GHWASIILDEANGA 11 - Bibliyeeda Ghaydit

¹ NG'UTAMIIDA ghwasit gisiiteeniida bea reengaweega, nea giisiiteeniida hidaat gaygoohoosan.

² Iihidu ghwarjeeda gweadu geeshta baspaseega, nea weaghuumeeda gwanda heeda fuga doobiiweadi.

³ Fuga miyaasiin gayghoadoabiiw doobiiwnata nea hang'ooynata iheenga fuga ng'uda foolayda gayghwalas uhuuda.

⁴ Meanang'oocheanduumeeda mayghwaloat gil eaweeda nyarasta, nea doobiiwnata gayghoaghuuha siida miyeeda.

⁵ Doobiiwnata siida doabiiwaat gayghoadoabiiw naweadaanyi, nea siida muy gayghoabeada aba munyindaanyi.

⁶ Doobiiwnata fuga doobiiweadi gayghaweat saawa, nea fuga ng'uda foolayda gayghoang'waay ghuduumbwaada aba geawunyeeka gheanyaga nyaawa.

⁷ Siida muy ii meah eara gidaghayi rar goosha, eara gidarar siida moawala ASEETA gaygoosha.

⁸ Siida doabiiwaat gajeelealu aba jeeda sawanadeeda, ak hoorgeadaanyi gaygawa siida muy.

⁹ Siida mabata ASEETA gayghwalas uhuuda giischeewoocheandaanyi aba ghuutaanyi.

¹⁰ Iinyagaada fuga doobiiweadi gahoosan mujiini, ama silas uhuuda fuga munyas gahoosan buuneeda.

¹¹ Mujiini gajeakghaambiit aba ghawooda siitaw siida doabiiwaat, ak mujiini gajealas uhuuda aba ghuuta siida muy.

¹² Siida fool niirja mandeawana fughareeda, nea siida mideawa weaghuumeeda gayghwasiinda.

¹³ Siida aga badahuuka buuneeda moamu ghafuy makcheameeda, nea dea doabiiwaat gurooru gayghafuy makcheameeda.

¹⁴ Heeda manda siida mida madeeda buuneeda, gayghoabeada eemeeda, nea heeda mida gweargwa saang'a bea girgweageeda, gaygaba seayu.

¹⁵ Siida ak ghuuta rabascheanda gayghwadaah, nea siida sit agita ghuuta siida gaygaba seayu.

¹⁶ Gatmooda miy seara gajeataw mureeda, nea ng'eedeeda gadiiy muuchi gayghoah meanang'ocheanda.

¹⁷ Siida mideawa baydeayda gwasissa saseadaanyi gea miyaas, nea siida ng'waan gwasawan geaw.

¹⁸ Siida muy gayghwanyas mushahareeda ng'uyeega, nea dea sin ng'asheega miyaasiin gayghwanyas nyageadayda huumwa.

¹⁹ Siida sin doobiiwnata gayghwanyas giibinda, nea dea loat sinooda ng'asheega munyas gayghami.

²⁰ Fuga sina ng'asheega munyas, sicheeda gil aba heeda NG'UTAMIIDA, nea fuga miyaasiin searooji gayghwanung' gahoosan.

²¹ Aba huumwa siida muy maygamulsa girgweaksiinda, nea gea doobiiweadi gayghaghu.

²² Gatmooda miy mandeawana fughareeda gawuurji ghuniida dahaabu mida sareeda ukurmeeda.

²³ Gidagasa fuga doobiiweadi gaygooruudu gea miyaas, nea geawunda gheanyanga fuga munyas gaygooshealsa jeeda girgweaksiinda.

²⁴ Siida inya jih gayghoahaada haleanjeadaanyi, nea dea ng'waan jih gayghwanyas barbaranda muuchi.

²⁵ Siida inya jih gayghwanyagaada, nea dea adaw beega leeyda niirja, eara niny gajeataw.

²⁶ Siida fuy booga gayghamwaashta buuneeda, nea siida shaayda gayghwanyas ghawooda.

²⁷ Siida gasa sinooda ng'asheega miyaas, gayghwanyas alooheeda, nea dea gasa sinooda ng'asheega munyas, gayghwanyas ng'asheega munyas.

²⁸ Siida ghus meanang'oocheanduumeadaanyi gayghoabeada, nea siida doabiiwaat gayghwanyagaada gawuurji nyeeshtooda nyawiish.

²⁹ Siida datas fugeaba gheanyi aba huuydeanda gaygwahearan jeameeda, siitasha gayghoah soomjeanda fuga mideawa weaghuumeeda.

³⁰ Haghweega siida doabiiwaat geeta eaweega gil, nea siida mideawa weaghuumeeda gaygaksu gurooruunatka buuneeda.

³¹ Heapi, siida doabiiwaat inyas giimeardaanyi aba badayda ng'eanyiida, Abeeda gaygawuurjiin aba heeda siida muy ea dea riing'eeda.