ESTA 6 - Bibliyeeda Ghaydit

Sugoocheanda ghoadaw mureeda Mordekai

¹ Eaweedida sugoocheanda ea mii gwalil; ak ghwanung' eeyeadu gitaabooda damanyoojiga ak geasoamwa aba madeadaanyi.

² Ak geadaah geang'waar gideaba Mordekai gang'usa foolayda Bigtana ea Dereshi, was fih iyeenya was gulanga, was furiischoodiga, ghayi gasa ghwayiin geatinga nyaawa badayda Ahasuero was sugoocheanda.

³ Ghwalamda sugoocheanda ak gwayeesha, “Heapi Mordekai sisissa mureeda ghana siitaw naaha aba badaydeaba gili?” Ghwalamda fuga gadiyeeda sugoocheanda gadiyeesa niny ak gwayeesha, “Mandana gida sisissa niny.”

⁴ Ghwalamda sugoocheanda ak gwayeesha, “Gwanda ng'eaha hulanda?” Abeeda Hamani gutghwahidu ghoah jeeda seamooda mwanang' bea gheeda sugoocheanda abeeda gawa goobaloola sugoocheanda, gichea earataayda Mordekai aba uhuuda geeta sin niny.

⁵ Hean gwayeesha fuga gadiyeesa sugoocheanda ak gwayeesha sugoocheanda, “Gwanda hoowa Hamani, ghamiinaada aba seamooda.” Ghwalamda sugoocheanda, “Anung' ghwahidu gah.”

⁶ Ghwahidu Hamani gah, ak gwayeesha sugoocheanda, “Gajeesissa naaha siidida gasa ghoadaw sugoocheanda mureedean?” Ak gwayi Hamani aba jeadaanyi, “Gajea ng'eaha siida jea gwasissa sugoocheanda mureeda ea ghang'alan?”

⁷ Ghwalamda Hamani ak gwayeesha sugoocheanda, “Siida gasa sugoocheanda gwasissa mureeda,

⁸ gajeeyeasa hang'weaka sugoocheanduumeeda was gea ammu sugoocheanda gookwa ea faraasi was dea bwariiy sugoocheanda nea siyiin uhuuda shiipka sugoocheanduumeeda,

⁹ nea hang'weakiga ea faraaseedida gajeataw siyagi aba jeeda fuga hees bea sugoocheanda naawa suurja, ak geekwealsa siidida gasa sugoocheanda ghoadaw mureedean, ak gawa nea gwasik bugharjeanda mujiini, nea gwarukwiida ng'asheega madeadaanyi nea gwayi: ‘Nih gichea eehinda siidida gasa sugoocheanda ghoadaw mureedean.’”

¹⁰ Hean gwayeesha sugoocheanda Hamani, “Lamwaja geani hang'weaka ea faraasi, gawuurji gidinyaashti, ak gisissi Mordekai was siida Israeli apteada aba gheata dooshta sugoocheanda. Sinda haleanjeeda sean gidirukuteaydi.”

¹¹ Ng'ata gageanu Hamani hang'weaka ea faraasi, ak gooshuup Mordekai hang'weaka nea gwaneay aba bugharjeanda mujiini, nea gwarukwiida ng'asheega, “Nih gichea eehinda siidida gasa sugoocheanda ghoadaw mureedean.”

¹² Ng'ata gabiikta Mordekai gheata dooshta gheeda sugoocheanda. Hean ghwalamwajaada Hamani gawa gheanyi, nea goonyahuushi nea gwadukuta uhuudaanyi.

¹³ Ak gwarukusa Hamani gatmoadaanyi was Sereshi ea fugaaschi duupchi ng'asheega sean nyas niny. Hean ghwalamda fugaaschi mideawa weaghuumeeda ea gatmoadaanyi was Sereshi ak geeyeesha niny, “Inyas ghoabeada Mordekai aba madeeda siida ning'eat giibeedeayda, iibea fuga Yahudi, abeeda siisi ea majamuusa gajabeada aba madeadaanyi.”

Hamani geenuus

¹⁴ Hean damani duu gabaloola sea ninyiin, ghapka furiischoodiga sugoocheanda ak ghwaat Hamani nea ghwalamwach ghwaak hamita sin Esta.