GHWASIILDEANGA 23 - Bibliyeeda Ghaydit

Ng'asheandeaba lah

¹ Inyeesa giipteadi ak giyeagiischi sea siida ambaliischi, asi ng'ula muuchi gwanda ng'eaha madeadaang'u.

² Nea iiwoosi deaw aba agiischooda, abeeda giing'waanyi geaw.

³ Adishisi ghaang' hamichoojigaaschi bea miyeenooda, aba gideaba hamichoojiga milmilanda gil.

Ng'asheandeaba ispwa

⁴ Adisawani geaw aba gasooda baruureega, adigadiyeati fughareadaang'u ak ghwahit.

⁵ Heapi! Gayng'uleena gheanyanga haleanjeeda marachi gili? Aba gideaba baruureega gwasissa geaw meang'eega, gawuurji rabearda ng'eata gawa humng'eeda.

Ng'asheandeaba sis

⁶ Adiyaagi hamita siida mideawa lachng'eanyiida, nea adishisi ghaang' hamichoojigaaschi bea miyeenooda.

⁷ Aba gideaba aba jeadaanyi gwayiida hamita iyaagi ak gaygwayeeshiineey, “Agiischeena, leesheena,” nea aba jeadaanyi ea manda headaang'u.

⁸ Murmurjeandida iyaagiin gaygeesa ak ng'asheagaagu miyaasiin gaygabay gwarooda.

Ng'asheandeaba shageash

⁹ Ng'asheagaagu adirukusi siida dasha, aba gideaba gaygafool weaghuumeeda ng'asheagaagu.

Ng'asheandeaba damanamughuush

¹⁰ Adigeandi giirooraneeda moonghooda ghayi bea ng'eanyiida, nea aduwi jeeda madameega bananga.

¹¹ Aba gideaba lealnoocheanda nyaawa gwandeawa uurda, gayghaweat saawa.

Ng'asheandeaba damwanagi

¹² Gadiyeata fughareadaang'u ak giyaadi geeshta giinealshooda, gadiyeata iitaang'u ak giileeysiit ng'asheega fughareeda.

Ng'asheandeaba damaniyeenya

¹³ Adinung'waadi bayiiga baleanda, aba gideaba aba bileangida mayghami.

¹⁴ Inyas gibwari niny aba bileangida, abeeda gajaghuuha niny aba gheeda maloonghajeega.

Ng'asheandeaba damasamwagu

¹⁵ Orjeedeanyu, inyas ea weaghoot gurooroadaang'u abeeda eara gurooroodeanyu gaygahoosan.

¹⁶ Ak gaygahoosan gurooroodeanyu inyas gabaloola ghuutaang'u gea doobiiweadi.

Ng'asheandeaba damanang'wan

¹⁷ Adiidu ghwanyas gurooroadaang'u lachng'eanyiida aba badayda fuga riing'eega, asi awala NG'UTAMIIDA galeagasean.

¹⁸ Aba huumwa gwanda galanya ak ghusoadaang'u ea majeegeanda.

Ng'asheandeaba damalah

¹⁹ Aleaydiit orjeedeanyu ak guwoosi weaghoot, ak giigeali gurooroadaang'u naweeda miy.

²⁰ Adiwoosi siyagi aba jeenyaawa leeha difaayi, ghana aba jeenyaawa deawi aba banyeega.

²¹ Aba gideaba leeyeanda ea siida deaw huuydeanda gayghoah siida bwarbwar, nea siida roojeadayi gaygookwa hang'da beareadi.

Ng'asheandeaba damanispwa

²² Aleeysiiniit gweanu ghayi jiilneey, nea adifooli geamadu iiwaasiit.

²³ Shaaha huumeanda ak ea adishaaydi, shaaha weaghuumeeda, giinealda ea nalooda.

²⁴ Ghweanda baleanda doabiiwaat gaygahoosan, nea dea jih baleanda weaghoot gaygahoosassa.

²⁵ Dahoosana gweanu ea geamadu ak ea dahoosana dea jiilneey.

Ng'asheandeaba damasis

²⁶ Orjeedeanyu goona gurooroadaang'u, gheanyangaagu dahoosana aba naweadingeasu.

²⁷ Aba gideaba hiseadayda gawuurji shoomanda sheagi jih, ak gatmooda hiseada gawuurji healadeeda mwanang'.

²⁸ Niny iissa gagwalgwaleesa, gawuurji siida areedi fih haleanjeeda, iissa ghwanung' goodiiy headiga saang'a.

²⁹ Googuul geabeang'a? Ghang'ut gurmeahiida geabeang'a? Ghwajal geabeang'a? Ghoaniikgh geabeang'a? Fuga mideawa deaneaduutka mwadaagha geabeang'a Fuga areeri gheanyan geabeang'a?

³⁰ Giika moosiipiida aba jeeda difaayiin gil, iissa gaweay gagasa difaayeeda siikuuyi.

³¹ Ading'ulayi difaayeeda areara, eara ghwayiin oormeadaanyi jeeda gikoombe, ak ghwararang'aada nea goojiileada.

³² Huuydeanda gaygaganyeatiideayda ichibooda, ak gang'utiideayda ichibootuw.

³³ Gheanyangaagu gayghwadaah ng'asheega bunu, nea gurooroadaang'u gooruudu gea roodeadi.

³⁴ Asaha, gaywuurjeewana siida lil aba bugusta basooda, ghana uurjeewana siida ng'utaghaat aba uhuuda geeta.

³⁵ Ak gajeena, “Gealasan ak ea mii dasawana, hean geabwaran ak ea meandeawani iita, gaydang'eat eeju, gaydawa dagasa gicha gichea dali.”