GHWASIILDEANGA 17 - Bibliyeeda Ghaydit

¹ Ghang'wana hamita siliga nea geebaseayu, mwasamwa gheeda mida ghweelmeeda ea jaliida.

² Soomjeanda mideawa weaghuumeeda gayghoang'waay hoorgeeda orjeeda dasha, ak gajeataw hearaniischooda baleandeaba gheedida.

³ Alooheeda dahaabu ghana lapiya geeteena beasta, ak gurooruunatka buuneeda goodeeni NG'UTAMIIDA.

⁴ Siida sina ng'asheega munyas iissa gooleeysiit ng'asheega munyas, siida ng'uyeega iissa gooleeysiit ng'ushapta reengaweega.

⁵ Siida machiida siida bwarbwar goong'eawi ASEATAANYI, nea dea hoosana aba badayda miyeeda ea mayghwashiy gajeergweaksa.

⁶ Gweargwa ghaghwar geat aba badayda diibiga nyaawa, nea orjooga ghaghwar geat aba badayda ghweaniga nyaawa.

⁷ Ng'asheega miyaasiin maygwarina ghuuta siida dasha, asi abeeda gaygawuurjiin ng'asheega aba badayda fuga hees.

⁸ Aba siida adayiida seawshooda, seawshooda gawuurji lagheaneeda meajooda, gilinyoo gwasin ghwanyagaada.

⁹ Siida bwayda giidiinyeanda gwasin duupcheeda, nea dea apkeasa giidiinyeanda ghwasach duupcheeda.

¹⁰ Reekusiinda ghang'wana aba heeda siida mideawa fughareeda, mwasamwa bayi bughala aba heeda siida bearji leendeeda.

¹¹ Siida muy seara inyeesa ea magasa ng'asheanda geaghus ng'atooda, asi gajeecheaksa giijasoocheanda ng'waan headaanyi.

¹² Ghang'wana siida gwaroonyi idamooda siireat diibigaaschi, mwasamwa gwaroonyi siitasha aba jeeda leendeadaanyi.

¹³ Siida walu gea munyas nea gwachi gammiisa gawalu gea miyaas, asi ng'asheega munyas maygoosiipteawa gheanyi.

¹⁴ Giing'eeta jaliida gawuurji siida sin seawadeeda aba dabascheanda beega, asi anung'waada jaliida heeda mii gaguldeawa.

¹⁵ Samsiinda siida mideawa giidiinyeanda, ak geergweaksa siida mandeawana giidiinyeanda, ng'asheesu asiyeenyean sicheeda gil aba heeda NG'UTAMIIDA.

¹⁶ Gaygaba naaha lapiyeeda siida dasha jea gwandeawa aba geatingaaschi ak ghwashaaha weaghuumeeda nea niny ea mandeawana fughareeda?

¹⁷ Siida siduupchi bea huumwa gaygwandeawa bariinyeega galeagasean, ak orjeeda ghaamwat geeji aba gideaba gayghaweat fih damanda sawanadeeda.

¹⁸ Mii ng'asheanda fughareeda gil gideaba giyiini raduutka ak gimiinaadawi weada sih nuut.

¹⁹ Siida bwariiy jaliida, ghabwariiy riing'eeda, nea dea adiing'u geaw gagakiisa geaw lasooda uhuuda.

²⁰ Siida was roodaneeda mayghwanyagaada, nea dea ruku ng'uyeega gayghoabita jeeda miyeeda.

²¹ Jeepta dasha gayghang'uda ghwaan gurmeahiida, nea ghweanda baleanda dasha ea maygahoosan.

²² Guroorooda mideawa hooseaneega meajooda huumwa gil, nea guroorooda mideawa gurmeahiida gayghwanung' goosha uurda saseeda.

²³ Siida muy seara iissa gwaseawshi aba makcheameeda, aba gideaba gayghwanung' ghwaschoarda naweeda doabiiwaat.

²⁴ Siida mideawa fughareeda iissa goofuursa jeadaanyi weaghuumeeda, nea dea bearji leendeeda iissa goobissa giliwas sean bea badayda ng'eanyiida.

²⁵ Jeepta dasha gayghang'uda ghwaan gurmeahiida, nea ghwanyas ghaamwat sawanadeeda.

²⁶ Mwahida gideaba gajeayaaga ghoorjooda siida mandeawana giidiinyeanda, nea mwadoabiiwa gideaba gajeabwar fuga hees aba doobiiwnata nyaawa.

²⁷ Siida mii haw balool gwandeawa fughareeda, nea siida mii saang'a ng'asha gwandeawa fughareeda.

²⁸ Eara siida dasha iisiinda geadaah gideaba ea weaghoot, ama iirat ghuutaanyi geadaah gideaba gwandeawa fughareeda.