GHWASIILDEANGA 12 - Bibliyeeda Ghaydit

¹ Gilinyoo ghabwariiy mureeda, ghabwariiy fughareeda, nea dea sit gideaba gajeeyeata ghuut, abeeda aadasha.

² Siida miy gayghoah badaneeda aba heeda NG'UTAMIIDA, nea siida muy gajeergweaksa.

³ Siida maygamajeegiit aba sinooda ng'asheega munyas, nea manda gichea gageanda siida doabiiwaat.

⁴ Gatmooda miy shiipka gil aba heeda siyeadaanyi, nea dea abwaaspwaas siyeadaanyi gawuurji deaneadeeda aba geapkeadaanyi.

⁵ Ng'asheega siida doabiiwaat ea doobiiweadi, nea ng'asheega siida muy ea ng'uyeega gil.

⁶ Ng'asheega fuga munyas saawa ghoahiida foojeanda, nea ng'asheega fuga doobiiweadi, gayghoaghu buuneeda.

⁷ Fuga munyas gajealas uhuuda ea mutugwanda, nea gheeda siida doabiiwaat gayghamiinaada.

⁸ Siida gajeegwarsa aba giteena fughareadaanyi, nea siida mideawa hang'ooynata uhuuda gajeefool.

⁹ Ghang'wana siida sifool nea gwandeawa soomjeanda, Mwasamwa dea ghwargeaw nea gagasa gichea ghwaak.

¹⁰ Siida doabiiwaat gooteemsheesa eaweega deadaanyi, nea baydeayda siida muy ea munyinda.

¹¹ Siida bwar madamnyeandaanyi gwandeawa hamita haw, nea dea aat geeshta ng'asheega mwadoabiiwa ea mandeawana fughareeda.

¹² Fuga munyas gagasa nyageadayda mwahida, nea siida doabiiwaat gayghamiinaada nea majeek.

¹³ Siida muy gayghaghas ng'uyeagaaschi nea gabwageaw, nea siida doabiiwaat gaygwariteawa jeeda sawanadeeda.

¹⁴ Siida gaygoolang'uut gea miyaasiin aba haghweega ghuutaanyi, ak siida gayghwanyas sinaweega gadiyeeda geatindaanyi.

¹⁵ Naweeda siida dasha ghwadoabiiw aba madeadaanyi nea gabwageaw, nea siida mideawa weaghuumeeda gaygooleeysiit girgweaksiinda.

¹⁶ Nyarasta siida dasha ghwadaajiit aba geeshangiga, nea siida mideawa fughareeda gayghafuy baspaseega.

¹⁷ Siida ruku huumeanda gaygamuuwu huumeanda, nea dea muuwu ng'uyeega, gaygwargu ng'uyeega.

¹⁸ Ng'asheega munyas gayghang'uta siida gawuurji ng'uta, nea gea ng'ushapta siida mideawa weaghuumeeda gayghoahaap.

¹⁹ Huumeanda gaygoobiida damanda manda muudeanooda, nea ng'uyeega gaba gheadi nuwaas.

²⁰ Agita gheanyanga buuneeda gwanda jeeda gurooruunatka fuga ateemsheesa gea munyas, nea gea manya gwasin gea miyaasiin gaygahoosan.

²¹ Siida doabiiwaat mayghwanyas sawanadeeda was sean, nea fuga mwadoabiiwa gayghwanyas ng'asheega saang'a munyas.

²² Siida ruku ng'asheega ng'uyeega gayghoanyareas NG'UTAMIIDA, nea fuga sina ng'asheega doobiiweadi gaygoohoosan niny.

²³ Siida mideawa weaghuumeeda gayghafuy fughareadaanyi, nea guroorooda fuga dasheahi gwarukwiida leendeeda.

²⁴ Siida gadiiy muuchi gayghwanyas hawunda, nea siida ghaleehooda gayghoah soomjeanda.

²⁵ Hirbabandeeda aba jeesiida gaygageanda hooseaneega, nea ng'asheanda miy gaygoohoosan.

²⁶ Siida doabiiwaat gaygamulsa ng'asheega munyas, nea naweeda fuga munyas gaygahuteawi.

²⁷ Shageadoocheanda ghaleehooda mayghwanyas gil, nea dea milmili gayghwanyagaada.

²⁸ Doobiiwnata naweeda eaweega gil, ak ea manda miyeeda aba naweadaanyi.