ESTA 4 - Bibliyeeda Ghaydit

Mordekai gamus Esta weeta

¹ Iidu nea gwajeeng'u Mordekai ng'asheega sean sisiin, hean ghabwaashaada Mordekai hang'weakaaschi, ak gookwa guniya nea ghwayeasha geaw deareeda, ak gwarita gawa bugusta mujiini, ak gooyeawda aba ghuuta haw nea ghang'ut giiseaneega;

² ak ghwascheang'da ea ghwahita dooshta gheeda sugoocheanda, aba gideaba manda siida jea gawa dooshta gheeda sugoocheanda nea gaba hang'weaka guniyajeega.

³ Ak daroorda nyooh ghwahita iidi ea diigheanda rukuta sugoocheanda, abeeda gwanda giinyahuushooda haw aba bugusta fuga Yahudi; geeluulda geat nea geeyeawda nea geanyahuushi, nea mwaatkwa aba jeenyaawa gwalil aba badayda guniya ea deareeda.

⁴ Ng'ata gaweay haweega gadiyeeda bea Esta ea fugiga was gulangean, ak geerukusa niny iita, gagiisan gatmooda sugoocheanda; ak gweasa Mordekai hang'weaka jea gookwa ak gwajakta guniya, ak ghaheawa mamwasa girukusa saawa.

⁵ Hean gaguursa Esta Hadaki was siyagi bea jeeda rajanga, ghayi siloat gagadiiyeesa Esta, ak goojeakta gawa heeda Mordekai gwasikteawa ng'asheanji ea gidawas.

⁶ Ak gwarita Hadaki gawa jarooda heeda Mordekai, nea abeeda gwanda bugharjeanda mujiini mida madeeda dooshta gheeda sugoocheanda,

⁷ ak gwarukusa Mordekai niny ng'asheega sean nyas niny, ea badayda lapiyeeda jea ghoadayda Hamani ak geayiin heeda siitiiwiisa haleanjeeda sugoocheanda aba badayda lasooda uhuuda fuga Yahudi.

⁸ Mordekai ghoadaw eara niny barawajeanda sing'waar bea diigheanda siyaat ng'eanyiida Susa bea lasooda uhuuda goohiimsa Esta nea gwarukusa gideaba una heeda sugoocheanda, ak gamus gwasamsa fugaaschi.

⁹ Gawa Hadaki ak gwarukusa Esta gidarukusa Mordekai.

¹⁰ Hean ng'ata goobalool Esta Hadaki, ak goojeakta gicha heeda Mordekai nea gwayeesha,

¹¹ “Fuga gadiyeeda sean bea sugoocheanda ea fuga mida darooraka sugoocheanda ghwanal gideaba gilinyoo ea ng'eedeeda gil ghana ea gatmooda inyas ghwala jeeda seamooda gheeda sugoocheanda nea miyeeguursa, abeeda gwanda deaweedeanagi; nea gideaba gajeenuus gil, geaghus diita jea ghamiin gheang'da sugoocheanda aba bileangida meeng'meeng'iin abeeda gaygoobiida. Ak aniini ea miyeeguurnean dawa gheeda sugoocheanda ghamneawa nih eaweedeaba diktam ea damanamughuush gil.”

¹² Ak geerukusa Mordekai ng'asheega rugu Esta.

¹³ Hean gwarukusa Mordekai saawa gideaba gabiikta gwarukusa Esta, gideaba, “Adighanyi gideaba ang'iing'i gayghuuha nea gibwaageaw aba gheeda sugoocheanda ea ng'ala fuga suurja sean bea Yahudi.

¹⁴ Aba gideaba ang'iing'i inyas gisindi ghamneawa aba ng'asheanji, gwadeepa gwardu nawa nuut ak ghaghu fuga Yahudi, ak ang'iing'i ea ghweanigaagu gajooshealana. Ak ghwanal ng'eaha gideaba ang'iing'i miwuni aba sugoocheanduumeeda aba damanda uurji nihi?”

¹⁵ Hean gwarukusa Esta saawa ghwasha ghuuta Mordekai,

¹⁶ “Una, ak gibwadigeat fuga Israeli sean mida ng'eanyiida Susa, ak gooluuldi geat aba badaydeanyu, adooyeagiischi nea adooleeshi eawooji samwagu, eawa ea askweari ak eara aniini ea haweegeasu bea gadiyeeda gajeeluulda geat eewuurjeewaneegwa. Hean gaydawa heeda sugoocheanda, nea mii deaweeda gil, ak inyas ghaameayi abeeda ghaameayi.”

¹⁷ Hean gawa Mordekai heechea gawa ak gwasinda ng'asheega sean gidarukusiinda Esta niny.