GHWASIILDEANGA 1 - Bibliyeeda Ghaydit

Giimajeekta ghwasiildeanga

¹ Ghwasiildeanga Sulemani, orjeeda Dawdi was sugoocheanda Israeli.

² Ghwasiildeang'su gayghoadaw buuneeda weaghuumeeda, ea mureeda, ak gayghwanung' ghwanal buuneeda ng'asheega weaghuumeeda.

³ Nea ghwanal sinaweega weaghuumeeda, aba doobiiwnata ea girgweageeda doabiiwaat.

⁴ Ak fuga dasheahi gayghwanyas fughareeda nea gheareemaneeda ghwanyas fughareeda ea gichea ghabeada.

⁵ Ak siida mideawa weaghuumeeda dayiinya, ak geeheasa fughareeda, nea siida nal ng'asheega dahita heeda girgweaksiinda jea ghwanyasa fughareeda

⁶ Nalooda ghwasiildeanga, ea daanghwaaja, ea ng'asheega fuga weaghoodi ea giiweaghanda nyaawa.

Girgweaksiinda gheareemanga

⁷ Gheawalmeeda NG'UTAMIIDA heeda ng'eada fughareeda gil, ak fuga dasheahi gafool weaghuumeeda ea mureeda.

⁸ Orjeedeanyu aleeysiiniit gichea ghoanaalnyi gweanu, nea adinung'waadi giinealshooda geamadu;

⁹ aba gideaba suh gayghoah shiipka dagheerjeanduumeeda aba uhuudaang'u, ea surumga aba gheataang'u.

¹⁰ Orjeedeanyu, iighurghurnyi fuga riing'eega ea adumwasi.

¹¹ Inyeesa geeyi “Beeni heedeanya, eegwalgwaleesiina ak geehiidi foojeanda, beeni eeng'eesiina gea mandeawana giidiinyeanda.

¹² Gajeanukghta nea gudea majeekcheewi, gawuurji gheeda maloonghajeega; ak gawuurji fugiga abiita jeeda shoomandean.

¹³ Gajeanyasa haleanjeeda sean haw sheayeat, ak gajeanyiida jeeda ghoorajeagaasa easanga.

¹⁴ Ang'iing'i ea aseasa gajeebareanyeena ak haleanjeedeanya sean gajeelacha”–

¹⁵ Orjeedeanyu adiideayeewi saawa aba naweeda, ak giideali geashtaang'u adagagal naweeda aat saawa.

¹⁶ Aba gideaba geeshanga nyaawa gwasalsa jeeda ng'asheega munyas. Ak gwalamajeesa giihiideayda foojeanda

¹⁷ Aba gideaba ghuduumbwaada geaghasta mwadaagha. Aba madeeda gilinyoo ea dariideanda gil.

¹⁸ Saawa inyeesa ghwaradaan, ak ghwalas uhuudeaba geat. Inyeesa ghaghasta ghuduumbwaada iidu jea ghoang'waay saawa.

¹⁹ Nih giduurji naweadinga fuga sean gaseadayi baruureega gil. Inyeesa gageanda eaweega fuga mideawa haleanjeeda.

Weaghuumeeda gaguuru

²⁰ Weaghuumeeda goojuur aba ghuuta naweeda bareanda, ak goojuur aba jeeda naadajeega.

²¹ Ak gooyeawda aba heeda fuga saang'a bwatgeat. Was ghuusiga dooshinga, ak gwarugu iitaanyi, aba jeeda mujiini.

²² “Ea fuga dasheahi, gajabwariinya leendeeda ea ghoah eeju? Nea fuga foola fih ghabwariiy foolda nyaawa; Nea fuga mideawa leendeeda, ghwasit nalooda haleanjeeda?

²³ Ayamwa geat aba gida aamiindi gheang'deang'wa. Ang'ula gaydagooneegwa gurooroodeanyu, ak abeeda gajanala ng'asheegeasu.

²⁴ Aba gideaba geaguurneegwa ak ghoaheawi. Ghaamiindi geatindeanyu ak ea manda siida daah.

²⁵ Ak ghoayamnyi ng'asheegeasu nea moogasi dareekuseegwa.

²⁶ Nea aniini gaydaak reari aba miyeedeang'wa. Gaydamachiida muuwdeang'wa iihidu.

²⁷ Inyeesa ghang'udeegwa muuwda wunda shaarara, ak ghwahidu habitkweeda nea gawuurji shaarara, ak ghwahidu sawanaduutka ea ghabasta.

²⁸ Hean gajeeguurnean ak ea maydanyeara ak gaygagasean muuchi ak ea mayghwanyasan.

²⁹ Aba gideaba ghwasit fughareeda, ak ea mealooda gheawalmeeda NG'UTAMIIDA.

³⁰ Ak ea meamwasa ng'asheegeasu nea geefool miinda gheanyanga nyaawa.

³¹ Asi saawa gayghwaak haghweega naweadinga nyaawa, ak gaygoolang'uut ng'asheega nyaawa nea gabwageat.

³² Aba gideaba fuga dasheahi gaygameewa aba nyoota fughareeda, ak gidamwasta leekghteega leendeeda nyaawa ea gichea ghwalas iheenga nyaawa gil;

³³ Ak siida was sean jea gooleeysean iit gaygoopteada nea gabaseayu, ak gaygoopteada nea moawala ng'asheega munyas.”