ESTA 9 - Bibliyeeda Ghaydit

Yahudi ghabwar weajoodiga nyaawa

¹ Iidu nea ghwahita sheedeaba damaniyeenya siguura Adara, nea eaweedeaba damasamwagu, nea ghwahita damanda gidaghayi rukuna sugoocheanda iita gideaba gajeabwar, abeeda damandida weajoodiga fuga Yahudi ghaghay gideaba gaygoombaliischi saawa, iidu ea niyamwa fuga Yahudi ak goombal weajoodiga nyaawa;

² ak ghabwatgeat fuga Israeli aba mujiinajeega nyaawa aba darooraka sean bea sugoocheanda was Ahasuero gideaba gayghwayiin geatinga nyaawa fugiga ghwanyawa gasa ghwanung' ghwaak saawa lugoodean, ak ea manda siida ammu ghoaghuum aba gideaba ning'ut buuneesean muuwda aba badahuuka nyaawa.

³ Fuga hees sean ambaliischi, bea darooraka, ea fuga hees ea sugoodiga hees ea fuga hees bea gheeda sugoocheanda eara ada ghaweat fuga Israeli, aba gideaba muuwda Mordekai niibisa badahuuka nyaawa.

⁴ Aba gideaba Mordekai aahaw aba gheeda sugoocheanda, ak eara aba gisam ea nidarsa darooraka sean; aba gideaba Mordekai gawa mwadi nea gwandeawa uurda haw.

⁵ Hean fuga Yahudi ghabwar weajoodiga nyaawa sean aba ng'uta, nea gwanuuseada, ea ghwanung' goosha ak gwasima gidagasa gwahinda weajoodiga nyaawa.

⁶ Aba ng'eanyiida Susa fuga Israeli ghabwar fih bughalaji muut ak ghwanung' goosha,

⁷ ak geabwar eara Barshadata, ea Dagoni ea Asbata

⁸ ea Borata, ea Adaliya, ea Aridata,

⁹ ea Barmashta, ea Arisai, ea Aridai ea Wayisata,

¹⁰ orju damanamughuush bea Hamani was orjeeda Hamedata, was weajoocheanda fuga Israeli ea mwasada haleanjeeda nyaawa.

¹¹ Ak iidu aba eaweedida geeyeassa sugoocheanda mooneeda fuga sibwar aba ng'eanyiida Susa.

¹² Ghwalamda sugoocheanda ak gwayeesha gatmooda sugoocheanda siguura Esta, “Fuga Yahudi ghabwar fih bughalaji muut aba ng'eanyiida Susa, eara orju damanamughuush bea Hamani. Abeeda gajea nihindaan gea mida jeeda darooraka suurja bea sugoocheanda! Ak ghamneawa ea gutmusa naaha? Ak gajeegoonyi, ak ghamneawa ea gutgassa naaha? Ak gajeegoonyi.”

¹³ Hean ghwalamda Esta ak gwayeesha, “Inyas ghwahit aba heeda sugoocheanda, abeeda fuga Israeli mida ng'eanyiida Susa gidabal geesiksa numuji earaga gwasinda gadiyeeda gideaba askwearjoojisu. Ak orjoosu atamanamughuush bea Hamaniin gajoarata aba uhuuda geeta.”

¹⁴ Ak gwarukuta sugoocheanda gideaba asindunu; hean geatayda iita aba ng'eanyiida Susa, ak gearata orjoogiga atamanamughuush bea Hamaniin.

¹⁵ Iimuchu ghabwatgeat gicha fuga Israeli mida ng'eanyiida Susa, eaweedeaba damanang'wan bea sheeda Adari ak geabwar fih bughalaji samwagu aba Susa; ak haleanjeeda nyaawa ea measada.

¹⁶ Nea fuga Israeli mwaatkwa mida darooraka sugoocheanda earaga ghabwatgeat ak gafur eaweega nyaawa, ak ghwanyas fuufta aba heeda weajoodiga nyaawa, ak ghabwar fih sagalamnyooji laadam ea damanamuut was gea sit saawa; ak haleanjeeda nyaawa ea measada.

¹⁷ Nih abeeda eaweedeaba damasamwagu gil bea sheeda was Adari, ak eaweedeaba damanang'wan geefuuf ak geesin ghweelmeeda nea geehoosan.

¹⁸ Nea fuga Israeli mida ng'eanyiida Susa ghabwatgeat eaweedeaba damasamwagu ea eaweedeaba damanang'wan ak geefuuf eaweedeaba damanamuut, ak eaweecheanji geesin ghweelmeeda nea geehoosan.

¹⁹ Asi fuga Yahudi bea jeeda gharang'weaka, abiita jeeda mujiinajeega manda museasooda, ghoang'waay eaweedeaba damanang'wan bea sheeda was Adara ghoah sheeda hooseaneega ea ghweelmeeda nea geesin ghoah eaweeda fuufta, nea geetawi geat haleanjeeda was hamita guskuseega.

Ghweelmeeda siguura Burimu

²⁰ Hean ghang'oar Mordekai ng'asheesu, ak ghoadaw barawajeanda fuga Israeli sean mida darooraka sean bea sugoocheanda was Ahasuero gea neeki ea gea sheagi,

²¹ gwarukusa gideaba ghoang'waay eaweedeaba damanang'wan bea sheeda siguura Adara, ea eaweedeaba damanamuut gilakweayda,

²² nea abeeda ea eawoojiga ghayi nyasa fuga Israeli fuufta gil, aba heeda weajoodiga nyaawa, nea sheeda siyamwa gurmeahiida nyaawa gil ghoah hooseaneega nea geayam shooka ghoah ghweelmeeda ak geanung' ghoah eawoojisu ghweelmeeda ea hooseaneega, nea geetawi geat haleanjeeda guskuseega nea geataw eara fuga barbari haleanjeeda guskuseega.

²³ Hean ghamwas fuga Israeli gwasinda ng'asheega gidang'eata ghuuta, ea gidang'oorsiinda Mordekai saawa.

²⁴ Aba gideaba Hamani siida dooshta Agagi, was orjeeda Hamedata was weajoocheanda fuga Israeli sean, abeeda gwachi ghamwaal fuga Israeli gichea ghwanung' gooshealda saawa, ak gwasin Buri, nea loodita gideaba gayghwanung' goosha saawa;

²⁵ iidu nea ghwahidu Esta madeeda sugoocheanda, geataw iita nea sing'waar gideaba ng'asheandida muy sin gwachi jea gwasima fuga Israeliin dabiksiina niny, aba gideaba niny ea orjoagaaschi gajoarata aba uhuuda geeta.

²⁶ Ak geeguura eawoojigiga Burimu, nea gheawunga Bur gil. Nea abeeda geebaysiina ng'asheega sean sing'oorsa jeedeaba barawajeanji, ea giika daah saawaan aba badaydeaba ng'asheanji ea ng'asheega bussa saawa,

²⁷ ak gwasissa geat fuga Israeli deaweeda ea jeacheenga nyaawa, ea gea jea gaguuy sea saawa gideaba adeapuut giing'ooydeaba eawoojisu asiyeenyean gawuurji gidanyaashta ng'oorshoodiga, iihita damandaanyi aba gilakweay,

²⁸ askwearjoojisu gajeepkeadi nea geang'waay aba jeacheenga sean ea gilinyoo ea fugeaba geahi ea darooraka, ea mujiini, nea askwearjoojisu bea Burimu adeapuut aba jeeda fuga Israeli nea giipkeataanyi ea adagoosha aba jeacheenga nyaawa.

²⁹ Hean gatmooda sugoocheanda, was Esta was hudeaba Abihaili niny sea Mordekai was siida Israeli geang'waar aba gheambalmeesean masooda barawajeanji bea iyeenya bea Burimu.

³⁰ Ak goojeaksa barawajeega, fuga Israeli sean mida darooraka apughala ea diktam ea ispwa bea sugoocheanduumeeda Ahasuero, bea ng'asheega hoyyoo ea huumeanda,

³¹ nea askwearjoojigiga bea Burimu gajeang'waay aba damandaanyi, gawuurji gidaghayi nyaashta Mordekai was siida Israeli ea gatmooda sugoocheanda was Esta ghayi rukusiinda fuga Israeli ea gidarukusiinda geat ea jeacheenga nyaawa, ak geeluulda geat nea geenyahuushi.

³² Ak diigheanda gatmooda sugoocheanda was Esta ghwahit aba sinooda ng'asheesu bea Burimu, ak geeng'oorsa jeeda gitaabu.