GHWASIILDEANGA 22 - Bibliyeeda Ghaydit

¹ Ghang'wana giloadi gheawunga miyaasiin mwasamwa baruureega saang'a, ea alooheeda mwasamwa lapiya ea dahaabu.

² Meanang'oocheanda ea siida bwarbwar iissa gwaroonyeesa hijagi, saawa iyeenyeeda nyaawa gwasin NG'UTAMIIDA.

³ Weaghoocheanda iidaahaan habitkweeda gawa ghafuy geaw, nea siida dasha gawa ghoahiimda geaw ak gaygwasawana.

⁴ Garbabanda ea gheawalmeeda NG'UTAMIIDA, gaygwanyakneey giimearda, ea mureeda, ea eaweega.

⁵ Naweeda fuga munyas ghwanyiit halaghweenga ea ghaseeda, siida gasa ghaweat eaweagaaschi gaygamulsa.

⁶ Anaala baleanda giibinda doabiiw, ak ea mayghwanung'waada ea ghawaasiit.

⁷ Meanang'oocheanda goombal siida bwarbwar ak siida alaach lapiya ea soomjeanda siida alaaja.

⁸ Siida hista ng'asheega munyas gayghwalach miyeeda, ak bileangida nyarastaanyi gayghwasiinda.

⁹ Siida inya jih gajeebadiischeesa, aba gideaba hamitaanyi iissa ghoadaw fuga barbari.

¹⁰ Hoana siida foola fih gwarita jarooda, ak gaygoosha deakghuyandeeda, nea goosha eara jaliida ea giing'weaka.

¹¹ Siida ateemsheesa gea miyaasiin ea ng'asheega miyaas, gaygwaduupchi sea sugoocheanda.

¹² NG'UTAMIIDA gafur siida mideawa fughareeda ak ghwayam ng'asheega fuga munyas.

¹³ Gwayi siida ghaleehooda, “Jarooda gwanda ng'adiida! Gayghwaagan aba naweeda bareanda!”

¹⁴ Ghuuta gatmooda hiseada gawuurji shoomanda sheagi jih, nea dea sit NG'UTAMIIDA gayghoabita jeeda.

¹⁵ Jeepta ghabwariiy ng'asheega leendeeda aba jeeda gurooroadaanyi, ak bileangida mureeda gaygageanda leendeeda.

¹⁶ Siida iissa ghaghabwas siida bwarbwar, aba huuydeanda gayghwanung' ghwanyagaada, nea dea jea ghoadaw meanang'oocheanda haleanjeeda guskuseega gayghwanyas barbaranda.

Ng'asha diktam ea damanamughuush bea weaghoocheanda

¹⁷ Aleaydiit iinya ng'asheega fuga weaghoot, ak giigeali gurooroadaang'u heeda fughareedeanyu.

¹⁸ Ak gaygahoosana iiyiini jeeda gurooroadaang'u, nea giruku aba damanyoojiga sean.

¹⁹ Ak raroadaang'u giyiini heeda NG'UTAMIIDA, ak ghamneawa ea nearukuneey ng'asheesu, asaha ang'iing'i.

²⁰ Heapi! Mii dang'oorneey ng'asha diktam ea damanamughuush, bea badayda miinda gheang'da ea fughareeda

²¹ Ak ghoahiimneey ng'asheega doobiiweadi bea huumwa, nea girukusi ng'asheega huumwa fuga ajeakneey.

Ng'asheanda Madeeda

²² Adiireadi siida bwarbwar gida aba gideaba ea bwarbwar, nea adiireadi siida manda uurda aba dooshta.

²³ Aba gideaba NG'UTAMIIDA gayghaweat saawa, ak niny gaygageanda eaweega nyaawa giika areedi haleanjeedean.

Ng'asheandeaba iyeenya

²⁴ Adiduupcheewi siida mideawa nyarasta ng'waan, nea adiideayeewi siida mideawa nyarasta ng'waan.

²⁵ Adiidu giinaali geaw naweadaanyi, ak ghoang'waanyi ghaseeda.

Ng'asheandeaba samwagu

²⁶ Adihuwi siyagi aba jeedeaba fugiga iissa gwaheeleesa gida, fuga iissa ghwayiin mooneeda aba badayda fuga mideawa siileeniga buuneeda.

²⁷ Aba gideaba ii manda gichea aghiisana nea gaygageanda bulaliida iroochi.

Ng'asheandeaba ang'wan

²⁸ Adigeandi giirooraneeda moonghooda ng'eanyiida, ghayi iin ghweanigaagu.

Ng'asheandeaba muut

²⁹ Heapi nidaahi siida geariir aba gadiyeadaanyi? Nih gayghamiinaada aba madeeda sugoodiga, mayghamiinaada aba madeeda fuga hees.