ESTA 8 - Bibliyeeda Ghaydit

Fuga Israeli geerukusa gideaba ang'ucheena

¹ Eaweedida ghoadaw sugoocheanda was Ahasuero Esta was gatmooda sugoocheanda, gheeda Hamani, was weajoocheanda Yahudi. Ak ghwahidu Mordekai madeeda sugoocheanda, aba gideaba Esta abeeda nirukusa gidaduupcheata;

² hean ghafwakta sugoocheanda ghuniidaanyi ghayi geandeawa heeda Hamani, ak ghoadaw Mordekai. Ak gageanu Esta ghwanung' goombal Mordekai gheeh Hamani.

³ Ng'ata goobalool Esta sugoocheanda gicha; ak gwajaksa geaw madeadaanyi ak gamearmearani nea ghoabuutbuut dabeaka aba gideaba gageanda gidida muy sin Hamaneeda dooshta Agagiin aba badayda fuga Israeli.

⁴ Ak ghamiin gatmooda sugoocheanda siguura Esta aba bileangidaanyi meeng'meeng'i ak ghang'eat Esta ak ghamiinaada aba madeeda sugoocheanda.

⁵ Ak gwayi, “Inyas ghwadaah sugoocheanda gideaba ghwahit, ak ghaanyaschi masoodeanyu aba madeadaanyi, ak geadaah gideaba ng'asheanda aamiy aba madeeda sugoocheanda, nea ghaanung' gahoosan gheanyangaaschi, abeeda geang'waar barawajeanda jea gwanuus fuga ghayi ng'oar Hamani bea dooshta Agagi, was orjeeda Hamedata, ghayi ng'oar badayda lasita uhuuda fuga Israeli mida jeeda darooraka sean bea sugoocheanda.

⁶ Aba gideaba gaydamilikghtaaydaan dadaah sawanadeeda hidu badayda fugeasu? Ghana gaydamilikghtaaydaan ng'ulooda giishealda buweadeegeasu?”

⁷ Ak ghwalamda sugoocheanda was Ahasuero ak gwayeesha Esta was gatmooda sugoocheanda, ea Mordekai was siida Israeli, “Ng'ula, naadawji Esta gheeda Hamani, ak ea sirata niny aba uhuuda geeta, aba gideaba gagasa ghabwar fuga Israeli.

⁸ Ak gajang'oorsiina fuga Yahudi aba gidoogasiidi, aba gheawunga sugoocheanda, ak gajaroora aba ghuniida sugoocheanda; aba gideaba ng'oorda sing'waar aba gheawunga sugoocheanda ak geeroor aba ghuniida sugoocheanda manda siida jea ghaheawa.”

⁹ Ng'ata geeguursa ng'oorshoodiga sugoocheanda aba damandida, nea sheedeaba samwagu gil, siguura Sifani, bea eaweedeaba diktam ea samwagu; nea gawuurji gidaghayi rukusiinda Mordekai fuga Israeli ak geeng'oorsa sean fuga hees ea sugoodiga hees, ea fuga ambaliischi bea darooraka Indiya ea gawa Gushi, darooraka ea bughala ea diktam ea ispwa, ea gilinyoo ea daroorda gil gaba nih bea barawajeandaanyi nea gaba siisi sing'oorsa aba iitaanyi, ak eara fuga Israeli geataw barawajeanda nyaawa aba iita nyaawa.

¹⁰ Ak ghang'oar aba gheawunga sugoocheanda was Ahasuero, ak gooroor aba ghuniida sugoocheanda, ak geecheakteawa barawajeega booyajeega, nea geeding'da faraasajeega saliida muuchi, sigadiydooscheata aba gadiyeeda sugoocheanda, nea abeeda geejiilsa muhealeeda gheeda sugoocheanda.

¹¹ Aba badaydeaba suh sugoocheanda gwarukusa fuga Yahudi ghabwatgeat aba gilinyoo ea mujiini gil ak ghaweat eaweega nyaawa, ak geenuuseada nea geegul uhuuda, nea gwaduulu lugweega ea gilinyoo ea buuneeda gil ghana darooraka was gea ng'uchi saawa, sea diibiga nyaawa ea gadeemga, ak googeandi haleanjeeda nyaawa ghoah easanga,

¹² ghayi eaweecha aba jeeda darooraka sugoocheanda was Ahasuero, nea eaweedeaba damasamwagu gil, bea sheedeaba damaniyeenya, nea sheeda siguura Adara.

¹³ Barawajeanda bassa rugu ng'asheega sing'waar gajeatayda aba gilinyoo ea daroori gil, ak geatayda ghoah diigheanda aba giliwas daroar, nea geerukwiisa buuneesean, nea fuga Yahudi gidabal goodiing'diing'da geat eaweecheanji aba badayda weajoodiga nyaawa.

¹⁴ Ng'ata gaweay buuneesean siicheakta nea gwading'da faraasajeega saliida muuchi sigadiydooscheata, aba gadiyeeda sugoocheanda nea geanung' ghwalamwach geat aba girukusiinda sugoocheanda; ak geatayda iita aba ng'eanyiida Susa.

¹⁵ Ak gwarita Mordekai ghang'amwa madeeda sugoocheanda, nea niikwa hang'weaka sugoocheanduumeeda bea oormeeda gasa gwatuudu ea dea eesh, ea shiipka haw sisna dahaabu ea hang'da miy bea sheayeeda haw bea oormeeda oomu, hean goojuur fuga mujiineeda Susa nea gahoosan.

¹⁶ Ak ghwanyas fuga Yahudi weeshinda ea ghweelmeeda ea hooseaneega ea mureeda.

¹⁷ Ak aba gilinyoo ea daroar gil, ea gilinyoo ea mujiini gil, ea hiji was sean nyooh ghwahita girukuta sugoocheanda, ea iitaanyi, ghwanyas fuga Israeli ghweelmeeda, ea hooseaneega, ea fuufta. Ea gwahinda geat fuga saang'a bea ng'eanyiita was fuga Israeli aba gideaba muuwda ghayi bea fuga Israeli niyamwa gagal heanyaawa.