GHWASIILDEANGA 16 - Bibliyeeda Ghaydit

¹ Siida inyeesa ghwadawdaaw ng'asheagaaschi, nea ng'asheanda huuydean gaba NG'UTAMIIDA.

² Naweadinga sean bea siida aamiy aba madeadaanyi nea gabwageaw, nea NG'UTAMIIDA ghwanal gidamida jeesinga buuneeda.

³ Iina gadiyoojigaagu geatinga NG'UTAMIIDA, ak gaynyagaada aba gida igasayi.

⁴ NG'UTAMIIDA gwasin haleanjeeda sean aba gidabaysiinda niny, ak gwasin eara fuga munyas aba eaweeda sawanadeeda.

⁵ Siida wassean bea ghwarjeeda ghwasit NG'UTAMIIDA; aba huumwa ea mayghwashiy gajeergweaksa.

⁶ Riing'eeda gajeehuun aba baydeayda huumwa, Siida iyawal gheang'da NG'UTAMIIDA gayghwasaja geaw munyinda.

⁷ Naweadinga siida iyahoosan NG'UTAMIIDA gayghwanung' gwaduupchi weajoodiga sean niny.

⁸ Ghang'wana haleanjeeda ng'ay bea doobiiwnata, mwasamwa haleanjeeda saang'a bea naweeda muy.

⁹ Siida inyeesa ghwadaawdaaw ng'asheagaaschi, ak heechea ghoala sean gayghoadoabiiw NG'UTAMIIDA.

¹⁰ Sugoocheanda ghwalach girgweageeda aba gidarukusiinda ASEETA, nea iilach girgweageeda ea mayghwaramwas.

¹¹ NG'UTAMIIDA gagasa gisiiteeniida doabiiwaat, lagheanga sean bea jeeda shageeda siiteeniida gadiyeadaanyi gil.

¹² Eamuy gideaba sugoodiga gwasin ng'asheega munyas, aba gideaba gheambalmeeda nyaawa sinooda doobiiwnata gil.

¹³ Sugoocheanda ghabwariiy siida balool aba doobiiwnata, ak ghabwariiy siida ruku huumeanda.

¹⁴ Nyarasta sugoocheanda giijasoocheanda miyeeda, nea siida mideawa weaghuumeeda gayghwanung' ghahawda.

¹⁵ Gheamamda sugoocheanda iiweeshiit abeeda gwanda eaweega, alooheadaanyi gawuurji shamooghooda muweeda.

¹⁶ Nyasooda weaghuumeeda ghang'wana mwasamwa dahaabu, siida loat fughareeda ghang'wana mwasamwa lapiya.

¹⁷ Naweeda bareanda bea siida doabiiwaat gamuliisa ng'asheega munyas, Nea dea ang'waay naweadaanyi gayghaghamwat eaweagaaschi.

¹⁸ Ghwarjeeda gaygoosheeda lasooda uhuuda, ak weashweashta goosheeda giibeedeayda.

¹⁹ Ghang'wana eatoodeaba geaw ng'eanyi, ea barbaranda, mwasamwa gideaba gajeelaja easanga sea fuga ghwarjeeda.

²⁰ Siida ang'waay giinealshooda gayghwanyagaada, ak ghang'wana gili nyooh ghaghus NG'UTAMIIDA.

²¹ Siida mideawa weaghuumeeda guroorooda gajeeguura siida mideawa fughareeda, nea ng'asheega miyaasiin gaygaksu buuneeda.

²² Weaghuumeeda gheang'deenda eaweega gil aba siida mideawa, nea leendeeda ea ghoorjooda fuga dasheahi.

²³ Guroorooda weaghoocheanda gayghwanung' gabalool aba weaghuumeeda, ak ng'asheagaaschi gaygaksu buuneeda.

²⁴ Ng'asheega miyaasiin gawuurji maleeda, aainya aba guroorooda, ak gaygoomajeek saseeda.

²⁵ Siida gwadeepa ghwadaah gideaba naweadaanyi ghwadoabiiw, ak huuydeanda gaygoogeal jeeda miyeeda.

²⁶ Jalooda siida iissa ghwanung' gagadiiy siida muuchi, aba gideaba gagasa goosha jaloadaanyi.

²⁷ Siida muy seara ghamwaal ng'asheega munyas, nea ng'asheagaaschi inyeesa gawuurji beasta ng'waan.

²⁸ Siida was roodaneeda iissa gooheedu jaliida, nea siida ang'uutooschi buuneeda iissa gooheeli fuga duupchi.

²⁹ Siida ng'ooweata iissa ghwasasat giischeewoocheandaanyi, ak goodoobiiwsa naweeda mii miy.

³⁰ Siida nuukusa ghaang' siida, ghamwaal ng'asheega munyas, nea dea iissa ghaghanya ghuut nimanya gwasin gea munyas.

³¹ Uhuuda mideawa ghearashka shiipcheanda giigheambiita gil, iimida jeeda naweeda doobiiwnata.

³² Siida mii asas nyaras ghang'wana, mwasamwa dea mideawa uurda, dea abal saseadaanyi ghang'wana mwasamwa dea geanda easanga mujiini.

³³ Loota inyeesa ea meanala gichea gwardu, nea ng'asheanda huuydean bwaasean gaba NG'UTAMIIDA.