayghwanyas aba geeshangiga, ak ea manda siida nal miyeeda nyaawa gichea gooruudu.

Ng'asha suuk bea weaghuumeeda

²³ Ak eara suh ea ng'asheega fuga weaghoodi gil, shiitmeeda buuneeda aba girgweageeda mwahida.

²⁴ Dea iissa gwayeesha siida muy seara, “Ang'iing'i gindeawi doobiiwnata,” siisi gayghamwaashta buuneeda, nea ghwasit eemoojiga.

²⁵ Ak fuga awoowsa fuga munyas searooji, gaygahoosan, nea ghwanyas ghawooda miy.

²⁶ Siida iissa gwarugu ng'asheanda doabiiwaat gawuurji gili sam ghuuta.

²⁷ Sina gadiyeadaang'u aba hoowa bea jaroodean, ahiida gadiyeadaang'u aba madamnyeanda, amahit gideasi gheang'u.

²⁸ Adinapiisi giischeewoocheandaang'u ng'uyeega mwadaagha, nea adireenganayi aba ghuutaang'u.

²⁹ Adiidu giyeeni, “Gaydasima niny gidasimanean, ak gaydawalda aba heedeaba siisi gawuurji gidasin niny.”

³⁰ Geasikchi murdeeda madamnyeanda siida ghaleehooda, ea murdeeda madamnyeanda sabiibu bea siida manda fughareeda,

³¹ Ak ghana madamnyeanda sean ea nirina halaghweenga, nea ng'eanyiidaanyi sean ea nidukuta moorooka, ak ghamardaanyi bea lagheanga ea ninyar.

³² Hean iidu nea ghaang'weardi geateemshi muuchi, ghaadaay ak ghaanyaschi giinealshooda.

³³ Ng'utaghaat gilimwanang' ak gilili gilimwanang', mughuda geatingaagu ak gifuufi.

³⁴ Asi barbarandaang'u ghwahitaayda siida areedi fih haleanjeeda, nea gigasiidi siida mideawa dabita ng'ucheeda.