Galattiya 1 - Bibliyeeda Ghaydit

¹ Bawlo giijasoocheanda, nea maleapna heeda buuneeda ghana gwasku naweeda siida, gwasku heeda Yesu Gristo ea heeda ASEETA was Ghweanda, ak gooduuna niny jeeda miyeeda–

² ea orjooga giyeanya sean eandeawi, aba heeda ganiisajeega mida Galatiya:

³ Gagasa anyasa dagheerjeanduumeeda ea hoyyooyda leabu heeda ASEETA was Bwaabwa ea Ng'utamiideanya was Yesu Gristo,

⁴ nea gabeagu geaw aba riing'eegaasa ak gwalealnaneasa aba jeeda seaygeani bea ghamneawa munyasiin, gawuurji gidagasiida ASEETA was Ghweanda;

⁵ niny gwandeawa giigheambiita ea ghoah damanda manda muudeanooda. Amin.

Giijasta miy asagi

⁶ Aniini nihamwan ng'eanyi aba gidoobay anung'usiinda heeda dea ghayi guurneegwa aba jeeda dagheerjeanduumeeda Gristo ak gooyamsi geat giijasta miy nuut–

⁷ mii gideaba gwanda giijasta miy nuut gil, iidu gwanda fuga mwaatkwa adeawiideegwa nea gagasa ghoaschoarda giijasta miy bea Gristo.

⁸ Duuku aseasa ghana malaykajeanda humng'eeda, iirukuneegwa giijasta wassean mawoosa dea ghayi sirukuneegwa, gagasa eamwaashta.

⁹ Gawuurji gidagwachi sibean eerukuna, ak eara ghamneawa geerugu gicha, gideaba siida wassean iirukuneegwa giijasta mawoosa dea ghayi oadeapti, gagasa eamwaashta.

¹⁰ Neada ghoaghanyi gili eagasayi dashiit buuneeda, ghana ASEETA? Ghana eagasayi deahoosan buuneeda? Asi iidu deahoosani buuneeda, ea maydoaw soomjeanda Gristo.

Gidaghayi huuwda Bawlo Giijasoocheanda

¹¹ Orjoogiyya geagasayi gideaba gajanala gideaba giijasta miy ghayi earukwiidi maleapna heeda buuneeda.

¹² Aba gideaba mwaanyasani hichpa sih, ak ea moanaalaan sih, gwaleabu naweeda giidaheachta Yesu Gristo.

¹³ Agooga noayiinyi iita ghayi bea giibindeanyu aba jeeda diineeda fuga Yahudi gideaba geasawanyi muuchi fuga Ganiiseeda ASEETA nea geagasayi dalas uhuuda;

¹⁴ ak geandi mwadi aba ng'asheega diineeda Yahudi ea daadaraam fuga seaygeedeanyu aba jeeda buuneedeanyu, ak geabiisi dawoos ng'waan aba searoojiga ghweanigaasa.

¹⁵ Hean iidu nea niloadaan ASEETA nea miyeejiilan, ak gaguurnean aba dagheerjeanduumeadaanyi,

¹⁶ ak geanung' ghoahiimnaan Orjeedaanyi, ak abeeda geerukwiidi aniini iitaanyi aba jeeda Eemoojiga, aniini mwaawunani saseeda ea foojeanda,

¹⁷ ghana dascheang'da dawa Yerusalemu heeda orjooga asheedeawean ghoah giijasoodiga, aniini geawi ng'eanyiida Arabiya; ak geabiigu Dameski.

¹⁸ Ng'ata gweanyeew samwagu, geawi Yerusalemu dabareesa Gefa, ak geabiidi gheanyi eawooji damanamuut.

¹⁹ Ak ea manda giijasoocheanji naadaayi nuut geaghus Yakobo orjeeda gheamata Ng'utamiida.

²⁰ (Nea ng'asheega eang'oorneegwa, aba madeeda ASEETA mii ng'uyyeega gil!)

²¹ Iidu geawi meatkwajeega ng'eanyiida Shaamu ea Gilikiya.

²² Nea abeeda ea mii ghwadaahan aba gheanyanga fuga Ganiisajeega Gristo mida Yudeya;

²³ Gabeachi gideaba ghwayiiy iita gideaba, “Siida ghayi sawaneasa ghamneawa gwarukwiida giijasta miy bea masaweegiga ghayi gasa ghwalas uhuudean.”

²⁴ Hean geekghaambiit ASEETA aba badaydeanyu.