ESTA 7 - Bibliyeeda Ghaydit

¹ Muchu gawa sugoocheanda sea Hamani sea gatmooda sugoocheanda siguura Esta jeeda ghweelmeeda.

² Ak eaweedeaba iyeenya, nea geali difaayi, ghwalamda sugoocheanda gicha ak gwayeesha Esta, “Rukuni gidabaktaneey, Gimusi naaha Esta? Ak gajeegoonyi. Ak gigasayi naaha? Eara sugoocheanduumeedeanyu iisilach bugusta gajeegoonyi.”

³ Hean ghwasha gatmooda sugoocheanda was Esta, ak gwayeesha, “Inyas ghaanyaschi masooda aba madeadaang'u, Ea sugoocheanda, ak inyas ghwahit aba heeda sugoocheanda, abeeda geegoonan eaweegeasu ghoah musoodeanyu, ea fugeasu ghoah gideagasayi.

⁴ Aba gideaba sishaydaneasa, aniini ea fugeasu, ak gealas uhuudeanya, nea geenuuseasa, nea geehutaneasa. Inyas geeshaaydaneasa eewuurjeewana soomjooga, headiga ea gadeemga, abeeda gaydasiinda aba heedeanyu; ak eara gwasa miyeedeanya majeegala lugooda ak sugoocheanda.”

⁵ Hean ghwalamda sugoocheanda siguura Ahasuero ak gwayeesha Estaheeda was gatmooda sugoocheanda, “Nih ng'eaha gil, ak gwanda yeenu, nih badaksa gwasin ng'asheanjiin?”

⁶ Ghwalamda Esta ak gwayeesha, “Siisi sawan buuneedean gil ea weajoocheanda! Nih siida muy gil was Hamani!” Hean ghang'ut muuwda Hamani aba madeeda sugoocheanda ea gatmooda sugoocheanda.

⁷ Ghang'eat sugoocheanda aba heeda ghweelmeeda nea ninyareas ak gawa jeeda boostaaneeda sugoocheanda; nea Hamani ghamiinaada gamus eaweagaaschi aba heeda gatmooda sugoocheanda was Esta, aba gideaba ghwadaah gaygwasima sugoocheanda niny gidamuy.

⁸ Ak gabiikna sugoocheanda jeeda boostaaneeda sugoocheanda, ak gawa gheeda sugoocheanda heeda siileeysa difaayi, nea abeeda Hamani ea nijaksa geaw badayda hoorgeeda gwachi mida Esta; ak gwayi sugoocheanda, “Gaygafoolan gatmooda sugoocheanda aba madeedeanyu, aba jeedeaba gheenyu?” Damanda duu gabaloola sugoocheandean, hean geedukuta gheanyanga Hamani.

⁹ Hean gwayi Harbona was siyagi aba jeeda furiischoodiga sugoocheanda, “Ang'ula geediga sin Hamani aba badayda Mordekai, nea abeeda gwasin gea miyaasiin aba badayda sugoocheanda, ghamiinda aba gheeh Hamani, nea geawundaanyi ea geatin haradam ea damanamughuush gil.”

¹⁰ Ak ghwalamda sugoocheanda ak gwayeesha, “Oarata niny aba uhuuda geeta.” Hean gearata Hamani aba uhuuda geeta ghayi sin aba badayda Mordekai. Hean goosha nyarasta sugoocheanda.