Filippi 1 - Bibliyeeda Ghaydit

¹ Bawlo ea Dimoteo, was soomjooga Gristo Yesu, heeda fuga ghaydidi sean mida naweeda Gristo Yesu, mida ng'eanyiida Filipi, sea jeagiischoodiga Ganiisa sea weedanga Ganiisa.

² Gagasa anyasa dagheerjeanduumeeda ea hoyyooyda leabu heeda ASEETA was Ghweandeanya ea heeda Ng'utamiida was Yesu Gristo.

Bawlo ghamwaash ASEETA aba badahuuka fugaaschi asoamwa

³ Aniini inyeessa geabadiischeesi ASEETEANYU iyaapkaacheegwa,

⁴ inyeessa galeagasean iyaamwaashchi ASEETA, hean ghaamwaashchi aba badahuukeagwa aba hooseaneega,

⁵ geabadiischooweegwa aba guuyeedeang'wa aba giijasta miy siguuyeesi ghang'eada mwadi ea ghoah ghamneawa.

⁶ Ak geasikteawi siidida ang'eat gadiyeeda miy aba jeedeang'wean gayghoahiit aba eaweeda Yesu Gristo.

⁷ Asi ghwadoabiiw aba heedeanyu gideaba gaydaahiit suh aba badahuukeagwa oogasean, aba gideaba neang'ooyseegwa jeedeanyu, aba gideaba goowooschi oogasean fuga eaweecheewi aba dagheerjeanduumeeda, aba jeeda ghealoonigeasu ea aba furooda aba giimajeekta giijasta miy.

⁸ Aba gideaba ASEETA muushoocheandeanyu gil, aba gida eagasiidi deateang'wa oogasean, aba bariinyeega leabu heeda Gristo Yesuun.

⁹ Nea nih ea mooshteanyu bea ASEETA gil, gideaba gwaheedu bariinyeegeagwa muuchi aba fughareeda haleanjeeda ea weaghuumeeda sean,

¹⁰ hean abeeda goosikteawi gida hidaat, ak ghamiidu nea meerukunana badayda ng'asheega munyas aba eaweeda Gristo,

¹¹ nea siinyiideagwa haghweega doobiiwnata leabu naweeda Yesu Gristo, aba giigheambiita nea geeduumsheesa ASEETA.

Giibinda Gristohi

¹² Asi orjoogiyya geagasayi anala gideaba sawanaduutka sean ghayi aanyaschi, iidu ghwanung' gawa giijasta miy mwadi,

¹³ ak ghamneawa ea sinali aba heeda furiischoodiga sean ea heeda buuneesean gideaba ghealoonigeasu gaba badayda Gristo;

¹⁴ nea orjooga saang'a bea giyeanya ea sinung' ghamwas Ng'utamiida aba ghealoonigeasu, ak ea ninyas muraneanduumeeda muuchi ak gwarukwiida ng'asheanda ASEETA nea mabeala.

¹⁵ Aba huumwa gwanda fuga inyeessa gwarukwiida iita Gristo aba lajoodeaba ghuut ea foolayda, nea suuk geerukwiida aba gidamiy sigasa.

¹⁶ Iidu gwarukwiida aba bariinyeega, nea ghoanali gideaba aniini geayiinan hiji daweat giijasta miy;

¹⁷ nea fuga madeeda gwarukwiida iita Gristo nea meamajeega, nea marukuta aba jeeda eesh, nea ghaghay gideaba gayghoahaat sawanadeedeanyu aba ghealoonigeasu.

¹⁸ Ak ea naaha? Aba giliwas nawa, ea gaba ng'uyeega, ghanea aba huumwa, Gristo geerukwiida; ak geahoosanyi aba badaydeaba ng'asheanji.

¹⁹ Ea, gaydahoosan. Aba gideaba ghaanali aba jeeda mooshteang'wa bea ASEETA nea ghaweadeagwa Guroorooda Yesu Gristo ng'asheesu gayghwayamwa iisiitaydanaan,

²⁰ ak ea gidaararji gil gideaba ghaaghuschi muuchi ak ea maydabwaspwas earahay, ak geawooschi majeek gawuurji gideaba eawoojisu ak ghamneawa gwasunu Gristo gajeesissa mureeda aba badaydeanyu, iinaameayi ghana iiduudanda.

²¹ Aba heedeanyu giibinda Gristohi, nea miyeeda ea nyasooda.

²² Nea iimida eaweega jeeda saseeda, abeeda aba heedeanyu ea haghweega gadiyeeda gil. Nea gidida jea daloadiin ea mwaanali.

²³ Geaminighisan aba dageascheemba ng'asha iyeenya. Geagasayi dawa dandeayi sea Gristo, aba gideaba gidang'wana gil.

²⁴ Amadu aamiy muuchi iyeabiidi aba saseeda aba badahuukeagwa.

²⁵ Iyaaghuschi suh, ghaanali gideaba gaydashng'u sea agooga oogasean, nea gooweayi mwadi nea goohoosanyi aba masaweega,

²⁶ nea aba jeedeanyu gajanyasa giigheambiita haw aba jeeda Gristo Yesu, aba hinnoodeanyu bea heedeang'wa gicha.

²⁷ Anung' ghoah searoojigeagwa bea eaweega gweateayi sea giijasta miy bea Gristo, ama iyaawunyi dadaheagwa ak ghaadaayeagwa ghana ea meandani, geagasayi dayiiy aba badahuukeagwa gideaba ghoamiinaadi muuchi aba jeemba gurooroanagi, nea goobeayi fughareanagi nea goong'alealeesi masaweega giijasta miy,

²⁸ Nea moawali weajoodigeagwa aba ng'asheanda wassean. Aba gideaba aba heanyaawa suh gwadeagooda majeek bea nyariida, nea aba heedeang'wa ea gwadeagooda lealeanoodeang'wa, ea gideaba gwaleabu heeda ASEETA.

²⁹ Aba gideaba agooga geegooneegwa gheata aba badayda Gristo jea agadiyeesiina, ea mabeachi masaweega gwanda eara gideaba gajeesawaneegwa aba badaydaanyi,

³⁰ ak goondeawi ng'ucheeda ghayi oodeaksi heedeanyuun, ak gooyiing'si heedeanyu gideaba geandeawi eara ghamneawean ghoadaayi gideaba gutanda jeeda.