Filimoon 1 - Bibliyeeda Ghaydit

¹ Bawlo siida ghealooniga aba badayda Gristo Yesu, ea Dimoteo orjeeda giyeanya, heeda Filimoniheeda was siideanya sibwariinyi siweecheewi aba gadiyeeda

² ea Afiyayda was huda giyeanya, ea heeda Arkipa was shirikarajeanda Gristo siweecheewi bea ganiiseeda mida jeedeaba gheang'u:

³ Gagasa anyasa dagheerjeanduumeeda ea hoyyoo leabu heeda ASEETA was ghweandeanya ea heeda Ng'utamiida was Yesu Gristo.

Bariinyeega ea Masaweega Filimoni

⁴ Geabadiischeesi ASEETEANYU galeagasean iyaapkaacheey nea ghaamwaashchi ASEETA,

⁵ aba gideaba naayiinyi bariinyeagaagu ea masaweega indeawi aba badayda Ng'utamiida was Yesu ea heeda fuga ghaydidi sean,

⁶ ak ghaamwaashchi ASEETA aba masaweagaagu siguuyeesi nyagu fughareeda miy bea haleanjeeda sean ikaasa aba jeeda Gristo.

⁷ Aba gideaba naanyaschi hooseaneega muuchi ea hawdeayda aba bariinyeagaagu orjeediyya, aba gideaba gurooruunatka fuga ghaydidi nihawda aba badaydaang'u.

Musiischooda aba badayda Onesmo

⁸ Aba gideaba earapeadi eawooschi muraneeda hidaat aba naweeda Gristo ak geerukuneey sina gidasigasa,

⁹ iidu aba badayda bariinyeega geamuscheey gideaba, aniini Bawlo, was siida siicheagu ak ghamneawa geawooschi siida ghealooniga aba badayda Gristo Yesu–

¹⁰ Geamuscheey aba badayda jeepteanyu was Onesmo, nea naahuuyi ghwaan aba damanda eandeewi ghealooniga,

¹¹ (Ghayi niny mwaloada gil aba headaanyi, ak ghamneawa gwalooseey gil agooga ea aniini).

¹² Geajeagu gabiigu headaang'u, aba gideaba niny gurooroodeanyu.

¹³ Gaydahoosan aniini iyabiida heedeanyu ak ghaweadan aba meatkweedeang'wa damani eandeawi ghealooniga aba badayda giijasta miyiin,

¹⁴ ak geagasayi ea measini gil nea mimwasi ak abeeda ea meediing'seey alooheadaang'u geaghus aba gida igassiidi.

¹⁵ Nih ghaaghanyi ghoah gidasiheeleewaneey aba gheadi nuwaasiin, ak iidu goobiiksiinyi gicha ak goopiidi hijagi damanda manda muudeanooda,

¹⁶ niny mudu gawuurji giing'oonyaneeda, niny ning'al giing'oonyaneeda, niny gawuurji orjeediyya aabwariinyi, raanya aba heedeanyu ak gaygawuurjiin muuchi aba headaang'u, aba saseeda ea heeda Ng'utamiida.

¹⁷ Asi iyoonung' doaw siida ooguuyeewi, deaptaayda niny gida gwachi jea deaptaaydanaan aniini.

¹⁸ Ama iideepa ea niidiiyseey aba gida was sean, ghana gwandeawa siileadaang'u was sean, abeeda ging'oornean siileeni.

¹⁹ Aniini Bawlo aang'oarji ng'asheesu aba geatindeanyu, gaydawalu aniini, Mearukuni ak gindeawi siileedeanyu aba jeeda Gristo.

²⁰ Asaha, orjeediyya, sinnean ng'asheega miyaasiin ak ghaanyagaadi aba badayda Ng'utamiida, ak gihoosani guroroodeanyu aba naweeda Gristo.

²¹ Ghaamwaschi aba mureadaang'u, ak geang'oorneey ang'iing'i nea ghaanali gideaba gaysina ng'asheesu ea ghwanaawa gea earukuneey.

²² Asi aba damani, asina ghooriida rabasta jea deabiida, aba gideaba ghaararji aba mooshteang'wa bea ASEETA gajanyasaan.

Giighata huuydean

²³ Ghoaghanyi Epafraheeda eandeayeesi ghealooniga aba jeeda Gristo Yesu,

²⁴ ea Marko ea Aristarko ea Deema ea Luka was fuga easinuudayeewi gadiyeeda.

²⁵ Dagheerjeanduumeeda Ng'utamiida was Yesu Gristo gagasa goobiida jeeda gurooruunatkeagwa.