GHWASIILDEANGA 18 - Bibliyeeda Ghaydit

¹ Siida aheeli geaw buuneeda gagasa ng'asheagaaschi nea gabwageaw, iissa ghwanyareas iisirukusa ng'asheanda miy.

² Siida dasha magasa fughareeda, niny aba headaanyi gagasa fughareadaanyi ak ghwahit.

³ Iihidu siida muy seara ghwahidu eara foolda, sea baspaseega ak ghwahidu eatoodeaba ghuut.

⁴ Ng'asheega ghuuta siida gawuurji beega eenda sheagi jih, eenda gulda ea gheang'deenda weaghuumeeda.

⁵ Mwadoabiiwa gideaba giiduuksi geaw siida muy, ak ea miidawi gitoobiiwsa siida doabiiwaat.

⁶ Ng'asheega siida dasha inyeesa gweadu jaliida, gilinyoo gwarugu sean gooruuta ghoorjooda.

⁷ Ghuuta siida dasha gaygabeagu niny nea gabwageaw, ghuutaanyi ghuduumbwaada jea ghaghasa geaw gil nea gabwageaw.

⁸ Ng'asheega siida aga badahuuka buuneeda gawuurji hamita inya, iissa ghwararang'aada ea gawa jih.

⁹ Siida ghaleehooda aba gadiyeadaanyi orjeeda gheamata siida muy.

¹⁰ Gheawunga NG'UTAMIIDA hilgweanda majeek gil, siida doabiiwaat iifachsa gaygaba seayu.

¹¹ Meanang'oocheanda ghaghay gideaba meanang'oocheanduumeadaanyi mujiineeda majeek gil, ak gawuurji ghamarda geaw jea ghaweat niny.

¹² Ghwarjeeda guroorooda gaygweadu nyariida, nea eateaba geaw bea ng'eanyi gaygweadu mureeda.

¹³ Siida inyeesa ghwasha ng'asheanda nea miigooleeysiit, leendeeda gil ak ea baspaseega gil aba headaanyi.

¹⁴ Guroorooda siida gayghoamu ghamilikghta sawanadeadaanyi, ak guroorooda ninyar gayghoamu ng'eaha ghwanung' ghamilikghta?

¹⁵ Siida mideawa fughareeda gaygagakiisa geaw fughareeda, nea iita siida mideawa weaghuumeeda gaygagasa fughareeda.

¹⁶ Haleanjeeda hayapta bea siida gaygwanyaksa gheata, ak gaygweadu niny madeeda fuga hees.

¹⁷ Siida ang'eat ghuuta baloolda girgweageadaanyi iising'ula ea doabiiwaat, bwak ea ghapka fuga suurja gwasikteawa niny.

¹⁸ Loota gayghwanung' ghwasiinda sheang'nyeeda, ak gaygooheeli girgweageeda fuga hees sheang'nyi.

¹⁹ Orjeeda giyeang'wa iinyareas aahang'waay ea ghang'al ghamarda mujiini, ak jaliida gawuurji gharinga sirata hilgweanda.

²⁰ Siida gaygoolang'u ng'asheega ghuutaanyi, ak gaygwalang'u aba haghweega ghuutaanyi.

²¹ Miyeeda ea eaweega gwanda uurda ng'ushapta, ak fuga gasa gayghwaak haghweagaaschi.

²² Siida nyas gatmooda ghwanyas gidamiy, ak ghwanyas alooheeda leabu heeda NG'UTAMIIDA.

²³ Siida bwarbwar iissa gamus nea ghwaat geaw ng'eanyi, ak meanang'oocheanda ghwasha aba nyarasta.

²⁴ Fuga siduupchi saang'a gayghabwaay siida, ak gwanda fuga siduupchi doobiiweadi ea ghang'al orjeeda giyeang'wa.