GHWASIILDEANGA 19 - Bibliyeeda Ghaydit

¹ Ghang'wana siida bwarbwar bea giibinda doabiiwaat, mwasamwa roodaneeda ng'asheega ea leendeeda.

² Ak ea miimiy gideaba siida mandeawana fughareeda, siida weah ea ghwalamwajaada gaygwaruusa geaw.

³ Siida iibeagu geaw aba leendeadaanyi abeeda gaygoogeal nyarastaanyi heeda NG'UTAMIIDA.

⁴ Meanang'oocheanduumeeda iissa gweadu fuga saang'a siduupchi, nea siida bwarbwar gajeenung'usa heeda nea gwanya sih.

⁵ Muushoocheanda ng'uyeega mayghwashiy lasooda, nea dea ruku ng'uyeega majaghanyi ea mealasa.

⁶ Fuga saang'a gaygamearmearani siida haw ghwanyas alooheeda, ak giliwas sih gwaduupchi siida adayiida haleanjeeda hayapta.

⁷ Siida barbari ghwasit orjooga ghaamwat, eara fugaaschi duupchi ghwasaja geat niny, iissa ghwaat geeshta goobaloola ng'asheega miyaasiin mayghwanyas.

⁸ Siida nyas weaghuumeeda ghabwariiy geaw, nea dea ang'waay fughareeda gayghwanyas gea miyaas.

⁹ Muushoocheanda ng'uyeega mayghwashiy lasooda, nea dea ruku ng'uyeega gajealas.

¹⁰ Giibinda miyeenooda mwahida aba heeda siida dasha, ak eamuy muuchi gideaba soomjeanda gaygoombal fuga hees.

¹¹ Siida mideawa weaghuumeeda maygabean ghwanyareas, nea niny iisamsa siida aba headaanyi ea giigheambiita gil.

¹² Nyarasta sugoocheanda gawuurji nyeashta ng'adiida, nea alooheadaanyi gawuurji rahooda badayda nyeega.

¹³ Orjeeda dasha sareenda gil aba heeda ghwaan, ak jaliida gatmooda gawuurji leapnooda moosha bea gheeda.

¹⁴ Gheeda ea haleanjeeda hearaniischooda gwaleabu heeda ghweaniga, sighus gatmooda weaghoot goodawi siida NG'UTAMIIDA.

¹⁵ Ghaleehooda gayghang'uda siida ruweanga saang'a, ak siida ghaleehooda gayghabwar jalooda.

¹⁶ Siida ang'waay diigheanda ghoang'waay eaweagaaschi, nea dea fool ng'asheanda gayghami.

¹⁷ Siida weat siida bwarbwar ghwanung' ghoalaach NG'UTAMIIDA, ak Ng'utamiida gaygawalu aba sinaweagaaschi miyaas.

¹⁸ Miina gheang'da orjeedang'u nea gudugwanda rarooda, nea adiyaagi ghoorjooda ghana lasa.

¹⁹ Siida nyarasta ng'waan gayghwanyas ghoorjoadaanyi, aba gideaba earapeadi nilealu gaygabiikta gicha.

²⁰ Aleeysiiniit girgweaksiinda ak giing'waanyi giinealshooda, ak gaynyasa weaghuumeeda aba damanda siipuut.

²¹ Siida iissa ghwadaawdaaw ng'asheega saang'a aba uhuudaanyi, nea ng'asheanda jea gwasa ea gidagasiida NG'UTAMIIDA gil.

²² Gidasigasa aba heeda siida doobiiwnata, ghang'wana siida bwarbwar mwasamwa siida ng'uyeega.

²³ Badooda NG'UTAMIIDA gagal heeda eaweega, gaygoopteada nea nilang'u, nea mayghwanyas ng'asheanda muy.

²⁴ Siida ghaleehooda gawuurji siida abuuta geatindaanyi jeeda gweeriida hamita, ak ea moamu ghwayiin ghuutaanyi.

²⁵ Lasa siida machiida fih, ak gayghwanyas rageananeeda weaghuumeeda, reekusiina siida nala haleanjeeda ak gayghwanyas fughareeda.

²⁶ Siida siniisa ghwaan ng'asheega munyas, ak ghahoan ghaamwat, nih orjeeda eadu baspaseega gil ea giiniikghta.

²⁷ Orjeedeanyu inyas ginung'waadi giileeysiindeaba iit bea giinealshooda gayroada ea sheagiidana ng'asheega weaghuumeeda.

²⁸ Muushoocheanda marachi gil gamachiida doobiiwnata, ak ghuuta siida muy ghwanukghuta ng'asheega munyas.

²⁹ Ghoorjooda geesin aba heeda fuga machiida buuneeda, ak eara bayiiga ea nihit aba badahuuka fuga dasheahi.