GHWASIILDEANGA 20 - Bibliyeeda Ghaydit

¹ Difaayi gweatu machiideayda buuneeda, nea leeshooda gweatu jaliida, ak siida adiiy aba badaydeaba suh ea mandeawana weaghuumeeda.

² Gharbeeda sugoocheanda gawuurji nyeashta ng'adiida, ak siida anyareas gaygwashageat eaweagaaschi.

³ Siida saja geaw jaliida gwandeawa mureeda, nea gilinyoo ea dasha ghabwariiy jaliida.

⁴ Siida ghaleehooda mayghabwar ng'eanyi damanda barooda, nea iiheas booga gaygaweelweel gagasiischi ak ea mayghwanyas gil.

⁵ Gida ateemsheata siida aba jeeda gurooroadaanyi gawuurji beega sheagi jih, nea siida mideawa fughareeda ghwanal gichea gwajeeng'deayda.

⁶ Fuga saang'a gagwarageat gideaba aamiyaas, ak siida doabiiwaat bea huumwa gayghoamu ng'eaha ghwanyas.

⁷ Siida doabiiw bea giibinda doabiiwaat– iidu orjoagaaschi gajeebadiischeesa iing'am niny.

⁸ Sugoocheanda iyapteada aba uhuuda hoorgeadaanyi bea gheambalmeeda damanda girgweageeda, gayghwanal ng'asheega munyas sean aba gheanyangaaschi.

⁹ Gayghabwadakta ng'eaha gwayi, “Naanung' gaweeshiit gurooroodeanyu, naamiidu aba riing'eedeanyu”?

¹⁰ Gisiiteeniida bea ng'uyeega ea gisigaliida bea ng'uyeega aba giteena sean munyinda gil, aba heeda NG'UTAMIIDA.

¹¹ Eara baleanda inyeesa geanala sinaweagaaschi, gideaba giibindaanyi aamiy nea doabiiwaat.

¹² Iita iing'shi ea gheang'da ang'wearda suusean asiyeenyean gwasin NG'UTAMIIDA.

¹³ Adibwariinyi ruweanga, gayghoang'waanyi barbaranda, jaada gheanyangaagu ak gaymideawana hamita deayeat.

¹⁴ Gwayi siida sheayi, “Nih eamuy, nih eamuy,” ama ng'eat gawa hean ghaghwar geaw.

¹⁵ Gwanda dahaabu, ea lagheanga saang'a haw sheayeat, ak gidahaw sheayeat muuchi ea ng'asheega fughareeda gil.

¹⁶ Siida iyaduugu geaw aba badayda rabascheanda aba madeadaang'u, abeeda gigeandi hang'daang'u ak ginung' gagu haleanjeeda alaach rabascheanda.

¹⁷ Hamita sinyasa reengaweega ea inya aba heeda siida ak aba huuydeanda gaygawuurji iseaskweanda aba ghuuta.

¹⁸ Gidasidaawdaaw miy geesin nea geebalool iigasayi giing'eeta ng'ucheeda gidamadeeda nyooh ateemsheena.

¹⁹ Siida bwariiy ng'uyeega mayghafuy ng'asheega makcheameeda, asi sajana geaw siida bwariiy ng'uyeega.

²⁰ Siida mwaashta ghwaan ghana ghaamwat, gheaboong'nyeandaanyi gaygamis aba jeeda misaneeda haw.

²¹ Haleanjeeda sibean eanyasa hearaniischooda aba mwadi huuydeanda maygwanda ghawooda.

²² Adiyeeshi geaw, “Gaydawalda gidamuy.” Amuukghuni NG'UTAMIIDA ak gayghaweanyi

²³ Haleanji iyeenya siiteeniida eamuy aba heeda NG'UTAMIIDA, nea haleanjeeda bea ng'uyeega ea mwahida.

²⁴ Naweadinga siida goobal NG'UTAMIIDA, ak siida gayghwanaldaan naweadaanyi.

²⁵ Ng'asheanji washta gil gideaba siida gaygabaloola budeayda nea gwayi, “Gaydaadaw NG'UTAMIIDA gili,” ak iidu gabiisa gooteemshi nea nihit radita.

²⁶ Sugoocheanda mideawa weaghuumeeda inyeesa ghoaleal fuga munyas searooji, ak ghwalas uhuuda nea mabaysiina.

²⁷ Giisiimeanda siida gheaboong'nyeanda NG'UTAMIIDA gil, inyeesa gwasikteawa gea mida jeadaanyi sean.

²⁸ Sugoocheanda gaygoombaliischeewa alooheeda ea doobiiwnata, ak gheambalmeadaanyi gaygamajeegiit aba doobiiwnata.

²⁹ Giigheambiita gheareemanga uurda nyaawa gil, nea miyinda gweargwa ea uhuuda mida ghearashka gil.

³⁰ Ghururuutka bayiiga iissa gageanda munyinda, ak bayiiga gaygoohuun saseeda ea gawa jih.