GHWASIILDEANGA 21 - Bibliyeeda Ghaydit

¹ Guroorooda sugoocheanda gwanda geatinda NG'UTAMIIDA gawuurji ghealooda gulda beega, iissa googeal heeda wassean gasa.

² Siida iissa ghwadaah naweadingaaschi sean ghwadoabiiw nea NG'UTAMIIDA gang'ula gurooruunatka.

³ Sinooda ng'asheega miyaasiin doobiiweadi gayghwanung' gahoosan NG'UTAMIIDA ea ghang'al lukghumajeega.

⁴ Gheanyanga ghwarjeeda ea guroorooda weashweashta gayghoahiimu riing'eeda fuga munyas.

⁵ Gida adaawdaaw siida gadiiy muuchi gayghwanyas baruureega saang'a nea gili nyooh goobitiisa haleanjeeda ea mayghwanyas gil.

⁶ Haleanjeeda sinyasa reengaweega, gawuurji aroosta ng'ata, ak ea ghasooda miyeeda gil.

⁷ Ak gaygageanda ghwarjeeda fuga munyas, aba gideaba ghaheawa gwasin ng'asheega doobiiweadi.

⁸ Naweeda siida mideawa riing'eeda nischoarda muuchi, nea siida miy, gadiyeadaanyi ghoadoabiiw.

⁹ Siida ghang'wana goobiida ghwanadeeda gheeda bea uhuuda gheeda, mwasamwa gideaba gaygoobiida gheeda haw sea gatmooda awoowi.

¹⁰ Guroorooda siida muy seara gagasa ng'asheega munyas, ak giischeewoocheandaanyi mayghwanyas baydeayda aba madeadaanyi.

¹¹ Inyas gilasi siida machiida buuneeda, gayghwanyas siida dasha weaghuumeeda, ak iisiinaal weaghoocheanda, abeeda gayghwanyas fughareeda.

¹² Siida doabiiwaat iissa gooteemsheesa gheeda siida muy seara, fuga munyas iissa geejaksa ng'eanyi ak gealas uhuuda.

¹³ Siida iissa gwadukuta iidigaaschi ak ea mooleeysiiniit shooka siida bwarbwar, asi eara niny gaygooyeawda ak ea majeeleeysiit.

¹⁴ Haleanjeeda hayapta mida heeda funyaat gayghwanung' ghahawda nyarasta, ak seawshooda mida weeleeda hang'da gayghwanung' ghwasiinda nyarasta ng'waan.

¹⁵ Iissa iisisin doobiiwnata gahoosan fuga miyaas, nea fuga munyas seara gwahirbiban.

¹⁶ Siida ramwas naweeda weaghuumeeda, gaygafuuf aba jeeda girgweageeda fuga nimeewa.

¹⁷ Siida bwariiy miyeenooda gayghabwarbwariit, nea dea ateemsheesa agiischooda ea leeshooda gabeachi, maygabaruur.

¹⁸ Siida mii doabiiwaat waldeayda fuga doobiiweadi gil, nea dea sina ng'asheega milmilanda gaygawa hoorgeeda fuga doobiiweadi.

¹⁹ Ghang'wana giibinda jeeda dareapcheeda, mwasamwa mideayeeda gatmooda jaleadayi nea goosuuksuugi fih.

²⁰ Aba gheeda siida weaghoot gwanda haleanjeeda siitiiw bea sheayeeda haw, ak siida mideawa leendeeda ghwaak haleanjeadaanyi sean.

²¹ Siida gasa doobiiwnata ea baydeayda, gayghwanyas giibinda geaw nea geataw mureeda.

²² Siida mideawa weaghuumeeda gayghoamu gageanda mujiineeda fuga mideawa uurjeenga, nea gwanyarja hilgweandida ghusiin.

²³ Siida fur ghuutaanyi ea ng'ushaptaanyi gaygafur saseadaanyi aba sawanadeeda.

²⁴ Siida ghwarjeeda ea weashweashta gheawungaaschi geeguura “Dea sheang'a ng'asheega”, iissa gwasin ng'asheega aba weashweashta ea ghwarjeadaanyi.

²⁵ Siida ghaleehooda gayghami aba gideaba mwanyasa gidagasa, aba gideaba geatingaaschi magasa gwasin gadiyeeda.

²⁶ Siida muy seara iissa askwearda sean gagasa ghwanyas gil, nea siida doabiiwaat iissa ghoadayda, ak ea maygabiiksa.

²⁷ Ng'utamiida ghwasit lukghumeeda siida muy seara, mayghwaraanya muuchi iyadayda nea gabada gea munyas.

²⁸ Muushoocheanda ng'uyeega gayghwaroat, nea siida iing'shi gaygwarugu ng'asheega majeekcheewi.

²⁹ Siida muy seara iissa ghoahiimu geaw gideaba ea mwaay, nea siida doabiiwaat gwasawsa gideaba nisin gida hidaat.

³⁰ Manda weaghuumeeda ghana fughareeda, ghana girgweaksiinda jea ghaweanyi aba badayda NG'UTAMIIDA.

³¹ Faraasi inyeesa geang'aap aba damanda ng'ucheeda, ak jooriischooda gwaleabu heeda NG'UTAMIIDA.